Klei Aê Diê Blŭ: Y-Luk 18:9-14
Êlan kliăng: “Ƀiădah pô rĭng jia dôk kbưi hŏng ñu amâo jhŏng kngưr ală gơ̆ kơ adiê ôh, ƀiădah gơ̆ tŭk đah da, lač, ‘Ơ Aê Diê, pap mñai kơ kâo sa čô mnuih soh!’” (Y-Luk 18:13)
Klei êmuh ksiêm mĭn: Ya klei mdê ti krah klei wah lač sa čô Pharisi leh anăn sa čô rĭng jia? Si ngă Khua Yang yap kpă kơ pô rĭng jia? Tơdah wah lač, ya klei brei drei ngă čiăng kơ Khua Yang dưi pap brei klei soh leh anăn wĭt lač?
Khua Yang Yêsu yăl dliê kơ sa čô Pharisi leh anăn sa čô rĭng jia đĭ nao kơ Sang Kkuh Mpŭ čiăng wah lač. Dlăng ti êngao, êkei Pharisi đăo sĭt suôr, amâo mâo anôk dưi ƀuah ôh. Ƀiădah hlăm mngăt ai tiê, ñu soh prŏng kyua mĭndah ñu pô mâo klei dưi hdĭp doh jăk ti anăp Aê Diê hĭn kơ pô rĭng jia adih. Thiăm kơ klei anăn, ñu soh mơh kyua lač msĕ si Khua Yang đuôm nư kơ ñu, kyuadah ñu bi leh ênŭm jih bruă klei đăo! Ñu amâo wah lač ôh, amâo hưn klei soh ôh ƀiădah knŏng blŭ hưn ktưn hŏng Khua Yang; ñu amâo tui duah klei jăk mơak amâodah klei pap ôh ƀiădah lŏ mưč mač mnuih mkăn hĭn êjai! Ñu knŏng uêñ mĭn kơ ñu pô, bi mkă ñu hŏng pô rĭng jia ƀiădah amâo tuôm knang kơ Khua Yang ôh! Bi mklăk wĭt, “13Ƀiădah pô rĭng jia dôk kbưi hŏng ñu amâo jhŏng kngưr ală gơ̆ kơ adiê ôh, ƀiădah gơ̆ tŭk đah da, lač, ‘Ơ Aê Diê, pap mñai kơ kâo sa čô mnuih soh!’” (êlan 13).
Dua čô mnuih anei nao wah lač sơăi, leh anăn ti anăp Khua Yang jih dua jing mnuih soh sơăi. Ƀiădah leh wah lač boh grăp čô mă tŭ mdê kluôm dhuôm. Pô rĭng jia jing sa čô Yuđa mă bruă kơ phung Rôm dôk kiă kriê ƀuôn sang pô, arăng dlăng jing mnuih lhiăr kơ lăn čar, arăng bi êmut yap jing phung soh jhat, ƀiădah ñu thâo kral klei soh ñu, sĭt ai tiê kmhal hưn klei soh ñu hŏng Aê Diê leh anăn Aê Diê pap brei klei soh ñu, yap ñu kpă. Bi êkei Pharisi mgao, mĭndah klei ñu kăm ƀơ̆ng huă leh anăn myơr ênŭm sa kdrêč hlăm pluh, ñu jing mnuih kpă ênô leh amâo lŏ čiăng hưn klei soh ñu ôh, snăn Khua Yang amâo yap ñu kpă ênô ôh.
Khua Yang Yêsu lač: “Kyuadah grăp čô hlei pô mpŭ kơ ñu pô, Aê Diê srăng bi mtrŭn ñu; ƀiădah hlei pô bi mtrŭn ñu pô, Aê Diê srăng mpŭ kơ ñu.” (êlan 14). Lu mnuih mgao mĭndah knŏng ngă bi jăk klei bhiăn đăo ti Sang Kkuh Mpŭ jing yap kpă ênô yơh! Ƀiădah Khua Yang Yêsu brei drei ƀuh klei bhiăn đăo knŏng yuôm tơdah thâo kral klei drei pô jing. Khua Yang lač, “Amâo djŏ phung suaih asei mlei ôh čiăng kơ aê êa drao, ƀiădah phung ruă duam. Amâo djŏ Kâo hriê iêô phung kpă ôh, ƀiădah phung soh.” (Y-Markôs 2:17). Hlei pô thâo kral kơ ñu jing mnuih soh, hưn klei soh pô leh anăn akâo kwưh kơ Aê Diê pap brei tơdah wah lač, Khua Yang srăng hmư̆, pap brei leh anăn yap kpă ênô.
Khua Yang Yêsu mtô drei wah lač, “Pap brei kơ klei soh hmei …” Khua ƀĭng kna Y-Yôhan kñăm msĕ mơh, “Tơdah drei hưn klei soh drei, Ñu jing sĭt suôr leh anăn kpă, srăng pap brei klei soh drei leh anăn bi doh hĕ drei mơ̆ng jih jang klei wê.” (I Y-Yôhan 1:9). Brei drei hưn klei soh drei hŏng Khua Yang jêñ jêñ čiăng mâo klei pap brei êlâo kơ myơr klei akâo kwưh.
Si ngă drei khăng hưn klei soh drei hŏng Khua Yang tơdah wah lač mơ̆?
Wah lač: Ơ Ama Doh Jăk! Kâo thâo kâo ngă soh hŏng Ama jêñ jêñ, klei soh kâo thâo kral wăt klei soh kâo amâo hdơr ôh čiăng hưn. Kâo kmhal ti anăp Khua Yang, akâo Khua Yang pap brei kơ klei soh kâo leh anăn đru kâo amâo lŏ ngă soh ôh. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Bruă Mtao 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
