Tơdrong Pơđơ̆k 28:2
“Dêh char pơm kơnê̆, na đei lơ lu bơngai pơgơ̆r; Mă-lei bơngai hlôh wao na pơgơ̆r dêh char gei oei kơjăp đunh.” (Tơdrong Pơđơ̆k 28:2)
Nơ̆r jet tơchĕng pơwao:
– Tơdrong kiơ truh mưh minh pôm dêh char dah minh ‘nu bơngai pơm yoch?
– Bơngai pơgơ̆r thoi yơ na ăn tơdrong hiôk hơđơ̆ng?
– Lu bơ̆n tơ’bôh tơdrong hlôh wao ‘Bok Kei-Dei hiơ̆k rim năr thoi yơ?
Nơ̆r pơđơ̆k âu pơma tơplơ̆ băl hăm nơ̆r ưh kơ hơđơ̆ng păng hiôk hơđơ̆ng. Mưh đei minh pôm dêh char pơm kơnê̆ ataih đơ̆ng tơdrong ‘lơ̆ng tơpăt, pơm tơdrong kơnê̆, tơdrong rŭng răng gô truh, na gô tơplih bơngai pơgơ̆r hơnơ̆ng. Minh “dêh char” dah minh pôm dêh ayơ đei tơdrong arih ưh kơ ‘lơ̆ng gô tơ’bơ̆p lăm tơdrong rŭng răng yua kơ đơ̆ng bơngai pơgơ̆r rơdu tơrăn. Na bơngai pơgơ̆r gô tơplih hơnơ̆ng trong ưh kơ hơđăl, tơdrong rŭng răng rai lanh jơ̆p jang. Nhen thoi pơtao Ahap, pơtao Manase pơm kơ dêh char sư glăi răm. Tơdrong blah plơ̆ ‘Bok Kei-Dei ưh kơ sĭ pơm rŭng răng lăm dêh char đĕch ôh, mălei lăm chăl arih sư kơdih păng hnam dơnŏ sư hai mơ̆n.
Tơplơ̆ dơ̆ng: “mălei bơngai hlôh wao dêh char hơgei oei kơjăp đunh”. Yua kơ ‘Bok Kei-Dei bơih tơm tơdrong hlôh wao” (Tơdrong pơđơ̆k 2:6). Kơlih kơ thoi noh tơdrong hlôh wao đơ̆ng Kră Yang ba ăn rơđah hơđăl tơpă, trong mă rơđah hơđăl noh kơjăp đunh. Minh ‘nu pơgơ̆r dah mă minh ‘nu bơngai lui ayơ mưh chơ chă tơdrong ‘nao ‘lơ̆ng Kră Yang păng yak kiơ̆ trong Sư, gô jing tơmam gơh yua ba ăn hiôk hian păng tơproh ming ‘lơ̆ng ăn kơ bơngai tơpôl. Tơdrong hlôh wao ‘nâu ưh kơ trŏ hlôh wao lĕch đơ̆ng kon bơngai ôh, mălei đei dan kiơ̆ jơhngơ̆m hli yom kơ Kră Yang ‘Bok Kei-Dei păng chu yom nơ̆r Kră Yang. Nhen thoi pơtao Jôsia, pơtao Êsekiên đei hơmet ming dêh char sư, dŏng kon pơlei sư lĕch đơ̆ng lu bơngai ayăt păng đei jơnăr sot đunh.
Jơ̆ bơngai lui, lu bơ̆n đei krao arih athei hlôh wao lăm ala teh âu ngăl juăt ưh kơ ‘bôh trong rơđah. Mă lăm hnam dơnŏ, bơngai lui dah lăm kon pơlei ưh kơ lui, lu bơ̆n kăl kơ pơchrang tơdrong tơproh ‘lơ̆ng lăm Kră Yang ‘Bok Kei-Dei đơ̆ng chăl arih ‘lơ̆ng rơgoh, iŏk đon ala păng tơnăp. Bơhngol gơh hiôk hơđơ̆ng mưh jơhngơ̆m bơ̆n băt dan trŏ anih lăm Kră Yang. Đơ̆ng Kră Yang Yêsu Krist na lu bơ̆n ưh kơ sĭ sơng iŏk tơdrong dŏng pơklaih đĕch ôh, na lu bơ̆n kư̆m sơng iŏk tơdrong hlôh wao wă kơ arih trŏ. Athei lăng anih đei ‘bơm ưh, lăm hnam dơnŏ bơ̆n, bơngai lui dah tơ anih jang. Athei chă tơdrong hlôh wao đơ̆ng ‘Bok Kei-Dei rim năr đơ̆ng nơ̆r Kră Yang păng đĭ jơhngơ̆m krao khan. Apinh Kră Yang tơgŭm lu bơ̆n pơm tơ’bôh hăm tơdrong hlôh băt păng jing tơm tơdrong pŭn hiôk hơđơ̆ng kơ bơngai jum dăr.
Ơ ‘Bă tơ plĕnh, Ih bơih Kră Yang ‘Bok Kei-Dei mă tơproh ‘lơ̆ng păng hiôk hơđơ̆ng. Apinh Ih mơnat kơ inh kơplah inh weh ataih đơ̆ng trong Ih păng rŭng răng lăm chăl arih inh. Apinh Ih ăn kơ inh hlôh wao păng gơh hơgei đơ̆ng nơ̆r Kră Yang. Tơgŭm inh arih hlôh wao păng tơpăt wă ba ăn tơdrong hiôk hơđơ̆ng kơ bơngai jum dăr. Krao khan yua Anăn Kră Yang Yêsu Krist, Amen.
Lu bơ̆n wang hơdai ba ăn tơdrong hiôk hian păng hơđơ̆ng dah mă pơm rŭng răng lăm hnam dơnŏ, bơngai tơpôl?
Đŏk Sơ̆p hla bơar ‘Bok Kei-Dei lăm pêng sơnăm: Jop 15
Kênh Youtube BHKTHN:
