Klei Aê Diê Blŭ: Klei Čŏk Hia 5:1-19
Êlan kliăng: “Ƀiădah Ih, Ơ Yêhôwa, kiă kriê nanao hlŏng lar; jhưng mtao Ih ăt dôk nanao hlăm jih jang ênuk” (Klei Čŏk Hia 5:19)
Klei êmuh ksiêm mĭn: Si phung ƀuôn sang Aê Diê tŭ klei jing mnă myơr leh klei rŭng răng pô kơ Aê Diê? Ya klei diñu ƀuh srăng bi mlih leh anăn ya klei srăng dôk hlŏng lar čiăng knang? Si klei mđĭ ai drei leh hriăm kơ klei hriăm anei?
Kdrêč knhal tuč hră Klei Čŏk Hia dưi čih msĕ si klei wah lač mơ̆ng phung ƀuôn sang tŭ klei jing mnă myơr kơ Aê Diê ai tiê diñu. Mâo klei phung ƀuôn sang Aê Diê ruah bi mĭn srăng dôk kjăp nanao, pưk sang pô, ngăn drăp ala čar, êa jua mâo nanao… Ƀiădah leh mâo klei truh, ngăn drăp dôk hlăm kngan phung tue, pưk sang arăng mă jih, čiăng mâo êa mnăm nao blei, găp djuê djiê ngă kơ phung adôk hdĭp kƀah klei răng mgang, kriê dlăng, dĭng buăl bi kdơ̆ng jing pô kiă kriê; klei ư̆ êpa ngă kơ kđeh asăr hlơr msĕ si pui, leh anăn čiăng mâo mnơ̆ng ƀơ̆ng huă brei săn asei hŏng klei huĭ hyưt mơ̆ng đao gưm; phung ƀuôn sang mơ̆ng hđeh truh kơ mduôn, wăt phung êkei mniê lĕ hlăm boh klei ênguôt hnĭng…
Klei hdĭp grăp hruê phung ƀuôn sang Aê Diê êlâo dih jing klei jăk mơak leh anăn hruê jih hruê diñu amâo đei mđing ôh, ară anei lĕ hlăm klei knap mñai anei, ya klei jăk siam anăn jing hĕ kbưi snăk. Hlăm ai tiê ênguôt hnĭng, klei wah lač lŏ dơ̆ng bi êdah phung ƀuôn sang êlâo dih mâo Aê Diê khăp msĕ si mah, ară anei luč hĕ klei mpŭ plah wah dŭm ala čar, msĕ si đuôn mtao ti kŏ diñu lĕ leh. Čư̆ Siôn, anôk Yêhôwa dôk ăt jing ênguôl leh, phung asâo tan êrô hiu tinăn.
Hlăm klei wah lač hur har, phung ƀuôn sang Aê Diê ăt jih ai tiê hưn klei soh hŏng Aê Diê, diñu thâo phung aê diñu leh anăn diñu pô yơh ngă soh leh hŏng Aê Diê (êlan 6-7, 16). Khădah snăn, ti krah klei knap mñai anăn, pô čih hră bi atăt klei mĭn kơ sa bruă mkăn, anăn jing bi mni kơ dôk hlŏng lar, amâo bi mlih ôh mơ̆ng Yêhôwa leh anăn Jhưng Mtao Ñu (êlan 19). Anei jing tur kơ phung ƀuôn sang Israel đăo knang, boh nik hlăm boh klei ênguôt hnĭng diñu dôk găn. Êlâo dih tơdah lĕ hlăm klei truh, rŭng răng, diñu knang leh kơ Êjip, Asiri (êlan 6), ară anei diñu thâo kral Aê Diê jing phŭn mkăp sa anăn kyua knŏng Ñu yơh jing Pô dôk nanao hlăm jih jang ênuk.
Ala ƀuôn drei dôk hdĭp hruê anei ăt bŏ hŏng klei bi mlih ngă kơ anak mnuih ƀuh nanao klei rŭng răng, amâo êđăp ênang. Klei yuôm bhăn jing hlei pô mâo klei đăo hlăm Khua Yang Yêsu ăt srăng hdĭp hlăm lăn ala anăn mơh ƀiădah mâo klei êđăp ênang yuôm bhăn. Mta phŭn jing kyua drei dưm klei đăo pô hlăm Pô Amâo Bi Mlih. Hƀuê ênuk mâo klei bi mlih, djăp mta mnơ̆ng bi mlih, ƀiădah klei sĭt suôr Aê Diê ăt adôk snăn. Akâo kơ Aê Diê đru drei păn kjăp nanao klei đăo pô hlăm Pô “hruê mbruê, hruê anei, leh anăn truh hlăm jih jang ênuk amâo bi mlih ôh” (Hêbrơ 13:8).
Drei duah ƀuh leh klei êđăp ênang hlăm mngăt pô leh mơ̆ amâodah ka?
Wah lač: Ơ Aê Diê Pô Sĭt Suôr! Kâo hơêč hmưi bi mni Ih kyua Ih dôk hlăm jih jang ênuk, Jhưng Mtao Ih adôk mơ̆ng ênuk anei truh ênuk êdei. Akâo kơ Ih đru kâo kjăp ai tiê knang kơ Ih čiăng amâo mâo kpư̆ mgei, wăt tơdah jih jang mnơ̆ng jŭm dar kâo bi mlih grăp hruê. Kâo wah lač hlăm anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Rôm 15
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
