Tes Haujlwm 12:1-12
Nqe cim:
“Thaum Yexus tseem nyob hauv ntiajteb no, nws thov Vajtswv tus uas pab tau kom nws dim kev ploj kev tuag. Thaum nws thov nws quaj thiab los kua muag kawg li. Vajtswv mloog nws tej lus thov, rau qhov nws txo nws lub hwjchim thiab muab nws txojsia tso plhuav rau Vajtswv kav” (Henplais 5:7)
Lus nug rau sawvdaws xav:
– Thaum timthawj Petus raug ntes mus kaw, tagnrho Pawg Ntseeg ua dab tsi? Thaum kawg zoo li cas?
– Vim li cas peb yuabtsum thov Vajtswv kawg siab ntsws thiab tsis tu ncua?
Lub sijhawm uas muaj kev thov Vajtswv kawg siab ntsws no, yog Pawg Ntseeg xubthawj uas muaj tej txujci tseemceeb nrog, cov ntseeg kev ntseeg loj hlob mus deb thiab ntws mus rau lwm haivneeg. Dab Ntxwgnyoog yeej tsis tso Pawg Ntseeg tseg thiab yog li Tswv Yexus hais ua ntej tseg lawm, “Neeg ntiajteb yuav tsimtxom nej. Tiamsis nej yuav tsum ua siab tawv, rau qhov kuv twb kovyeej lub ntiajteb no lawm” (Yauhas 16:33). Qhov tseemceeb yog ob tug neeg tseemceeb nres Pawg Ntseeg raug tsim txom: Timthawj Yakaupaus raug txiav cajdaj, timthawj Petus raug ntes mus kaw hauv tsev lojcuj. Lub sijhawm ntawd Pawg Ntseeg tsuas muaj tib txoj kev uas yuav hla dhau kev sim siab, ntawd yog “cov ntseeg kub siab lug thov Vajtswv pab Petus” (nqe 5).
Thaum Vajtswv txoj koob hmoov muaj txaus lawm, peb yeej yuav ntsib tej kev sim siab uas loj tshaj plaws, tej thaum yuav tsis pom Vajtswv ua txujci tseemceeb pab peb. Timthawj Yakaunpaus zoo li ntawd ntag. Timthawj Paulus tabtom nyob rau qib siab tshaj ntawm nws tes haujlwm tiamsis Vajtswv cia nws muaj ib tug mob, ua rau nws txom nyem ntsuav txog qib uas nws kawg siab ntsws thov Vajtswv pab ntau zaus los Vajtswv tsis tshem mus li, vim Vajtswv kev hlub muaj txaus rau nws lawm (2 Kauleethaus 12:6-10). Tej thaum Vajtswv yuav siv qee ntu sijhawm muaj kev txomnyem tsaus ntuj nti hauv peb lub neej ntseeg Vajtswv kom peb loj hlob thiab thov Vajtswv kawg siab ntsws. Hauv timthawj Petus, txawm yog tau kiag tim tswv los cawm, los nws tseem xav hais tias yog ua npau suav xwb (nqe 9)! Tiamsis dhau los ntawm Pawg Ntseeg kev thov Vajtswv kawg siab ntsws, Vajtswv ua rau tej saw hlau khi Petus tes tu thiab rau nws kev ntseeg ruaj khov tuaj.
Thaum tagnrho Pawg Ntseeg thiab cov pojniam uas nyob hauv Malis tsev koom ua ib lub siab thov Vajtswv tsis tseg tsis tu (nqe 12), ces Vajtswv ua txujci tseemceeb. Tej thaum peb thov Vajtswv pub rau peb tus kwvtij ib yam dab tsi twg, tiamsis ib lub sijhawm, hnub tom qab, athiv tom qab… peb yeej tsis nco rov qab thov Vajtswv li lawm! Tswv Yexus ua qauv rau peb thov Vajtswv thaum Nws tseeem nyob hauv ntiajteb, thaum txojsia yuav tu Nws thov Vajtswv Nws quaj thiab los kua muag kawg li (Henplais 5:7), Nws tawm hws zoo li ntshav (Lukas 22:44).
Vajtswv mloog Nws cov menyuam tej lus thov kawg siab ntsws, Nws coglus thiab yuav pub yam uas peb thov thiab paub tseeb yog yam uas peb cheemtsum tshaj plaws, muaj nqis tshaj plaws xwb, yeej tsis yog yam uas peb ntshaw tiamsis tsis zoo rau peb. Vajtswv yeej ibtxwm teb peb tej lus thov, tiamsis tej thaum Vajtswv tsis teb raws li peb ntshaw peb thiaj zeem tsis tawm xwb. Yog li ntawd cia li thov Vajtswv kawg siab ntsws thiab thov Vajtswv tsis tu ncua.
Thov Vajtswv,
Vajtswv, thov pab nyuam yaus muaj kev sib txuas nrog Koj txhua lub sijhawm thiab thov Vajtswv kawg siab ntsws thaum muaj kev txomnyem. Thov pab nyuam yaus ruaj siab hais tias Vajtswv Koj yeej yuav pub yam uas zoo kawg nkaus raws li koj lub siab nyiam rau nyuam yaus. . Nyuam yaus tuav Tswv Yexus Khetos lub npe thov. Amees.
Peb puas thov Vajtswv kawg siab ntsws thaum ntsib kev sim siab thiab kev txomnyem?
Nyeem Vajluskub hauv peb lub xyoos: Yaxayas 38-39
Kênh Youtube BHKTHN:
