I Kôrintô 9:1-14
“Mă-lei đơ̆ng sơ̆ nhôn ưh kơ đei athei iĕm ‘me nhôn ôh, nhôn adrin jang sa kơdih đĕch, wă kơ iĕm huay ơh sơ’ngon kơ tơdrong nhôn bơtho iĕm gah tơdrong ‘nao ‘lơ̆ng Yêsu Krist.”(I Kôrintô 9:12b)
Nơ̆r jet tơchĕng pơwao:
– ‘Bok Pôl yua iŏk nơ̆r bơtho gah tơdrong rơngei lăm chăl 8 ăn kơ kơdih sư thoi yơ?
– ‘Bok Pôl tơbăt sư đei trong liơ păng yua kơ kiơ sư ưh kơ yua iŏk ‘nâu?
‘Bok Pôl ưh kơ bơtho achăng hmă đĕch mă trong arih ưh kơ wă yua tơdrong rơngei bơ̆n pơm kơ ‘nhŏng oh nai jing rơdu gah đon lui (I Kôrintô 8:13) gơh yua tơpă kơdih akâu sư. Đĭ lăm chăl 9, sư yua lơ nơ̆r jet wă kơ bơ̆n tơchĕng ‘bôh sư đei tôm wă yua iŏk tơdrong ăn tơmam na tơplih tơdrong ‘noh sư adrin jang wă kơnhăm kơdih. Mălei ưh kơ yua trong noh pơm pơmat kơ tơdrong ră roi tơdrong ‘nao wă dŏng pơklaih lơ bơngai (12).
Đơ̆ng trong 1-6, ‘bok Pôl sư pơma kiơ̆ kơ tơdrong lu jơ̆ng ‘bang păng jơ̆ bơngai ba ăn tơdrong ‘nao ‘lơ̆ng ăn kơ kon pơlei Kră Yang tơ pơlei Kôrintô hăm tơdrong nâu, ưh kơsĭ minh ‘nu sư, mălei sư păng ‘Barna’ba đei tơdrong gơh “chông anhăk ba lu mai oh pơm akăn yak năm jơ̆p jang hăm lu nhôn thoi lu jơ̆ng ‘bang nai păng ‘nhŏng oh Kră Yang păng thoi Sê-pha hlôi jang” (trong 5) lăm trong 7-8, sư pơma lăm tơdrong tơpă rim năr arih: Bơngai pơm ưh kơ sa apah jên tơmam đơ̆ng hnam, bơngai pơm tăm ‘long gô phĕ iŏk plei, bơngai wei triu iŏk đak toh kon triu. Tơdah tơdrong nhen hmă noh kơplah tơprọh yua iŏk lăm tơdrong jang ‘lơ̆ng tơpă, lei na lăng kiơ̆ kơ tơdrong juăt pah so: “iĕm ‘nĕ kơkrôp ‘bơ̆r rơmo kơplah oei jang juăt hơnong ba” ‘bok Pôl sư dan nơ̆r apinh: “Hăm trŏ kơ ‘Bok Kei-Dei hiơ̆k bơngơ̆t kơ rơmo? Dah yua kơ lu bơ̆n na sư pơma dôm tơdrong ‘nâu? Na sư tơl rơđah: Trŏ ‘blep yua kơ lu bơ̆n na đei nơ̆r ‘nâu; yua kơ bơngai choh sư gô hơmĕng, bơngai jang pơjuă hơnong hơmĕng đei đơ̆ng noh” (trong 9-10). Wă khan kiơ̆ kơ lu jơ̆ng ‘bang nai, lăm tơdrong arih tơpă rim năr, kư̆m lăm tơdrong juăt pah so. Sư đei gơh iŏk tơmam gah năm ră roi tơplih kơ jang thim sĭt tua tăng. Thoi noh, ‘bok Pôl tơ’bôh pơm kơmĭl đơ̆ng kơdih sư “ưh tam mă pơm” yua tơdrong wă pơyua kơdih noh, “wă kơ huay kơ pơgăn tơdrong ‘nao ‘lơ̆ng Yêsu Krist” (trong 12). ‘Bok Pôl sư yua tơdrong wă pơyua sư kơdih wă kơ tơdrong ‘nao ‘lơ̆ng noh tơ’bôh kơ bơngai nai đĕch. Sư hiơ̆k ‘me sư kơdih, tơplih ưh kơ đơ̆ng lu bơngai mă đêl sư ră roi, wă kơ lơ bơngai huay kơ trăp gleh kơplah sơng iŏk tơdrong ‘nao ‘lơ̆ng.
Rok kiơ̆ tơdrong arih ‘bok Pôl bơ̆jang, ưh kơ sĭ tơdrong bơ̆n gơh jang dah đei rơngei wă kơ gơh jang minh tơdrong na kư̆ kơ jang ôh. Apinh Kră Yang ăn kơ lu bơ̆n ling lang bơ̆jang hăm ‘măn hơdrol hloh tơchĕng kơ lu bơhngol tam mă klaih. Athei drơ̆ng hloi chu pŭ iŏk hăm tơdrong rơngei kơdih wă ră roi tơdrong ‘nao ‘lơ̆ng ba ăn kơ lơ bơngai.
Ơ Kră Yang, hăm đei tơdrong kiơ mă pơm pơgăn ’nhŏng oh kơ ưh kơ hlôh, apinh Kră Yang ăn kơ inh chu pŭ iŏk wă pơjing tơiung ‘nhŏng oh hăm đon lui păng gơh dŏng pơklaih. Krao khan yua Anăn Kră Yang Yêsu Krist, Amen.
Dôm tơdrong ayơ lu bơ̆n đei jang mă ưh kơ yua kơ bơngai nai?
Đŏk Sơ̆p Hla bơar ‘Bok Kei-Dei lăm pêng sơnăm: Jop 17
Kênh Youtube BHKTHN:
https://www.youtube.com/c/bhkthn
