Nkauj Quaj Ntsuag 5:1-19
Nqe cim:
“Tiamsis tus TSWV, koj yog tus vajntxwv uas nyob mus ibtxhis thiab yuav tswj teb kav chaw mus txog thaum lub sijhawm kawg!” (Nkauj Quaj Ntsuag 5:19)
Lug nug rau sawvdaws xav:
– Tus Tswv haivneeg uas raug poob ua cev qhev tau qhia lawv tej kev nyuaj siab rau tus Tswv zoo licas?
– Lawv zeem paub yam dabtsi yuav pauv hloov thiab yam dabtsi yuav nyob mus ibtxhis kom tau chaw vamkhom?
– Kawm tau qhov no txhawb peb lub zog licas?
Tshooj kawg ntawm phau Nkauj Quaj Ntsuag tau sau tseg zoo li tej lus taij thov Vajtswv ntawm cov neeg raug poob ua cev qhev, lawv qhia lawv tej kev nyuaj siab rau tus Tswv. Muaj tej yam uas tus Tswv haivneeg xav hais tias yuav nyob ruaj khov xws li: tej vajtse, tej liaj teb, tej dej,… Tiamsis thaum raug teebmeem, lawv tej liaj tej teb poob rau lwm haivneeg tes, lawv tej vajtse raug lwm haivneeg nyob, yuav haus dej lawv yuav tsum them nyiaj muas, lawv cov txheeb ze tuag tas ua rau lawv tsis muaj neeg saibxyuas, tiv thaiv; lawv raug cov neeg uas twb tsim txiaj tsis npaum li cov qhev tuaj tswjhwm; kev tshaib plab ua rau lawv ua npaws ibce kub lug ib yam li lub qhovcub; thiab xav tau zaub mov noj, lawv yuav tsum pheej hmoo tuav siav rawv mus nrhiav; cov pejxeem txij tus hluas mus rau tus laus, txiv neej mus rau pojniam puavleej quaj ntsuag,…
Thaum ub tus Tswv haivneeg lubneej txhua hnub yog yam yooj yim xwb, thiab hnub dhau hnub lawv tsis quavntsej txog tej ntawd, tiamsis nimno ntsib teebmeem, tej yam yooj yim ntawd ho nyob deb ncav tsis cuag. Nyob hauv kev tu siab, lawv thov Vajtswv txuas ntxiv hais tias thaum ub lawv yog haivneeg tau tus Tswv saib muaj nqis li nyiaj kub, tiamsis nimno lawv raug saib tsis taus hauv tej tebchaws, zoo li lub kaus mom kub uas nyob saum lawv lub taubhau raug hle lawm. Lub roob Xi-oos, qhov chaw tus Tswv nyob raug ua suabpuam, thiab hma los khawb los ntaug ua rau puastsuaj tas.
Nyob hauv kev taij thov kawg siab kawg ntsws, tus Tswv haivneeg kuj tas siab lees txim rau Vajtswv, lawv zeem paub hais tias lawv tej yawgkoob thiab lawv tus kheej tau ua txhaum rau tus Tswv lawm (nqe 6-7, 16). Tiamsis, thaum raug tej ntawd, tus sau ho hloov kev xav mus rau lwm yam, ntawd yog kev qhuas txog tus Tswv yog tus Vajntxwv nyob mus ibtxhis, tsis kawg (nqe 19). Qhov no yog lub plag rau tus Tswv haivneeg Yixalayees txojkev vamkhom, tshwjxeeb yog nyob rau lub tsamthawj quaj ntsuag uas lawv tabtom ntsib. Yav nram ntej thaum ntsib kev tws, kev txhawj ntshai, lawv cia siab rau tebchaws Iziv thiab Axilias (nqe 6), tiamsis nimno lawv zeem paub hais tias tus Tswv thiaj yog tus pub rau lawv muaj muaj txaus txhua yam vim Nws yog tus nyob mus tsis kawg.
Peb nyob rau tiam neej uas muaj ntau yam kev pauv hloov txhua hnub, ua rau tibneeg hnov tsis qab siab, txhawj ntshai. Qhov uas xav tsis thoob yog cov neeg uas muaj kev ntseeg ruaj khov rau ntawm Tswv Yexus yeej tseem muaj txojkev kaj siab kawg nkaus. Vimchiv yog peb muab tus kheej txojkev ntseeg txawb rau ntawm Tus Uas Tsis Pauv Hloov. Keebkwm tibneeg nce nqis, txhua yam pauv hloov, tiamsis Vajtswv txojkev ncaj ncees yeej tseem zoo li qub. Thov tus Tswv pub rau peb muab txojkev ntseeg tso rau ntawm “Yexus Khetos, nws yeej zoo nws li qub; nag hmo thiab hnub no nws zoo li cas, nws yeej zoo li ntawd mus ibtxhis li” (Henplais 13:8).
Thov Vajtswv,
Vajtswv tus uas ncaj ncees! Nyuam yaus qhuas Koj vim Koj yog tus muaj sia zees nyob thiab tswjkav txhua yam mus ibtxhis. Thov pab nyuam yaus cia siab ruaj khov rau ntawm Koj, kom xwv nyuam yaus tsis qaij qaug, txawm yog txhua yam ibncig yuav pauv hloov txhua hnub. Nyuam yaus tuav Yexus Khetos lub npe thov, Amees.
Ib tsoom cov mloog uas hmov thiab tshua,
Peb puas nrhiav tau kev kaj siab rau peb tus ntsujplig lawm tau?
Nyeem Vajluskub hauv peb lub xyoos: Loos 15
Kênh Youtube BHKTHN:
