1 Kauleethaus 7:17-24
Nqe cim:
“Txhua tus nyias yuav tsum ua nyias lub neej raws li tus Tswv twb pub rau nws lawm, thiab ua raws li thaum Vajtswv hu nws los. Kuv yeej qhia txoj kevcai no rau txhua pawg ntseeg” (1Kauleethaus 7:17)
Lus nug xav:
– Txoj kab kev ua neej raws li tus Tswv pub thiab raws li Nws tau hu tau timthawj Paulus muab pivtxwv los ntawm tej teebmeem twg?
– Paulus tej lus ntuas pab tiv thaiv tau cov ua qhev li cas?
– Peb siv zaj kawm no li cas hauv peb lub neej?
Timthawj Paulus hais sau zog txog ib qho teebmeem uas yog cov ntseeg yuavtsum ncajncees rau tus Tswv hauv yus lub neej tamsim no, tsis txhob kub siab nrhiav kev hloov pauv tej yam sab nraud xwb. Nws hais tias: “Txhua tus nyias yuav tsum ua nyias lub neej raws li tus Tswv twb pub rau nws lawm, thiab ua raws li thaum Vajtswv hu nws los (nqe 17). Paulus hais tawm ob yam meej tseeb.
Tim ib, ua kevcai txiav lossis tsis ua tsis tseemceeb npaum li kev ceev coj raws li Vajtswv tej lus. Tus uas twb ua kevcai txiav ua ntej los ntseeg lawm ces “tsis txhob rhuav qhov uas nws ua kevcai txiav ntawd”, thiab tus uas tsis tau ua kevcai txiav “tsis tas nws yuav ua kevcai txiav lawm” (nqe 18–19). Tim ob yog hais txog qhov teebmeem hauv lub tebchaws. Nyob rau tiam ntawd, tibneeg raug faib cais ua ntau qib, thiab txhua qib ntawd nyias muaj nyias meej mom feeb meej. Timthawj Paulus lo lus ntuas yog “Txhua tus nyias yuav tsum ua nyias lub neej raws li thaum Vajtswv hu nws los ntseeg”(nqe 20). Qhov no tej zaum yoojyim rau cov tswv qhev uas npluanuj thiab cov neeg ua neej ywjpheej coj raws. Txawm li ntawd los, cov qhev uas raug saib hais tias yog neeg poob qis, ntau tsawg tau cia siab hais tias thaum los ntseeg tus Tswv lawm, yus lub neej yuav tau hloov pauv leej lub meej mom sab nqaj tawv. Timthawj Paulus xav hais rau lawv hais tias Vajtswv muaj homphiaj sib txawv thiab pub tshwjxeeb rau txhua tus neeg.
Timthawj Paulus tsis yog txhawb rau txoj kev ua qhev, rau txoj kev uas tsis tsum hloov pauv lub neej thaum uas nws ntuas cov ua qhev hais tias “tsis txhob nyuaj siab” nyob hauv lub meejmom ua qhev, vim nws kuj tau hais tias “Yog koj muaj kev tawm tau los nyob ywjpheej koj cia li tawm” (nqe 21). Tsis tas li ntawd, ib lub tebchaws uas cov qhev khiav yuav ntsib ntau yam kev nyuaj thiab kev phomsij txog txojsia, thaum uas paub hais tias lub tebchaws kev coj noj coj ua tseem tsis tau npaj txhij rau kev hloov pauv, mas Paulus tej lus ntuas yog los tiv thaiv cov qhev. Yog muaj sijhawm tau kev ywjpheej ces cia li siv lub sijhawm ntawd; tiamsis tsis txhob cia tus kheej raug qaug zog vim ntshaw kom muaj kev hloov pauv lub meej mom sab nraud.
Ntau zaus peb tsis nyiam thiab tsis txaus siab rau lub neej tamsim no, rau yus haivneeg, lossis lub meejmom ntawm koom zeej (xã hội) uas yus muaj, thiaj ua rau peb tsis kam ua Vajtswv haujlwm. Zaj kawm no qhia peb hais tias txawm peb yog ib tug neeg ua zog noj, neeg ua liaj ua teb, lossis ua thawjcoj; txawm kawm ntawv siab lossis kawm tsawg; nplua nuj lossis pluag los xij, Vajtswv yeej saib peb txhua tus muaj nqis sib luag. Kev ntseeg Tswv Yexus tsis tau txhais hais tias peb yuav tsum hloov pauv peb lub meejmom ntawm koom zeej (xã hội), hloov haulwm ces thiaj muaj nqis. Peb yuav tsum paub hais tias lub meejmom tau ua Vajtswv menyuam yog txoj koob hmoov uas muaj nqis tshaj lawm, kom peb txaus siab rau txoj kev sib raug zoo nrog Vajtswv thiab mloog Nws lus.
Thov Vajtswv,
Tus Tswv, ua tsaug rau qhov Koj tau xaiv, cawm nyuam yaus, thiab pub nyuam yaus muaj feem ua haujlwm rau Koj. Thov pab kom nyuam yaus txaus siab rau yam uas yuav ua rau Koj zoo siab, tsis yog nrhiav kev hloov tej uas Koj twb pub rau nyuam yaus lawm. Nyuam yaus tuav Tswv Yexus Khetos lub npe thov, Amees.
Peb tabtom ua Vajtswv tes haujlwm kawg siab kawg ntsws li cas hauv qhov chaw uas Vajtswv tau muab tso rau peb?
Nyeem Vajluskub hauv peb lub xyoos: 2 Kauleethaus 4
Kênh Youtube BHKTHN:
