Klei Aê Diê Blŭ: Klei Bi Hriêng 16:25-30
Êlan kliăng: “Đăm mă bruă ôh kơ mnơ̆ng ƀơ̆ng huă thâo rai, ƀiădah kơ mnơ̆ng ƀơ̆ng huă ăt dôk tơl truh kơ klei hdĭp hlŏng lar. Mnơ̆ng ƀơ̆ng huă anăn Anak Mnuih srăng brei kơ diih; kyuadah Ñu yơh Aê Diê Ama kđăm bi sĭt gơ̆ tŭ Ñu leh.” (I Yôhan 6:27).
Klei êmuh ksiêm mĭn: Si Mtao Salômôn lač kơ klei kčŭt leh anăn bruă ngă phung ƀai? Ya mta bruă klă klơ̆ng anak mnuih hruê anei khăng lĕ? Ya klei hlăm klei hdĭp drei msĕ si djŏ klă ƀiădah ba drei kơ klei soh?
Mtao Salômôn bi hriăm anak ñu brei ksiêm mĭn bi nik, ksiêm dlăng bi klă kơ djăp mta bruă, amâo ksiêm dlăng ngơi mang ti êngao ôh ƀiădah brei siêm dlăng klei kčŭt ngă bruă hlăm lam ai tiê mnuih. Ñu mphŭn hŏng êlan: “Mâo sa bĭt êlan mnuih yap jing kpă, ƀiădah knhal tuč êlan anăn jing hĕ klei djiê”. Boh blŭ “sa bĭt êlan” lač kơ sa klei msĕ si sĭt, ênưih ngă kơ arăng čhuai, ba truh kơ boh jhat kjham snăk jing “klei djiê”. Mtao hưn mdah dŭm klei kčŭt mơ̆ng ênưih truh kơ jhat ƀai mơ̆ng phung ƀai ƀiădah leh mrâo hmư̆ drei mĭn jăk. Tian êpa ngă kơ arăng mă bruă, ƀăng êgei čiăng ƀơ̆ng kơŭt êrui. Kyua klei dưi phung ƀai mĭn kơ klei jhat, yua boh blŭ msĕ si pui hlơr čuh ai tiê mnuih. Čiăng mâo klei hing ang, phung ƀai yua klei mnêč jhat, klei mĭn bi roh, bi kah mbha, bi luč klei bi hgŭm sĭt suôr čiăng mă klei tŭ dưn. Tơdah phung ƀai mâo leh klei dưi, diñu jing jhŏng ktang, hnơ̆ng măk ƀai lu hĭn mơh, yua klei dưi hiu mplư ƀĭng găp amâodah tiŏ nao phung mkăn nao hlăm êlan soh, ngă bruă jhat ƀai.
Klei kreh knhâo leh anăn bruă hâo hưn ƀrư̆ đĭ kyar, anak mnuih ênưih lĕ hlăm klei soh hĭn. Lu mnuih kyua dŭm klei kčŭt soh yua leh klei pô thâo hiu mplư lu mnuih lĕ hlăm klei soh čiăng duah klei tŭ dưn. Lu phung ksiêm tĭng kyua klei khăp kơ prăk mah mă klei thâo čiăng mplư prăk, bi rai klei hdĭp lu mnuih. Ăt lu mơh phung khua gĭt gai mâo lu klei bi hriăm čiăng hiu mplư phung đaŏ, ƀuôn sang, Dŭm klei hlak mblang, klei diñu iêô mthưr msĕ si djŏ, kyua anăn ba klei jhat kjham snăk, mâo lu mnuih tŭ klei ênguôt hnĭng.
Klei kčŭt kơ Khua Yang Yêsu hriê ti lăn ala mtlaih mnuih jing klei khăp (Y‑Yôhan 3:16). Dlông rŏng lăn, mâo lu ktuê êlan dlăng msĕ si djŏ ƀiădah knhal tuč atăt anak mnuih kơ klei djiê. Knŏng mâo hjăn sa êlan atăt anak mnuih kơ klei hdĭp hlŏng lar jing Khua Yang Yêsu, Pô lač leh: “Kâo jing êlan, klei sĭt nik, leh anăn klei hdĭp; amâo mâo pô dưi nao kơ Ama, knŏng hŏng kâo” (Y‑Yôhan 14:6). Klei kčŭt kơ drei hdĭp leh anăn mă bruă jing brei hdĭp msĕ Khua Yang, hgao kơ bruă hdĭp grăp hruê leh anăn wăt kơ klei tŭ dưn êjai ti lăn ala. Anăn jing tui duah mnơ̆ng ƀơ̆ng dôk nanao kơ klei hdĭp hlŏng lar (Y‑Yôhan 6:27).
Bruă ngă leh anăn klei blŭ drei klă sĭt đru kơ pô mkăn kơ êlan kpă, klei sĭt nik leh anăn klei hdĭp lă lar mơ̆?
Wah lač: Ơ Khua Yang, kâo bi mni lač jăk kơ Khua Yang kyua Ih mñă kơ kâo brei thâo răng hlăm klei hdĭp tui hlue Khua Yang. Akâo kơ Ih đru kâo hlăm djăp klei blŭ, bruă mă kâo mđing truh kơ ênoh yuôm lă lar leh anăn hŏng klei kčŭt klei khăp čiăng ba Klei Mrâo Mrang Jăk kơ lu mnuih.
Dlăng Klei Aê Diê Blŭ hlăm tlâo thŭn: Klei Mmuñ Hđăp 92:1-15; 94:1-23
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
