Pajlug 16:25-30
Nqe cim:
“Nej tsis txhob nrhiav tej mov uas txawj lwj, tiamsis nej yuav tsum nrhiav tej mov uas tsis txawj lwj. Neeg Leej Tub yuav muab cov mov uas cawm tau txojsia ntev dhawv mus ibtxhis rau nej, rau qhov Vajtswv tus uas yog Leej Txiv twb nias homthawj rau nws lawm” (Yauhas 6:27).
Lus nug rau sawvdaws xav:
– Vajntxwv Xalumoos hais txog yam txhauj tibneeg thiab tes haujlwm ntawm tus neeg phem ua yog licas?
– Tibneeg nimno pheej poob mus rau yam kev txhaum twg dua?
– Tej yam twg nyob hauv koj lub neej uas koj pom hais tias zoo tiamsis ho coj koj mus ua txhaum?
Vajntxwv Xalumoos qhia rau nws cov menyuam yuav tsum ua tib zoo xav, ua tib zoo ntaus nqi txhua tes haujlwm, tsis yog lam ntaus nqi sab nraud kom dhau xwb tiamsis yuav tsum totaub lub keebtiv txhauj kom ua nyob hauv tibneeg lub siab. Xalumoos hais tias: “Muaj ib txojkev uas neeg xav hais tias yog txoj zoo, tiamsis txoj ntawd coj mus raug kev ploj kev tuag”. Lo lus “xav hais tias” hais txog tej uas saib zoo li tseeb, yoojyim ua rau tibneeg yuam kev, coj mus rau qhov nqi zog uas txaus ntshai yog “kev ploj kev tuag”. Vajntxwv Xalumoos qhia txog cov neeg phem tej keebtiv ntxias cuag li zoo. Lub plab tshaib ua rau tibneeg ua haujlwm, lub qhovncauj yuav noj neeg thiaj pheej mus khwv. Vim qhov kev ntshaw cov neeg phem nrhiav tswvyim ua phem, hais tej lus mob luag cuag hluavtaws kub. Cia kom tau koob npe, cov neeg phem siv tswvyim phem taug xaiv, tsim kev kub ntxhov, ua kom tawg pab tawg pawg, rhuav tej kev sib raug zoo kom tau yam uas lawv ntshaw. Thaum cov neeg phem tau hwjchim, lawv yuav ua limhiam kawg nkaus, cov kev phem lawv ua ntau zuj zus, lawv siv kev limhiam ntxias tej phoojywg lossis coj lwm tus mus ua txhaum, ua tej haujlwm phem.
Tej kev txawj ntse thiab kev xa suab hais lus yim vammeej, tibneeg yim yoojyim poob kev txhaum. Ntau leej vim muaj lub keebtiv xav yuam kev thiaj siv lawv tej laj lim tswvyim, peevxwm ntxias ntau leej poob kev txhaum kom lawv tau yam uas lawv ntshaw. Ntau tus cov neeg txawj ntse siv tswvyim dag nyiaj txiag saum huabcua, ua rau ntau leej lub neej puastsuaj tas. Kuj muaj ibtxhia cov thawjcoj muaj lub siab sau tej kevcai, kev xav los ntxias cov ntseeg, neeg ntiajteb. Tej lus uas lawv hais, nqua hu thaum hnov cuag li zoo, yog li ntawd thaum kawg yuam kev loj heev, ua rau ntau leej raug kev txomnyem nyuaj siab.
Lub keebtiv Tswv Yexus los yug cawm tibneeg yog kev hlub (Yauhas 3:16). Nyob hauv qab ntuj no, muaj ntau txojkev xav hais tias yog txoj zoo tiamsis thaum kawg yog kev ploj kev tuag. Tsuas muaj tib txojkev pub tau txojsia ntev dhawv mus ibtxhis rau tibneeg yog Tswv Yexus, Nws hais tias “Kuv yog txojkev, yog qhov tseeb thiab yog txojsia; tsis muaj leejtwg mus cuag tau Leej Txiv, tsuas yog mus ntawm kuv mus xwb thiaj tau” (Yauhas 14:6). Lub keebtiv peb ua neej thiab ua haujlwm zoo ib yam tus Tswv, tsimtxiaj tshaj qhov kev ua noj ua haus txhua hnub thiab tej uas ua kom muaj nqis rau yus nyob ib vuag hauv ntiajteb no. Qhov ntawd yog nrhiav tej mov uas tsis lwj uas yog txojsia ntev dhawv mus ibtxhis (Yauhas 6:27).
Koj tej lus hais thiab kev nqis tes ua haujlwm puas coj tau lwm tus ua ncaj ncees, paub qhov tseeb thiab tau txojsia ntev dhawv mus ibtxhis?
Thov Vajtswv,
Tus Tswv, nyuam yaus ua Koj tsaug vim Koj qhia kom nyuam yaus yuav tsum ua tib zoo ua lub neej raws li Koj qhia. Thov Koj pub kom nyuam yaus txhua lo lus hais, tes haujlwm yog ua yam uas nyob mus ibtxhis tsis kawg thiab lub keebtiv yog kev hlub coj Txojmoo Zoo mus qhia ntau leej. Amees.
Nyeem Vajluskub hauv peb lub xyoo: Phau Ntawv Nkauj 92:1-94:23
Kênh Youtube BHKTHN:
