Klei Aê Diê Blŭ: I Kôrantô 9:15-27
Êlan kliăng: “Kâo ngă jih jang klei anăn kyua klei mrâo mrang jăk, čiăng kơ kâo dưi mâo klei jăk jĭn mơ̆ng klei mrâo mrang jăk.” (I Kôrantô 9:23)
Klei êmuh ksiêm mĭn: Hŏng ya hdră Khua ƀĭng kna Y-Pôl ngă leh čiăng “jing msĕ si jih jang mnuih”? Ya klei kñăm ñu tơdah mkhư̆ klei êngiê kơ pô? Si klei drei hriăm tui hlue klei Khua ƀĭng kna Y-Pôl?
Hlăm kdrêč Klei Aê Diê Blŭ anei, Khua ƀĭng kna Y-Pôl pŏk êlam hĭn kơ mta kñăm mơ̆ng klei mkhư̆ kơ klei êngiê pô. Êjai dôk hdĭp hŏng phung Yuđa, ñu lui klei êngiê čiăng dưi dôk hdĭp msĕ si sa čô Yuđa, jing amâo ngă soh ôh hŏng klei bhiăn mơ̆ng đưm, klei bhiăn Yuđa hŏng klei amâo čiăng êdi, čiăng kơ phung Yuđa hmư̆ ñu leh anăn mơ̆ng anăn ñu ênưih mtô Klei Mrâo Mrang Jăk kơ phung Yuđa. Bi hlăk êjai hdĭp hŏng phung ti êngao, jing “phung amâo gưt klei bhiăn”, ñu amâo kpĭ ôh klei bhiăn Yuđa kơ digơ̆, amâo brei digơ̆ tŭ klei khăt klĭt, kăm ƀơ̆ng čĭm ŭn, amâodah hlue ngă hruê knăm phung Yuđa ôh… Ñu hưn mthâo Klei Mrâo Mrang Jăk kơ digơ̆ hŏng klêi blŭ leh anăn dhar kreh digơ̆ thâo săng, kñăm ñĕ mjing klei gun kpăk amâo čiăng êdi tơdah digơ̆ nao hŏng Klei Mrâo Mrang Jăk.
Wăt tơdah čuăn hdĭp snăn, ƀiădah Khua ƀĭng kna Y-Pôl amâo “jing msĕ si jih jang mnuih” soh čiăng kơ pô mkăn dưi tŭ mă leh anăn bi mni ôh. Kyua ya klei ñu gưt hlăm boh klei anei dôk hlăm klei êngiê Aê Diê brei, msĕ si klei ƀơ̆ng mnơ̆ng ngă yang ñu mblang leh êlâo anăn (I Kôrantô 8:9; 9:1,15-18). Khădah snăn, hlăm klei êngiê dưi brei anăn, ñu pô lŏ kčah thiăm sa blư̆ dơ̆ng: kyua klei tŭ dưn kơ pô mkăn leh anăn kyua Klei Mrâo Mrang Jăk. Snăn, “jing msĕ si jih jang mnuih” amâo djŏ jing knuih hdĭp mnuih plă plia ôh, si ngă arăng kâo msĕ snăn mơh, ngă soh hŏng klei bhiăn Aê Diê kăm čiăng mă ai pô mkăn, ƀiădah jing knuih hdĭp khăp kơ mngăt dôk rai luč hlue si klei thâo mĭn.
Hŏng pluh blư̆ yua boh hră “čiăng kơ” hlăm dua păn êlan Klei Aê Diê Blŭ , Khua ƀĭng kna Y-Pôl brei drei thâo klă klei ñu kñăm tơdah ngă dŭm bruă tăp năng ñu pô ƀuh amâo jăk ôh, brei kăm, mgô̆ asei mlei brei gưt: “čiăng kơ hŏng jih klei anăn kâo dưi bi mtlaih” lu mnuih, mơ̆ng phung Yuđa truh kơ phung ti êngao, “bi mtlaih đa đa hlăm phung diñu”, “čiăng kơ kâo dưi mâo klei jăk jĭn mơ̆ng klei mrâo mrang jăk”, “čiăng mâo đuôn mtao amâo thâo rai luč ôh” (êlan 22, 23, 25). Ñu bi mklă klei kñăm ñu amâo djŏ êran hơăi mang amâodah čăm angĭn ôh, ƀiădah kyua Klei Mrâo Mrang Jăk leh anăn čiăng kơ pô mkăn dưi thâo kơ Klei Mrâo Mrang Jăk, klei hâo hưn yuôm bhăn leh anăn jăk hĭn kơ klei hdĭp diñu.
Hlue si klei bi hmô Khua ƀĭng kna Y-Pôl, grăp čô drei brei mkhư̆ klei êngiê pô čiăng kơ Klei Mrâo Mrang Jăk Aê Diê truh hŏng lu mnuih, ba klei bi mtlaih Khua Yang Yêsu Krist truh kơ pô mkăn. Đăm bi hrŏ ôh ênoh yuôm Klei Mrâo Mrang Jăk ƀiădah brei bi ti gŭ pô “čiăng kơ hŏng jih klei anăn kâo dưi bi mtlaih đa đa hlăm phung diñu” (êlan 22).
Ya klei brei drei kăm, mkhư̆ kyua Klei Mrâo Mrang Jăk?
Wah lač: Ơ Khua Yang, bi mni kơ Ih kyua phung srăng mkhư̆ klei êngiê pô čiăng kơ Klei Mrâo Mrang Jăk Khua Yang truh kơ kâo. Akâo kơ Ih đru kâo čŏng bi mkhư̆ klei êngiê pô kyua Klei Mrâo Mrang Jăk Khua Yang Yêsu Krist. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôp 18
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
