Jôsuê 7:10-15
“Kon pơlei Isơrael đei pơm tơdrong yoch ưh kơ chu gah tơmam trŏ kơ pơyơ̆r; păng pơrăm Akan kon drŏ-nglo Karmi, sâu Sapđi, sâu i Sêra, đơ̆ng adrĕch Juđa, đei iŏk tơmam trŏ kơ soh pơrăm lê̆ păng trŏ kơ pơyơ̆r noh, lei Kră Yang, hil mĭl kơ kon pơlei Isơrael.” (Jôsuê 7:1)
Nơ̆r jet tơchĕng pơwao:
– Kră Yang khan tơbăt kơ Jôsuê pơm kiơ?
– Yua kơ kiơ Kră Yang roi tơbăt kơ Jôsuê păng kon Kră Yang athei pơm ăn kơdih jing ‘lơ̆ng rơgoh?
– Tơdrong yoch lu bơ̆n pơm ‘bơm kơ đe bu?
– Lu bơ̆n athei pơm kiơ wă pơkeh klaih đơ̆ng tơdrong yoch?
Đơ̆ng rŏng kơ blah thuơ kơ pơlei iĕ noh pơlei Ahi, ‘bok Jôsuê đei ‘blep noh tơkan tơ Kră Yang krao khan. Thoi ei, tơdah ưh tam tơbral hŭt đĭ tơdrong yoch lei mă đơ̆ng đei krao khan kư̆m ưh kơ yua kiơ. Kră Yang athei Jôsuê iung dơ̆ng, ‘nĕ pă kŭp kơ̆l tơteh. Kră Yang wă kơ Jôsuê pơm hloi noh tơbral đĭ tơdrong yoch. Hơdrol hloh, Kră Yang tơbăt kon pơlei Isơrael pơm yoch, lu sư ưh kơ kiơ pơkă Kră Yang đei khan bơih. Isơrael hlôi đei iŏk dôm tơmam hiong hach. Kơplah iŏk tơmam gah Kră Yang, lu sư jơ̆ bơngai tơtông, pơm khan nhen thoi ưh kơ băt tơdrong kiơ, jơ̆ hơlĕnh. Đơ̆ng rŏng băt kơ Isơrael thuơ. Kră Yang tơ’bôh tơbăt minh tơdrong tơpăt tơpă hli krưp dêh: Dang yơ lu sư hŭt lê̆ đĭ tơmam ‘bơ̆t anăp Inh mă wă pơrăm Isơrael jing bơngai trŏ kơ wă pơrăm. Kră Yang ưh pă oei hơdai lu sư dơ̆ng, wă khan Sư ưh pă ăn tơdrong blah jei ăn kơ lu sư dơ̆ng, na lu sư gô răm.
Kră Yang khan dơ̆ng kơ Jôsuê athei iung, păng jơ ‘nâu tơbăt athei pơm wă kơ hŭt lê̆ tơmam trŏ kơ wă pơ răm Isơrael. Kơnao wă hơmet blŭng a hăm tơdrong ôp rơgoh. Thoi hơdrol kơplah yak kơ krong Jôđăn, lu sư arih rơgoh kơdih akâu (Jôsuê 3:5). Ôp rơgoh ưh kơsĭ khan lăp minh tơdrong sŭt yoch mălei hơmet jơhngơ̆m kon pơlei wă kơ Kră Yang năm păng oei hơdai lu sư. Kră Yang kư̆m tơ’bôh trong kơ ‘bok Jôsuê wă bơngai mă pơm yoch. Bơngai ‘noh păng đĭ hnam dơnŏ gô klơ̆m lăm dơnâu.
Tơdrong yoch đơ̆ng Akan ba ‘bơm truh đĭ tơ kon Kră Yang. Tơdrong yoch pơm glăi đơ̆ng A-kan pơm kơ bơ̆n. Tơdrong yoch kon pơm kơ mĕ ‘bă mơlâu; yoch đơ̆ng mĕ ‘bă pơmat truh tơ kon hơ’lơ̆p; klo pơm yoch ba ăn kơ akăn pơmat, kon hơ’lơ̆p, ‘bar pah mĕ ‘bă…Minh ‘nu pơm yoch đơ̆ng noh pơm kơ bơngai nai rok kiơ̆ pơm yoch. Yoch đơ̆ng minh ‘nu bơngai Krist pơm kơ khul bơngai lui lăm pơlei, kư̆m đei truh kơ đĭ khul lui. Hơdrol kơ wă pơm glăi, athei roi lăng đei dôm yơ bơngai ‘bơm yua kơ tơdrong bơ̆n, na gô ‘bôh kơsô̆ ưh kơ tŏ sĕt ôh. Tơdrong yoch Akan ba truh đei pêng jĭt tơdrâu ‘nu păng đĭ hnam dơnŏ sư (Jôsuê 7:5, 24).
Apinh Kră Yang ăn kơ lu bơ̆n iung, pơm tơbral hloi đêl yoch, wă kơ tơdrong arih kĕjei, wă kơ Kră Yang oei hơdai păng ba ăn tơdrong pŭn hiôk ăn kơ dôm lu bơngai huay kơ pơm ‘bơm ăn lơ bơngai yoch.
Ơ Kră Yang, apinh ăn kơ inh băt lăng kơdih păng chu tơbral đĭ hloi dôm tơdrong yoch, oei pơgăn lăm chăl arih inh wă kơ inh huay kơ pơm ‘bơm kơnê̆ kơ hnam dơnŏ păng khul lui. Krao khan yua Anăn Yêsu Krist, Amen.
Chăl arih bơ̆n hăm đei pơm ‘bơm kơ kơnê̆ ba ăn kơ bơngai nai?
Đŏk Sơ̆p hla bơar ‘Bok Kei-Dei lăm pêng sơnăm: Jop 19
Kênh Youtube BHKTHN:
