1 Kauleethaus 7:25-40
Nqe cim:
“Kuv tsis xav cia nej muaj kev nyuaj siab. Tus uas tsis yuav pojniam, nws muab siab rau ua tus Tswv tes haujlwm, rau qhov nws xav ua raws li tus Tswv lub siab nyiam” (1 Kauleethaus 7:32)
Lus nug xav:
– Vim li cas Paulus hais txog vimchiv nyob ib leeg zoo dua yuav pojniam lossis yuav txiv?
– Qhov uas saib mus rau hnub uas ze hnub kawg, Paulus qhia li cas txog nws txoj kev xav uas nyob ib leeg?
– Zaj kawm no ntuas peb yam dabtsi?
Hauv ntu Vajlugkub hnub no, timthawj Paulus hais txog cov neeg uas nyob ib leeg, cov uas tseem tsis tau yuav txij nkawm, cov uas twb sib nrauj lawm, lossis cov uas lawv tus txij nkawm twb tas sim neej lawm, thiab cov hluas uas nyob ib leeg thiab cov laus uas nyob ib leeg. Timthawj Paulus yeej tseem tuav rawv nws txoj kev xav uas nyob ib leeg mas yog ib txoj kev xaiv zoo, tsimnyog txhawb nqa. Nws hais tawm ob qhov vimchiv txog txoj kev nyob ib leeg no: Tim ib, “Vim niajhnub no muaj kev ntxhovsiab heev” (nqe 26). Tim ob, “vim peb lub sijhawm twb dhau zuj zus lawm… Rau qhov lub ntiajteb no tabtom ploj mus lawm” (nqe 29, 31). Ob lo lus no qhia pom hais tias kev xaiv nyob ib leeg yog ib txoj kev xaiv zoo vim peb tabtom nyob hauv lub caijnyoog kawg lawd.
Raws li timthawj Paulus kev saib mus ze rau hnub kawg, mas kev nyob ib leeg yog ib yam zoo, vim cov uas xaiv nyob ib leeg yuav dim ntawm “tej kev txom nyem sab nqaij tawv”, cia kom muaj txaus sijhawm los ua Vajtswv haujlwm. Hais rau lwm seem, timthawj Paulus xav hais tias, tus uas twb muaj txij nkawm lawm, mas feem xyuam rau nws tus txij nkawm zoo siab yog tej haujlwm tsimnyog yuavtsum ua. Ntxab ntxawm lub npe ua Vajtswv haujlwm es txhob txwm tsis quav ntsej pojniam menyuam yog yam uas Vajluskub tsis tau qhia ib zaug li. Vim li ntawd, lo lus hais tias: “Txij no mus cov uas twb yuav pojniam lawm, cia li ua ib yam li cov uas tsis tau yuav” (nqe 29), qhov no peb yuav tsum totaub raws li tagnrho phau Vajlugkub qhia. Yuav tsum totaub hais tias tus uas muaj txij nkawm lawm tsis txhob cia tej kev txhawjxeeb hauv lub neej no kav yus lub siab. Yus yuav tsum hlub thiab tu yus tsev neeg, tiamsis tsis tsimnyog cia qhov no txeeb tas nrho yus txoj kev xav thiab lub sijhawm rau Vajtswv tes haujlwm. Hais txog qhov no, tus uas nyob ib leeg muaj kev ywjpheej dua thiab tsis “muaj kev nyuaj siab”, yog li ntawd nws muaj sijhawm ntau dua “vim nws xav muab nws lub cev thiab lub siab fij rau tus Tswv” (nqe 32, 34). Yog li ntawd, tus neeg nyob ib leeg ua Vajtswv haujlwm nws thiaj tsis “ua neeg ywjfab ywjfwj” (nqe 35). Vim li ntawd, timthawj Paulus ntuas cov uas tseem tsis tau sib yuav thiab tsis tau coglus nrog leejtwg kom lawv nyob ib leeg li ntawd mus yog qhov zoo dua, hos cov pojntsuam lossis txiv ntsuag muaj cai xaiv yuav dua lossis tsis yuav, tiamsis Paulus txhawb kom lawv nyob ib leeg zoo dua. Kev nyob ib leeg vim lub homphiaj sab ntsujplig, mas timthawj Paulus ntaus nqis hais tias “muaj kev kaj siab dua” (nqe 40).
Hauv lub sijhawm nim no, zaj kawm no ceebtoom peb tsis txhob xav hais tias muaj txij nkawm yog qhov zoo uas vam meej, hos kev nyob ib leeg yog raug swb. Raws li Vajtswv Txojlus saib tuaj, tus uas muaj txij nkawm thiab tus uas nyob ib leeg puavleej zoo ib yam nkaus tabmeeg Vajtswv. Qhov tseemceeb, txawm peb nyob li cas los xij, peb yuav tsum muab peb lub neej fij rau Vajtswv ua ntej txhua yam, tshwjxeeb yog nyob rau lub sijhawm luv luv ntawm tej hnub kawg no.
Thov Vajtswv,
Tus Tswv, thov Koj pab nyuam yaus kom nyuam yaus tsis txhob ua rau nyuam yaus cov menyuam lossis cov phoojywg uas tseem nyob ib leeg muaj kev ntxhov siab txog kev sib yuav. Thov Koj coj lawv kom paub Koj txoj kev npaj thiab Koj lub siab nyiam rau lawv lub neej. Nyuam yaus tuav Tswv Yexus Khetos lub npe thov, Amees.
Peb puas pheej yuam peb cov menyuam sib yuav raws peb lub siab nyiam?
Nyeem Vajluskub hauv peb lub xyoos: 2 Kauleethaus 5
Kênh Youtube BHKTHN:
