Yôhan 16:13-15
“Mă-lei lăp Yang Bơhngol ‘Lơ̆ng mă tơbăt ăn kơ iĕm tơdrong ‘Bok Kei-Dei ei truh, Sư bơtho ăn kơ iĕm tôm tơdrong ‘Bok Kei-Dei. Sư ưh kơ bơtho tơdrong Sư kơdih ôh, Sư bơtho iĕm dôm tơdrong Sư kơtơ̆ng đơ̆ng ‘Bă Inh. Sư kư̆m bơtho gah tơdrong ning-mônh mơ̆n.” (Yôhan 16:13)
Nơ̆r jet tơchĕng pơwao:
– Yua kơ kiơ Kră Yang Yêsu apinh ‘Bă ăn Yang Bơhngol ‘Lơ̆ng kơ kon pơlei Sư?
– Tơdrong jang Yang Bơhngol ‘Lơ̆ng noh kiơ?
– Yang Bơhngol ‘Lơ̆ng jur đei ‘bơm thoi yơ lăm chăl arih bơ̆n kiơ̆ Kră Yang?
Lu bơngai Juđê băt tơpă lu sư ưh kơ gơh yak hlôi đơ̆ng char glă Sinai să thoi noh dah ưh kơ đei bơngai băt kơ trong na chông anhăk lu sư. Kư̆m thoi noh mơ̆n, Kră Yang Yêsu băt adrol lu bơngai pơhrăm păng Sư gô sơ’ngon, păng jrok dah ưh kơ đei Kră Yang oei hơdai. Kơlih kơ thoi noh, Kră Yang krao apinh ‘Bok Kei-Dei ‘Bă ăn minh ‘nu ‘Bok Dŏng Mơnat anăn Sư Yang Bơhngol ‘Lơ̆ng jur tơ iĕm na pơlung kon pơlei Sư wă kơ tơgŭm lu sư. Yak kiơ̆ brŏk tơ pơlei ‘lơ̆ng, Kră Yang khan: “Mă-lei lăp Yang Bơhngol ‘Lơ̆ng mă tơbăt ăn kơ iĕm tơdrong ‘Bok Kei-Dei ei truh, Sư bơtho ăn kơ iĕm tôm tơdrong ‘Bok Kei-Dei. Sư ưh kơ bơtho tơdrong Sư kơdih ôh, Sư bơtho iĕm dôm tơdrong Sư kơtơ̆ng đơ̆ng ‘Bă Inh. Sư kư̆m bơtho gah tơdrong ning-mônh mơ̆n.” (trong 13 BDM). Yang Bơhngol ‘Lơ̆ng jơ̆ Yang pơtrơp chông anhăk lu bơngai pơhrăm păng bơtho lu sư tơdrong ‘Bok Kei-Dei. Tơdrong ‘nâu đei tơbăt rơđah dêh lăm Tơdrong jang 2:1-41,kơplah Yang Bơhngol ‘Lơ̆ng jur lăm Phĕt PangTơkôt. Kră Yang ăn kơ lu bơngai pơhrăm păng Sư tơdrong gơh hơgei păng nuih kơtang hlĭch dêh đơ̆ng năr băt kơ hli ưh kơ băt wă pơm thoi yơ, na lăp năr ei lu sư nuih kơtang pơm kiơ̆ nơ̆r Kră Yang tơpă. Blŭng a năm chă ră roi tơdrong Kră Yang tơdrong đei yua hloh kơ lu sư tơchĕng.
Trong 14-15 nhen thoi nơ̆r Kră Yang tơtă wă pơư anăn ‘Bok Kei-Dei, tơdrong jang Yang Bơhngol ‘Lơ̆ng ‘noh pơư anăn Yêsu, kư̆m nhen thoi Kră Yang Yêsu ling lang chu nơ̆r bơtho tơ’bôh păng jang keh kiơ̆ ‘Bok Kei-Dei ‘Bă wă (Yôhan 5:19, 30). Lei na tơdrong jang Yang Bơhngol ‘Lơ̆ng kư̆m dai pơtrơp bơtho tơ’bôh dơ̆ng, bơtho tôm tơdrong đơ̆ng Yêsu đei tơtă lê̆ bơih păng pơkeh tơdrong Kră Yang ‘Bok Kei-Dei Dŏng Pơklaih ăn kơ kon bơngai bơ̆n. ‘Bok Kei-Dei ‘Bă tơm gĭt yua kơ Kră Yang Yêsu wă pơkeh đơ̆ng ‘Bă wơh. Păng tơdrong jang Yang Bơhngol ‘Lơ̆ng bơtho dôm tơdrong kiơ đơ̆ng Kră Yang Yêsu păng đei tơ’bôh ăn kơ lu bơngai pơhrăm păng Sư.
Bơngai lui ưh kơ gơh gơnang kơ jơhngơ̆m pran kơdih lăm tơdrong pơhlŭ pơlung, yang kơnê̆ pơhlŭ. Tơ’ngla Yêsu bơih trong bơ̆n yak năm tơ tơdrong arih păng tơ’ngla Yang Bơhngol ‘Lơ̆ng bơih chông anhăk lu bơ̆n yak trong trŏ păng tơpăt sĭt.
Jơhngơ̆m pran đơ̆ng Yang Bơhngol ‘Lơ̆ng jơ̆ tơmam gĭt dêh mă Kră Yang Yêsu apinh ‘Bă Sư ‘Bok Kei-Dei ăn kơ kon pơlei Sư. Lu bơ̆n athei đĭ jơhngơ̆m lui gơnang păng krao khan wă mơ̆ng nơ̆r Yang Bơhngol ‘Lơ̆ng khan tơgŭm lu bơ̆n yak hlôi đơ̆ng tơdrong pơlong lăm teh đak ‘bĕnh tơdrong yoch, păng pơkeh tơdrong jang ră roi tơdrong dŏng pơklaih kơ rim bơngai ding truh năr Yêsu jur dơ̆ng.
Ơ Kră Yang, inh bơnê kơ Ih đei ăn Yang Bơhngol ‘Lơ̆ng Ih kơ inh. Apinh Yang Bơhngol ‘Lơ̆ng Ih pơlung inh, bơtho, păng chông anhăk inh arih lăm tơdrong ‘lơ̆ng tơpăt. Apinh Ih bơwei inh păng ăn kơ inh jơhngơ̆m pran đơ̆ng Ih wă kơ inh pơ̆n nuih ră roi Tơdrong ‘Nao ‘Lơ̆ng kơ rim bơngai. Krao khan yua anăn Kră Yang Yêsu Krist, Amen.
Lu bơ̆n pơkă wă pơm tơdrong kiơ đơ̆ng rŏng kơ phĕt ‘blŏk kơ Yang Bơhngol ‘Lơ̆ng jur?
Đŏk Sơ̆p Hla bơar ‘Bok Kei-Dei lăm pêng sơnăm: Êsai 37
Kênh Youtube BHKTHN:
