Yausuas 7:16-26
Nqe cim:
“Yog koj pheej npog tej kev txhaum tseg koj lub neej yuav tsis vammeej; yog koj lees thiab tso plhuav tej kev txhaum tseg Vajtswv yuav hlub koj” (Pajlug 28:13)
Lus nug xav:
– Yausuas ua dabtsi tom qab uas tau Vajtswv qhia qhov kev nrhiav tawm tus neeg ua txhaum?
– Akhas thiab nws tsev neeg raug ris tej nuj nqi dabtsi?
– Peb kawm tau dabtsi dhau zaj xwm no?
Tom qab tau Vajtswv qhia Yausuas txog txoj kev nrhiav tus neeg uas tau nyiag tej khoom uas tsimnyog rhuav pov tseg lawd, Yausuas ua kiag raws li Vajtswv hais. Thaum sawv ntxov hnub tom qab, Yausuas kom cov pejxeem los sawv ze raws lawv tej xeem, ces lawv rho tawm xeem Yudas npe, rho tawm cuab Zelas npe, thiab thaum kawg rho tawm Akhas npe. Yausuas hais kom Akhas lees nws tej kev txhaum huv tibsi thiab tsis txhob zais dabtsi. Akhas pom hais tias tsis muaj dabtsi zais tau lawm, nws thiaj lees txhua yam uas nws tau ua txhaum rau tus Tswv. Xub thawj nws “pom” ib lub tsho Npanpiloos uas zoo nkauj heev, thiab pom tsib choj nyiaj thiab ib daim kub hnyav ib choj tawm. Ces nws “ntshaw” tej ntawd thiab “muab” coj los. Thaum kawg nws “zais” tej khoom ntawd hauv qab av hauv nws lub tsev ntaub. Nws tsev neeg kuj pom thiab paub txog tej uas nws ua, tiamsis lawv tsis hais dabtsi. Yausuas thiaj txib neeg mus tshawb nws lub tsev ntaub. Lawv nrhiav tau tej khoom ntawd thiab nqa rov los tso rau ntawm tus Tswv xubntiag.
Yausuas nrog tagnrho cov Yixayees coj Akhas, nws cov tub thiab cov ntxhais, nrog rau cov nyiaj, lub tsho thiab cov kub uas nws tau zais cia, thiab txhua yam uas yog nws li, coj mus muab pob zeb ntaus thiab hlawv pov tseg. Akhas thiab nws tsev neeg tau xav yuam kev hais tias lawv yuav zais tau lawv tej kev txhaum, lawv ua saib tsis taus tus Tswv tej lus samhwm. Tus Tswv yog Tus paub txhua yam thiab pom txhua yam, Nws pom thaum Akhas ntsia pom tej khoom ntawd, ntshaw, nyiag tej khoom uas tsimnyog muab rhuav pov tseg thiab pom thaum nws coj mus zais. Thaum kawg, nws tej kev txhaum raug nthuav tawm tabmeeg rau tagnrho cov pejxeem pom. Akhas thiab nws tsev neeg yuav tsum them tus nqi kim heev rau lawv tej kev txhaum: lawv raug poob lub cuabtam, koobmeej, thiab txojsia.
Tsis muaj leejtwg yuav zais tau nws tej kev txhaum ntawm tus Tswv. Nyab Laj muaj lolus hais tias: “Tus koob uas muab qhwv hauv hnab muaj ib hnub yuav tshwm tawm”. Kiag tibneeg ntiajteb los lawv kuj ntseeg hais tias, txawm yuav ua txhua yam los zais kev txhaum, los muaj ib hnub qhov tseeb yeej yuav raug nthuav tawm. Yog li ntawd, peb haj yam tsis muaj peevxwm zais tau ib qho kev txhaum twg ntawm Vajtswv Tus muaj hwjchim loj kawg, paub txhua yam thiab dawbhuv lub qhovmuag, txawm ua rau qhov chaw twg zais ntsiagto los Vajtswv yeej pom. Yog hais tias tamsim no koj tseem tabtom “zais” ib qho kev txhaum twg, thov lees koj tej kev txhaum rau tus Tswv, tso kev txhaum tseg thiab thov Nws zam txim rau koj. Cia li vamkhom tus Tswv pab kom peb kovyeej tej kev dag ntxias, tsis txhob ua raws peb lub siab ntshaw. Tsis txhob pheej ntsia thiab xav txog tej yam uas tsis dawbhuv. Txhob cia lub siab ntshaw nyiaj txiag lossis lwm yam kev ntshaw ntxias peb ua txhaum rau Vajtswv. Tsis tas li ntawd, peb yuav tsum txiav tu nrho tsis koom ua kev txhaum, tsis yug kev txhaum, thiab tsis txhob ua saib tsis taus Vajtswv tej lus samhwm.
Thov Vajtswv,
Tus Tswv uas paub txhua yam, thov Koj pab nyuam yaus nco ntsoov hais tias tsis muaj leejtwg yuav zais tau nws tej kev txhaum ntawm Koj. Thov Koj pab nyuam yaus paub vamkhom Koj kom nyuam yaus kovyeej txhua yam kev dag ntxias thiab tsis ua txhaum rau Koj. Nyuam yaus tuav Tswv Yexus Khetos lub npe thov, Amees.
Peb tabtom zais yam kev txhaum twg ntawm Vajtswv thiab Pawg Ntseeg?
Nyeem Vajluskub hauv peb lub xyoos: Yauj 20
Kênh Youtube BHKTHN:
