Klei Aê Diê Blŭ: Y-Mathiơ 23:34-36
Êlan kliăng: “Sĭt nik kâo lač kơ diih, jih jang klei anăn srăng truh kơ phung găp djuê ênuk anei.” (Y-Mathiơ 23:36)
Klei êmuh ksiêm mĭn: Si Khua Yang Yêsu lač kơ phung Yuđa srăng ngă hŏng phung dĭng ktang Khua Yang? Si boh jhat diñu srăng klam? Si klei mđĭ ai drei mâo tơdah dôk hlăm boh klei arăng ngă jhat kơ klei đăo?
Khua Yang Yêsu yua boh blŭ mưng yua, “phung khua pô hưn êlâo, phung thâo mĭn, leh anăn phung khua čih hră” čiăng lač kơ phung khua gĭt gai hlăm Phung Sang Aê Diê tal êlâo. Khua Yang hưn êlâo kơ klei phung khua gĭt gai hlăm klei đăo ai ngăm leh anăn phung Yuđa srăng ngă hŏng phung hưn klei đăo kơ Khua Yang. Diñu srăng tuôm hŏng klei phung Yuđa ngă jhat măk bai snăk, đa đa arăng mdjiê, đa đa arăng pơ̆ng ti kyâo bi kal, đa đa arăng čăm biêng, arăng hiu duah mă êla mâo. Êrah amâo mâo klei soh phung djiê kyua klei đăo srăng đoh tar lăn, leh anăn kyua klei ngă jhat kơ phung đăo kơ Khua Yang Yêsu mphŭn mơ̆ng mnuih Yuđa kyua anăn diñu klam kơ klei ngă tuh êrah phung kpă ênô.
Khua Yang Yêsu mñă wĭt mơ̆ng ênuk Y-Aƀel truh kơ ênuk Khua pô hưn êlâo Y-Sakari, Khua pô hưn êlâo knhal tuč hlăm Hdruôm Hră Klei Bi Mguôp Hđăp, jing pô arăng mdjiê leh “ti plah wah adŭ doh jăk leh anăn knưl ngă yang” (êlan 35), brei ƀuh bruă ngă jhat kơ phung đăo kơ Krist amâo djŏ jing bruă ngă mrâo mâo mơ̆ng mnuih Yuđa ôh, ƀiădah hlăm ênuk leh êgao lu blư̆ snăk diñu ngă jhat kơ phung Khua pô hưn êlâo Aê Diê. Khua Yang klah čŭn kơ klei bi kmhal Ñu srăng ngă hlăm djuê ana Yuđa: “Sĭt nik kâo lač kơ diih, jih jang klei anăn srăng truh kơ phung găp djuê ênuk anei”. Klei Khua Yang Yêsu hưn êlâo truh leh sĭt hlăm thŭn 70 Êdei klei kkiêng kơ Khua Yang.
Phung đăo hruê anei ăt tuôm hŏng klei bi kdơ̆ng, arăng ngă jhat tơdah hưn klei đăo pô kơ Aê Diê. Khua Yang Yêsu tuôm hưn brei phung khua ƀĭng kna răng: “Hdơr bĕ klei kâo lač leh kơ diih, ‘Sa čô dĭng buăl amâo jing prŏng hĭn kơ khua ñu ôh.’ Tơdah diñu ngă jhat leh kơ kâo, diñu srăng ngă jhat kơ diih msĕ mơh…” (Y-Yôhan 15:20). Drei mâo mđĭ ai ktang hĭn hlăm klei đăo tơdah dlăng kơ klei bi hmô phung djiê kyua klei đăo hlăm êtuh thŭn tal êlâo. Diñu tŭ klei djiê čiăng djă pioh klei đăo. Tơdah dôk hlăm boh klei dleh dlan, arăng ngă jhat drei thâo pô amâo dôk hjăn păn ôh kyua hlei pô đăo kơ Khua Yang ăt srăng tŭ klei dleh dlan, arăng ngă jhat msĕ si Khua ƀĭng kna Y-Pêtrôs mtô leh: “Bi kdơ̆ng bĕ hŏng ñu djă kjăp klei đăo, kyuadah diih thâo leh Aê Diê brei klei knap mñai msĕ snăn truh kơ phung ayŏng adei diih tar ƀar lăn ala” (I Y-Pêtrôs 5:9). Drei ăt thâo mơh Aê Diê bi sĭt klei khua pô hưn êlâo kơ phung Yuđa si ngă snăn ăt srăng bi sĭt klei khua pô hưn êlâo hưn kơ klei phat kđi jih jang anak mnuih snăn mơh, “ƀiădah hŏng klei blŭ anăn mơh phung adiê leh anăn lăn ala ară anei Aê Diê pioh kơ pui bi rai ti hruê phat kđi leh anăn klei bi rai phung amâo mpŭ kơ Aê Diê ôh” (II Y-Pêtrôs 3:7).
Drei čiăng knhal tuč pô srăng bi tuôm hŏng Khua Yang amâodah tŭ klei Ñu bi kmhal? Brei drei ksiêm mĭn leh anăn bi mklă mtam!
Wah lač: Ơ Khua Yang khăp hơiêng, bi mni kơ Khua Yang kyua kâo kral Ih, akâo kơ Ih thiăm ai ktang kơ kâo dưi tŭ klei dleh dlan, klei arăng ngă jhat leh anăn dôk kjăp hlăm klei đăo čiăng tui hlue Khua Yang truh knhal tuč. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 81-82
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
