Klei Aê Diê Blŭ: Klei Bi Hriêng 20:10-12
Êlan kliăng: “Yêhôwa dôk hlăm sang yang doh jăk Ñu, jhưng mtao Yêhôwa dôk hlăm adiê; ală Ñu dlăng, pŭk ală Ñu ksiêm phung anak mnuih.” (Klei Mmuñ Hđăp 11:4).
Klei êmuh ksiêm mĭn: Ya klei Aê Diê mtô kơ klei mkă boh ktrŏ soh leh anăn boh dlông soh čiăng lač? Ya jing boh jhat mơ̆ng jih jang bruă ngă hŏng klei ai ngăm? Ya ngă anak mnuih amâo dưi mdăp hŏng Aê Diê ôh? Ya klei ih akâo kơ Khua Yang bi mlih čiăng kơ klei hdĭp ih ƀrư̆ hruê jing msĕ si Khua Yang hĭn?
Aê Diê thâo jih jang mnơ̆ng, mơ̆ng klei ngă hlŏng kơ klei mĭn êlam hgăm anak mnuih. Anak mnuih yua klei mnêč bi mplư hdơ̆ng găp ƀiădah amâo dưi mdăp hŏng Aê Diê ôh. Mnuih blei mnia jhat ƀai yua dua boh knăng, sa boh knăng êbeh pioh blei, sa boh knăng kƀah pioh čhĭ. Mnuih blei mnia hŏng klei luar ăt yua mnơ̆ng mkă mơh kăp mplư arăng, čiăng duah klei tŭ dưn kơ ñu pô (êlan 10). Jih jang klei mnuih ƀai ngă dưi mdăp hŏng mnuih ƀiădah amâo dưi mdăp hŏng Aê Diê ôh. Jih jang bruă ngă hŏng klei jhat ƀai anăn jing klei “Yêhôwa bi êmut kheh” (êlan 10, dlăng Klei Mtô Mñă Klei Bhiăn 24:14-16). Tơdah dlăng kơ bruă phung hđeh ngă, amĭ ama, aduôn aê amâo djŏ knŏng thâo mă si klei gơ̆ mĭn ôh ƀiădah wăt thâo mơh si knuih gơ̆ jing. Yêhôwa hrih mjing anak mnuih drei, sĭt nik Ñu thâo jih si klei drei mĭn, ya klei drei ngă. Aê Diê mjing dua nah knga pioh kơ drei hmư̆, dua nah ală pioh dlăng, ƀăng êgei pioh blŭ…, kyuanăn ya klei drei hmư̆, ya klei drei blŭ si ngă Aê Diê amâo thâo? Jih jang klei mĭn, klei anak mnuih ngă Aê Diê thâo sơăi: “ală Ñu dlăng, pŭk ală Ñu ksiêm phung anak mnuih” (Klei Mmuñ Hđăp 11:4).
Knuih anak mnuih jing knuih soh kyuanăn mơ̆ng phung hđeh hlŏng kơ mnuih khua khăng mâo klei ngă mgưt ti êngao čiăng mdăp klei soh jhat hlăm ai tiê. Knư̆ klei hdĭp mlih mrâo, klei knhâo đĭ kyar, klei mnêč knư̆ hgăm êjai, leh anăn knư̆ mdăp klei soh hŏng klei mbruă. Lu êpul hgŭm, sang blei mnia kyua khăp kơ klei ƀơ̆ng đĭ snăn diñu yua lu mnêč ngă klei mplư. Mâo lu mnuih knŏng blŭ mkrah klei sĭt mplư pô dôk hmư̆ čiăng kơ digơ̆ amâo ƀuh ôh klei diñu luar. Mâo lu mnuih kyua khăp kơ prăk snăn bi luč ai tiê kpă diñu, dlăng kơ klei ênuah ênô jing hơăi mang. Jih jang klei jhat ƀai anăn jing klei “Yêhôwa bi êmut kheh” sơăi. Brei grăp čô phung đăo hdĭp bi êdah klei doh jăk, kpă ênô Aê Diê. Êbat tui si Yang Mngăt Jăk, lui hĕ klei hdĭp ngă tui si klei kđeh čiăng, leh anăn pơ̆ng kđeh mbĭt hŏng klei ñu tluh ti kyâo bi kal (Galati 5:16-25).
Tơdah Aê Diê mtă kơ phung ƀuôn sang Ñu răng brei thâo bi kah klei jăk hŏng klei jhat, Aê Diê khăng lač: “Hlei pô mâo knga, hmư̆ bĕ”. Khăp hmư̆ bĕ Klei Aê Diê Blŭ, hdĭp kpă knô tui si si klei Ñu bi hriăm čiăng bi êdah klei mngač Ñu kơ jih jang mnuih. Akâo kơ Yang Mngăt Jăk đru grăp čô drei thâo bi êmut kơ klei soh, kmhal mtam tơdah ngă soh čiăng mâo klei pap brei, dôk dơ̆ng ƀơ̆ng huă bi êdah knuih doh jăk, kpă ênô Aê Diê čiăng dưi mă tŭ klei jăk mơak Ñu brei.
Mâo mơ̆ klei mĭn, bruă ngă soh drei dôk mdăp hŏng Aê Diê leh anăn hŏng mnuih?
Wah lač: Ơ Khua Yang, pap brei kơ kâo đa kyuadah mâo lu klei amâo djŏ kâo ngă leh čiăng mdăp hŏng Ih leh anăn hŏng jih jang mnuih. Akâo Khua Yang đru kâo hdĭp klei hdĭp huĭ mpŭ kơ Ih hŏng klei bi êdah knuih doh jăk, kpă ênô Ih.
Dlăng Klei Aê Diê Blŭ hlăm tlâo thŭn: Y‑Luk 22:66-23:25
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
