I Kôrintô 8:1-13
“Bơngai bu pơm sa pơjĭp tơmam đe sơmah kơ yang ‘bơ̆t anăp đe ‘nhŏng oh sư ‘nao lui, lu bơngai ‘noh sư ưh kơ hlôh tôm ôh gah tơdrong sa tơmam đe sơmah. Sư wă pơang akâu sư kơdih đĕch khan hlôh tôm boih.”
(I Kôrintô 8:1b)
Nơ̆r jet tơchĕng pơwao:
– Trong chăl lăm kơ thơ ‘nâu, ‘bok Pôl bơtho gah tơdrong juăt gĭt kăl kiơ?
– Băt kơnăl kơ ‘bar trong phara băl kơplah yua iŏk nơ̆r bơtho đơ̆ng ‘bok Pôl?
– Lu bơ̆n yua iŏk ‘bai pơhrăm ‘nâu thoi yơ hăm lu tơdrong gah sơ̆p hla bơar ưh kơ khă găn?
Nơ̆r pơma kơ sa tơmam đe sơmah kơ yang ‘bok Pôl đei tơ’bôh gah minh tơdrong juăt kăl hloh, yua iŏk hloh kơ tơdrong lăm chăl arih: Đei tơdrong lu bơ̆n “gơh pơm” mălei oei ưh kơtrŏ kơ gơh pơm, lăp pêng trong lăm hla bơar, nơ̆r pơma kơ “băt” păng nơ̆r “tơdrong băt” ‘bok Pôl yua mơjĭt mônh wơ̆t, wă pơting lăng hăm nơ̆r “mêm” păng nơ̆r “tơdrong ‘mêm” (trong 1, 3). Sư bơtho tơ’bôh khan tơdrong hlôh băt hmă đĕch gô jing pơang, na tơdrong ‘mêm pơm kơmĭl ‘lơ̆ng (trong 1). Mă khan băt tơdrong ayơ noh bơ̆n gơh pơm, mălei dah bơ̆n ưh kơ tơchĕng ming lăng tơdrong bơ̆n pơm noh ‘lơ̆ng dah kơnê̆ hăm bơngai nai, lei tơpă sư “Dah sư tơchĕng mơnat kơ bôl sư ‘nao lui ưh tam băt tôm tơdrong lei sư ưh kơ sa ôh tơmam đe sơmah noh, wă kơ bôl sư huay kơ jrok.” (trong 2). Lơ bơngai hlôh wao nơ̆r Kră Yang păng hlôh jrŭ, na yua iŏk sơ̆p hla bơar nơ̆r Kră Yang ưh kơ khă găn rơngei mơ̆ng kơ wă pơm dôm tơdrong, wă khan tơdrong noh pơm kơ bơngai nai năm kiơ̆ tơdrong ưh kơ ‘lơ̆ng, lei na bơngai noh hlôh ưh kơ tam mă tôm ôh dôm lu tơdrong kăl kơ băt. ‘Bok Pôl bơtho kơ lu bơngai âu “Iĕm khan iĕm gơh sa kư̆ kă tơmam đe sơmah kơ yang kư̆m bưh, huay kơ kơ̆m ôh; mă-lei iĕm athei kơchăng ‘biơ̆ hŏ, iĕm ‘nĕ kơ pơm thoi noh hli kơ lu bơngai ‘nao lui jing hơwơ̆l na hơdai wang pơm kiơ̆ thoi iĕm.” (trong 9).
Lăng ming pơtôm, mưh yua iŏk nơ̆r bơtho đơ̆ng ‘bok Pôl, đei ‘bôh ‘bar tơdrong: Mă mônh, adrol kơ pơm tôm tơdrong kiơ kư̆m kăl kơ lăng ming tơdrong bơ̆n pơm noh ‘lơ̆ng dah kơnê̆ tơdrong lui bơngai nai. Mă ‘bar, yua kơ hli tơdrong jang bơ̆n pơm noh pơm kơ bơngai nai ưh kơ lăp đon, ưh kơ tơgŭm thoi noh na gơh iŏk tơdrong rơngei kơdih wă kơnhăm pơm kơ bơngai nai jô̆ kơ bơ̆n ‘lơ̆ng.
Lăm tơdrong arih mă minh lĕch đơ̆ng tơdrong tơchĕng wă chă lơi păng tơdrong ‘mêm ‘măn kơ bơngai nai, thoi ‘bok Pôl pŭ iŏk wă kơ bơngai nai huay kơ pơm glăi “Dah inh sa tơmam đe sơmah kơ yang, na ‘nhŏng oh bơ̆n hơdai sa kiơ̆ inh, lei tơdrong yoch noh yua kơ inh, na ning-mônh inh ưh pă layơ wă sa dôm tơmam đe sơmah kơ yang dơ̆ng boih.” (trong 13). Na tơdrong arih mă ‘bar ‘nâu tơtăm hli kơnh bơngai nai bơ̆n đơ̆ng tơdrong wă kơ đe jô̆ bơ̆n trŏ, tuch luch đei pŭ iŏk đơ̆ng kơdih akâu păng bơngai tơpă ưh kơ đei yua kiơ. Tơdrong arih mă minh pơm kơ Kră Yang lăp đon, mălei tơdrong arih mă ‘bar pơm kơ bơngai nai lăp đon na ưh kơ tơchĕng Kră Yang lăp đon dah tơdrong anat lu bơ̆n dang ei jơ̆ bơngai lui gơh rơngei thoi kiơ̆ kơ lăm sơ̆p hla bơar nơ̆r Kră Yang ưh kơ đei khă găn thoi kơ et tơdrô, ‘bier, et hơ̆t pơm wăn ‘bai răt sô sô̆, v.v..Apinh Kră Yang ăn kơ lu bơ̆n pơm kiơ̆ đơ̆ng tơdrong hlôh wao păng hăm tơdrong ‘mêm ling lang tơchĕng kơ tơdrong arih wă kơ ‘Bok Kei-Dei lăp đon păng pơyua kơ ‘nhŏng oh bơ̆n.
Ơ Kră Yang, apinh Ih ăn kơ inh iŏk đon ala pơhrăm nơ̆r Ih wă kơ hlôh kiơ̆ thoi Ih wă, apinh Ih ăn kơ inh jơhngơ̆m pran wă kơ tơdrong hlôh băt inh noh băt ‘mêm, păng tơiung bơngai nai. Krao khan yua Anăn Yêsu Krist, Amen.
Chăl arih lu bơ̆n đei tơiung ‘nhŏng oh dah mă oei pơm kơ ‘nhŏng oh hlôh glăi? Lu bơ̆n hăm wă pơm kiơ đơ̆ng rŏng kơ pơhrăm ‘bai hŏk ‘nâu?
Đŏk Sơ̆p hla bơar ‘Bok Kei-Dei lăm pêng sơnăm: Jop 16
Kênh Youtube BHKTHN:
