Klei Aê Diê Blŭ: Y-Yôsuê 7:16-26
Êlan kliăng: “Hlei pô mdăp klei soh ñu amâo srăng mâo klei đĭ kyar ôh, ƀiădah hlei pô hưn leh anăn lui klei soh anăn srăng mâo klei pap.” (Klei Bi Hriêng 28:13)
Klei êmuh ksiêm mĭn: Ya klei Y-Yôsuê ngă leh hmư̆ Aê Diê ktrâo lač hdră duah pô ngă soh? Ya boh jhat Y-Akan leh anăn gŏ sang tŭ leh? Ya klei drei hriăm mơ̆ng klei anei?
Leh hmư̆ Aê Diê lač kơ hdră čiăng duah pô tlĕ mă mnơ̆ng năng bi rai, Y-Yôsuê hlue ngă mtam. Aguah hruê êdei, ñu kgŭ ưm leh anăn mtă kơ phung ƀuôn sang nao giăm djăp găp djuê. Êlâo hĭn, ktrâo kơ găp djuê Yuđa, leh anăn ktrâo kơ găp djuê Y-Sêra, leh anăn ktrâo kơ Y-Sapdi; knhal tuč jing ktrâo kơ Y-Akan. Y-Yôsuê brei Y-Akan hưn jih djăp klei soh pô, đăm mdăp klei soh ôh. Ƀuh amâo lŏ mâo ya klei dưi mdăp ôh, Y-Akan hưn klei soh pô ngă leh hŏng Yêhôwa hlăm jih klei ngă leh. Êlâo hĭn, ñu “ƀuh” hlăm dŏ plah mă sa blah ao jhung siam krĭng Ƀaƀilôn siam snăk, dua êtuh sêkel prăk, leh anăn sa klŏ mah boh ktrŏ êma pluh sêkel. Leh anăn ñu “tluh” leh anăn “mă” dŭm mta anăn. Knhal tuč, ñu ba “mdăp” dŭm mta mnơ̆ng anei hlăm sang čhiăm ñu. Bruă klei lăn, dơr mdăp ti krah sang čhiăm klă sĭt phung hlăm sang ăt ƀuh mơh, ƀiădah diñu dôk kriêp. Y-Yôsuê tiŏ nao mnuih ti sang čhiăm snăn ƀuh dŭm mta mnơ̆ng anăn, ba hưn mdah ti anăp Aê Diê, dŭm mta mnơ̆ng jing dŏ Aê Diê arăng tlĕ mă leh.
Y-Yôsuê hŏng phung Israel mă Y-Akan hŏng anak êkei, anak mniê ñu, prăk, ao jhung leh anăn mah ñu mdăp leh, hŏng jih jang mnơ̆ng mkăn jing dŏ ñu ba nao bhĭr hŏng boh tâo leh anăn bi rai. Y-Akan leh anăn jih gŏ sang soh leh tơdah bi mĭn dưi mdăp dŭm bruă pô ngă soh, kyua anăn dlăng hơăi mang asăp mtrŭn Aê Diê. Aê Diê jing pô mâo jih klei myang, ƀuh jih jang mnơ̆ng, Aê Diê ƀuh hlăk ñu dlăng, tluh, tlĕ mă dŭm mta mnơ̆ng năng bi rai, leh anăn ƀuh ñu mdăp mnơ̆ng anăn. Knhal tuč, jih jang klei soh ñu hưn mdah ti anăp jih jang phung ƀuôn sang. Y-Akan hŏng gŏ sang tla ênua yuôm hŏng ngăn drăp, kơhưm leh anăn wăt klei hdĭp.
Amâo dưi mdăp ôh klei soh pô ti anăp Aê Diê. Klei duê Việt Nam mâo klei blŭ: “Aruăt êrŭm hlăm hruh mâo hruê ăt kbiă mơh”. Wăt phung hlăm lăn ala ăt đăo, wăt tơdah ngă ya mta bruă čiăng mdăp klei soh snăn mâo sa hruê klei sĭt ăt srăng hưn mdah mơh. Drei amâo dưi mdăp ya mta klei soh ôh mơ̆ng ală Aê Diê Pô myang leh anăn doh jăk , wăt tơdah ngă ti anôk hgăm dưn mơh.Tơdah dôk “mdăp” ya klei soh, brei drei hưn hŏng Aê Diê, kmhal leh anăn akâo kơ Ñu pap brei. Brei knang kơ Aê Diê čiăng dưi hĭn hŏng klei mplư, đăm tui hlue si klei kđeh čiăng ôh, đăp lŏ dlăng leh anăn bi mĭn kơ klei amâo doh jăk ôh, đăm brei ai tiê tluh atăt kơ bruă ngă soh hŏng Aê Diê. Mbĭt anăn, amâo dưi bi mguôp, rông ba klei soh, amâodah dlăng hơăi mang Klei Aê Diê Blŭ.
Drei dôk mdăp ya klei soh ti anăp Aê Diê leh anăn ayŏng adei pô hlăm Sang Aê Diê?
Wah lač: Ơ Aê Diê Pô Myang, akâo kơ Ih mñă kơ kâo thâo săng amâo mâo ôh pô dưi mdăp klei soh ti anăp Ih. Akâo kơ Ih đru kâo knang kơ Ih čiăng dưi hŏng jih klei mplư leh anăn amâo ngă soh hŏng Ih ôh. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôp 20
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
