Mathiơ 26:1-13
“Inh khan kơ iĕm tơpă, jơ̆p-jang kơ teh đak, lu bơngai bơtho tơdrong ‘nao ‘lơ̆ng, lu sư gô roi tơdrong duch noh pơm kơ Inh, wă kơ đe ư-ang kơ tơdrong sư pơm.” (Mathiơ 26:13)
Nơ̆r jet tơchĕng pơwao:
– Lu jơ̆ng ‘bang păng lu kră pơgơ̆r tơdrong lui đe Juđê tơwih kơ Kră Yang Yêsu thoi yơ?
– Tơdrong mă yă Mari hlôi pơm ăn kơ Kră Yang Yêsu noh đei tơdrong gĭt yua kiơ?
– Bơ̆n pơhrăm rok kiơ̆ kơmĭl yă Mari thoi yơ?
Đei tơdrong ‘nâu hei ‘bar năr adrol kơ kon pơlei Juđê pơm Giĕng Năm Brih, na ‘nâu đe hơ’mon tơdrong ‘noh. Kră Yang Yêsu roi ăn kơ lu jơ̆ng ‘bang pă mĭnh wơ̆t dơ̆ng gah tơdrong Sư lôch, Sư roi thoi âu: “Iĕm băt mơ̆n oei pă ‘bar năr truh kơ năr đe pơm Giĕng Năm Brih. Na đe wă rôp jao Inh Kon Bơngai ăn kơ đe pơ̆ng pơlôch tơ ‘long pơglang” (trong 2). Hla Bơar ‘Bok Kei-Dei ưh kơ roi ăn kơ bơ̆n băt lu jơ̆ng ‘bang đei pơma tơdrong kiơ, mă-lei lu ‘bok soi tơm păng lu kră pơgơ̆r noh lu sư pơ đâu chă đon “wă rôp pơlôch Kră Yang Yêsu”, mă khan lei ră, lu sư tam mă pơ̆n pơm kơplah năr đe pơm Phĕt yua kơ lu sư hli kon pơlei blah lu sư (trong 4, 5).
Kơplah lu bơngai pơgơ̆r tơdrong lui đe Juđê đei jơhngơ̆m ‘maih pơm kơnê̆ thoi noh, na lăm pơlei ‘Bethani, đei minh ‘nu drŏ-kăn anăn sư Mari, sư hlôi tơ’bôh rơđah chăl arih pơm kơmĭl gah tơdrong sư ‘mêm kơ Kră Yang, gah tơdrong awih awăn kơ Kră Yang. Bơ̆n lăng pơting hăm Hla bơar Markôs 14:3-9; păng Yôhan 12:1-8, bơ̆n băt bơngai drŏ-kăn ‘nâu anăn sư yă Mari, oh yă Mathê hăm ‘bok Lasarơ. Yă Mari hlôi pơyơ̆r ăn Kră Yang minh gŏl đak pơgang ‘bâu phu gĭt tơpă, sư pơyơ̆r kơ Kră Yang đak pơgang ‘bâu phu noh pơyơ̆r đĭ hloi tơmam sư đei. Yă Mari ‘nâu sư juăt kơ ngôi ‘bơ̆t jơ̆ng Kră Yang mơ̆ng Nơ̆r Kră Yang bơtho (Luka 10:42). Sư hlôh dôm nơ̆r Kră Yang bơtho ‘bơ̆t sư juăt kơ mơ̆ng brei mơsơ̆ noh bơih lei na sư băt kơnăl jơ ‘nâu trŏ kơ sư kơkuh ư-ang kơ Kră Yang, tơdah sư ưh kơ yua iŏk jơ trŏ lăp kơkuh ư-ang kơ Kră Yang ‘nâu lei jơ năr trŏ lăp noh gô hlôi, ưh pă tam bơih.
