Lukas 18:9-14
Nqe cim:
“Tiamsis tus sau se sawv nrug deb mentsis, nws tsis tsa qhovmuag saib saum ntuj, nws ntaus nws lub hauv siab thiab hais tias, ‘Vajtswv, kuv yog neeg txhaum, thov koj hlub kuv!” (Lukas 18:13)
Lus nug rau sawvdaws xav:
– Kev sib txawv hauv kev thov Vajtswv ntawm tus Falixais thiab tus sau se yog dab tsi?
– Yog vim li cas tus sau se tau Tswv Yexus suav tias ncaj ncees?
– Thaum thov Vajtswv, cheemtsum ua dab tsi kom tau Vajtswv zam txim thiab teb peb tej lus thov?
Tswv Yexus hais txog ib tug Falixais thiab ib tug neeg sau se mus thov Vajtswv hauv Tuamtsev. Saib sab nraum mas tus Falixais muab siab rau ntseeg tsis muaj ib yam dab tsi yuav thuam tau. Tiamsis ntawm sab ntsujplig, nws yuam kev loj, xav hais tias nws yog neeg zoo ua tau lub neej dawbhuv tabmeeg Vajtswv xubntiag tsis zoo li tus sau se. Tsis tas li ntawd xwb, tseem yuam kev hais tias Vajtswv tshuav nws nqi vim nws twb ua tiav nws txoj haujlwm hauv kev ntseeg lawm! Nws tsis thov Vajtswv, tsis lees txim, tsuas yog hais tej lus khavtheeb rau Vajtswv xwb; tsis nrhiav koob hmoov lossis kev hlub tshua tiamsis tseem thuam lwm tus! Nws tsuas saib nws tus kheej xwb, nws muab nws tus kheej piv rau tus sau se, nws tsis vamkhom Vajtswv li! “Tiamsis tus sau se sawv nrug deb mentsis, nws tsis tsa qhovmuag saib saum ntuj, nws ntaus nws lub hauv siab thiab hais tias, ‘Vajtswv, kuv yog neeg txhaum, thov koj hlub kuv!” (nqe 13).
Ob tug tibneeg no puavleej mus thov Vajtswv, thiab ntawm Vajtswv xubntiag nkawd puavleej yog neeg txhaum. Tiamsis tom qab uas thov Vajtswv tas nqi zog sib txawv. Tus sau se yog ib tug neeg Yudais uas ua haujlwm rau cov neeg Loos uas tabtom tswj kav nws haivneeg, nws raug suav hais tias yog ib tug neeg ntxeev siab, txaus ntxub thiab saib zoo li ib tug neeg txhaum, tiamsis nws zeem paub nws kev txhaum, tso kev txhaum tseg tiag tiag thiab lees txim rau Vajtswv, tau Vajtswv zam txim thiab suav ncaj ncees. Tiamsis tus Falixais uas khavtheeb, xav hais tias nws ua kevcai yoo mov thiab fij txaus ib feem kaum, ces ncaj ncees lawm tsis tas lees txim thiaj tsis tau Vajtswv suav tias ncaj ncees.
Tswv Yexus hais tias, “tus uas khav hais tias, nws muaj hwjchim, tus ntawd yuav poob hwjchim, tiamsis tus uas txo hwjchim, tus ntawd yuav tau hwjchim” (nqe 14). Ntau tus neeg khavtheeb xav hais tias tsuas yog ua tau zoo raws li kevcai ntseeg mus tom Tuamtsev ces tau suav ncaj ncees lawm! Tiamsis Tswv Yexus qhia peb pom hais tias kevcai ntseeg tsuas muaj nqis thaum peb zeem paub peb lub tsamthawj xwb. Tswv Yexus hais tias, “Cov neeg tsis muaj mob yeej tsis mus cuag kws tshuaj, tsuas yog cov neeg muaj mob thiaj mus cuag kws tshuaj xwb. Kuv tsis yog los hu cov neeg ncaj ncees, tiamsis kuv los hu cov neeg txhaum” (Malakaus 2:17). Leejtwg zeem paub nws tej kev txhaum, lees txim, thov Vajtswv zam txim, thaum thov Vajtswv, Vajtswv yuav mloog, hlub tshua thiab suav tias ncaj ncees.
Tswv Yexus qhia peb thov Vajtswv, “thov Koj zam txim rau peb…”. Timthawj Yauhas kuj qhia ntxiv hais tias: “Tiamsis yog peb lees peb tej kev txhaum rau Vajtswv, Vajtswv yog tus ncaj ncees, nws yuav ua raws li nws tau coglus tseg lawm, nws yuav zam peb tej kev txhaum thiab nws yuav ntxhuav peb tej kev txhaum huv tibsi mus” (1 Yauhas 1:9). Peb yuavtsum lees txim rau Vajtswv thov Nws zam txim ua ntej yuav thov Nws pab ib yam dabtsi twg.
Thov Vajtswv,
Vaj Leej Txiv! Nyuam yaus paub hais tias nyuam yaus pheej ua txhaum rau Koj, tej kev txhaum uas nyuam yaus tsis paub, tsis nco. Hnub no nyuam yaus thov lees txim rau Koj, thov hlub tshua, zam txim rau nyuam yaus thiab pab kom tsis ua txhaum ntxiv lawm. Nyuam yaus tuav Tswv Yexus Khetos lub npe thov, Amees.
Peb puas pheej lees txim thaum thov Vajtswv?
Nyeem Vajluskub hauv peb lub xyoos: 2 Vajntxwv 3
Kênh Youtube BHKTHN:
