Klei Aê Diê Blŭ: Y-Luk 14:34-35
Êlan kliăng: “Hra jing mnơ̆ng jăk, ƀiădah tơdah hra luč hĕ klei msĭn ñu, hŏng arăng srăng lŏ bi msĭn ñu lĕ? Ñu amâo lŏ yuôm kơ lăn ôh, kăn lŏ yuôm kơ anôk mkăm eh êmô rei. Arăng tuh hĕ ñu kơ tač. Hlei pô mâo knga dưi hmư̆, brei ñu hmư̆ bĕ.” (Y-Luk 14:34-35)
Klei êmuh ksiêm mĭn: Hŏng ya mta bi msĕ kơ pô tui hlue Khua Yang mkrah dưh? Ya boh jhat kơ mnuih mâo klei đăo msĕ snăn srăng tlă anăp? Ya klei lông dlăng kơ diih, ƀuh êjai tui hlue Khua Yang?
“Hra jing mnơ̆ng jăk” kyua dưi yua kơ lu mta bruă msĕ si mgang kơ klei brŭ rai, bi ƀăt kơ mnơ̆ng ƀơ̆ng… ƀiădah brei hra ăt dôk klei msĭn. Tơdah “hra luč hĕ klei msĭn ñu” snăn wăt yua “kơ lăn” pioh bi mdjiê rơ̆k, amâodah “kơ anôk mkăm eh êmô, ăt kăn lŏ yuôm rei.”
“…tơdah hra luč hĕ klei msĭn ñu, hŏng arăng srăng lŏ bi msĭn ñu lĕ?” Amâo lŏ mâo êlan mkăn ôh! Blŭ djŏ hĭn, hra amâo luč klei msĭn ñu ôh. Hra ƀơ̆ng jing Sodium Chloride (NaCl), mâo dŭm mta bi đuôm mbĭt kjăp rơ̆ng, dleh bi ktlaih, kyuanăn hra dleh snăk luč klei msĭn ñu. Tơdah êmuh si klei ngă hŏng hra luč klei msĭn ñu, sa čô Rabi wĭt lač snei: “Ba bi mđam ñu hŏng sôk aseh dliê!” Sa mta drei aseh dliê bi lŭk djuê aseh ana hŏng aseh dliê knô, aseh dliê anei amâo thâo lŏ mđai ôh kyuanăn amâo mâo sôk ôh.
Rabi anei čiăng lač klei êmuh anăn jing mluk, hra luč leh klei msĭn ya bruă lŏ dưi ngă! Snăn ya jing klei Khua Yang čiăng mtô? Hra amâo dưi luč ôh klei msĭn ñu, hra luč klei msĭn jing klei amâo tuôm mâo ôh, msĕ snăn mơh, amâo mâo ôh pô jing ƀĭng kna Khua Yang Yêsu ƀiădah amâo hơô ôh knuih Khua Yang, amâo khăp kơ Ñu hĭn kơ jih jang klei, amâo tŭ klei knap mñai kyua Ñu. Blŭ mdê, amâo mâo sa čô mă tŭ Khua Yang Yêsu jing pô bi mtlaih ƀiădah amâo tŭ ôh Ñu jing Aê Diê Khua Yang. Mnuih msĕ snăn jing pô tui hlue Khua Yang mkrah dưh, djŏ hĭn jing pô anei amâo jing ƀĭng kna sĭt kơ Khua Yang Yêsu ôh, bruă diñu tui hlue Khua Yang jing hơăi mang amâo tŭ dưn ôh.
“Phung lu nao mbĭt hŏng Yêsu…” (Y-Luk 14:25), ƀiădah mâo dŭm čô hlăm phung diñu jing ƀĭng kna Ñu sĭt? Dŭm čô srăng lui Khua Yang Yêsu hlăk Ñu klam kyâo bi kal ti êlan đĭ nao kơ čư̆ Gôlgôtha? Snăn, nao mbĭt hŏng Khua Yang ăt ka sĭt jing ƀĭng kna Ñu ôh; msĕ snăn mơh, ngă bruă klei bhiăn klei đăo, tơl wăt mâo ai tiê hur har kơ klei đăo ăt ka sĭt jing ƀĭng kna Khua Yang Yêsu mơh. Klei thâo săng čhuai kơ klei tui hlue Khua Yang srăng atăt phung đăo truh kơ boh tŭ jhat msĕ si klei phung lăn ala tlao mưč, lui wir krah wah êlan, phĭ ai tiê hlăm klei kkuh mpŭ leh anăn mă bruă, ngă bi êdu ai pô wăt kơ pô mkăn.
Klei lông dlăng kơ phung đăo sĭt kơ Khua Yang Yêsu leh anăn mâo klei lŏ kkiêng mrâo jing, wăt tơdah ăt dôk hdĭp hlăm klei bi blah čiăng đup gưt kluôm dhuôm kơ Khua Yang Yêsu, ƀiădah bruă đup gưt kơ Khua Yang kluôm dhuôm leh anăn klei hngah kơ ñu pô jing klei diñu thâo săng nanao, jing klei diñu êpa mhao, leh anăn jing knhuang êbat nao phă anăp hlăm klei hdĭp diñu nanao.
Si ngă drei hlăk dôk hlăm knhuang hngah kơ drei pô čiăng tui hlue Khua Yang mơ̆?
Wah lač: Ơ Khua Yang, kâo myơr klei hdĭp kâo kơ Ih. Akâo Ih yua kâo tui si klei Ih čiăng. Mtô mjuăt, ƀư̆ mkra kâo, brei kâo đup gưt kơ Khua Yang kluôm dhuôm, grăp hruê hngah kơ kâo pô leh anăn hmiêt mkăp tŭ klei knap mñai kyua Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mphŭn Dơ̆ng 5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