Đơ̆ng tơdrong yă Mari tuh đak pơgang tơ kơ̆l Kră Yang noh sư khan Kră Yang Pơtao pơgơ̆r chăl arih sư, na tơdrong yă Mari jang kơ Kră Yang hăm đak pơgang ‘bâu phu noh sư ưh kơ pik đĕch ôh, sư tuh pơđĭ hloi đơ̆ng gŏl đak pơgang ‘bâu phu mă gĭt kăp dêh noh. Sư tơ’bôh jơhngơ̆m pơyơ̆r đĭ kơ Kră Yang Pơtao pơgơ̆r chăl arih sư. Yă Mari âu mă khan bơngai jum dăr chrih hil kơ sư khan: “Pơgang ‘bâu phu noh kăp jên dêh, lơliơ sư ưh kơ wă tĕch chă jên asong kơ lu bơngai dơnuh.” (trong 9), Mă-lei Kră Yang Yêsu bơnê pơ-ư kơ sư thoi thoi âu: “Yua kơ kiơ iĕm ơh kơ tơdrong sư pơm kơ Inh noh? Sư pơm thoi noh trŏ boih”. “Sư tuh đak pơgang ‘bâu phu tơ akâu Inh hơdrol kơ đe wă ‘bŭ Inh, thoi đe juăt kơ pơm hơdrol kơ ‘bŭ bơngai lôch (trong 12), na Kră Yang Yêsu pơma tơpăt khan yă Mari gô jing bơngai pơm kơmĭl ăn kơ đĭ-đăng bơngai jơ̆p kơ teh đak, pơm kơmĭl gah tơdrong awih awăn păng kơ kuh ư-ang kơ Kră Yang.
Bơ̆n dang ei wă tơ’bôh jơhngơ̆m ‘mêm kơ Kră Yang, hlôh băt kơ Kră Yang păng wă tơ’bôh trŏ kơ jơhngơ̆m kơkuh ư-ang kơ Kră Yang, bơ̆n kăl băt kơ ‘măn mă lơ jơ năr ngôi ‘bơ̆t jơ̆ng Kră Yang wă đŏk păng hŏk pơhrăm Nơ̆r Kră Yang. Kră Yang gô ăn kơ bơ̆n tơdrong arih. ‘Nguaih tơdrong arih, Kră Yang gô ăn kơ bơ̆n lơ tơdrong, lơ tơmam gĭt kăp. Bơ̆n athei yua iŏk jơ trŏ lăp ‘măn jơ năr, tơdrong gơh hơgei, jên tơmam, ‘măn pơyơ̆r kơ Kră Yang wă pơih să dêh char Sư tơ teh đak âu. Mưh bơ̆n ‘mêm kơ Kră Yang păng pơyơ̆r đĭ kơ Sư, phŏ kơnh tơ’bơ̆p lơ nơ̆r đe pơjăm, chrih hil, jô̆ bơ̆n kơnê̆.v.v.. Mă-lei athei pơhrăm rok kiơ̆ kơmĭl yă Mari, kư̆ kơ hnhoi lăng tơ Kră Yang đĕch, Sư lăp đon dôm tơdrong, tơmam bơ̆n pơyơ̆r kơ Sư, Sư kư̆m lăp đon dôm tơdrong bơ̆n jang kơ Sư. Kon bơngai bơ̆n lăng ‘bôh gah ‘nguaih đĕch, mă-lei Kră Yang lăng ‘bôh tơdrong hlơp hlom lăm jơhngơ̆m, Kră Yang kơdih gô pơma bơ̆ng, dŏng bơ̆n păng apah bơnê kơ bơ̆n.
Kơkuh kơ Ih Kră Yang Yêsu, inh bơnê kơ Ih yua kơ Ih dŏng pơklaih huai iŏk inh păng ăn kơ inh gơh awih awăn kơ Ih, apinh Ih tơgŭm inh ling-lang pơyơ̆r đĭ chăl arih inh kơ Ih, ư-ang hăm tơdrong inh bơ̆- jang awih awăn kơ Ih noh, inh krao khan yua anăn Kră Yang Yêsu Krist, Amen!
Bơ̆n tŏk bŏk awih awăn kơ Kră Yang đơ̆ng jơhngơ̆m lăm to, păng tơ’bôh gah ‘nguaih thoi yơ?
Đŏk Sơ̆p Hla Bơar ‘Bok Kei-Dei lăm pêng sơnăm: II Kôrintô 1
Kênh Youtube BHKTHN:
