Klei Aê Diê Blŭ: Y-Mathiơ 21:20-22
Êlan kliăng: “Ya klei diih akâo êjai wah lač, diih srăng mă tŭ jih tơdah diih mâo klei đăo” (Y-Mathiơ 21:22)
Klei êmuh ksiêm mĭn: Leh ƀuh ana hra krô, ya klei phung ƀĭng kna êmuh Khua Yang? Si Khua Yang Yêsu wĭt lač kơ phung ƀĭng kna kơ klei ktang klei đăo? Si drei yua klei hriăm anei hlăm klei drei pô wah lač?
Tơdah ƀuh ana hra krô leh Khua Yang Yêsu lač, phung ƀĭng kna bi kngăr leh anăn êmuh Khua Yang, “Si ngă ana boh hra anei krô hĕ bhiâo hin lĕ?” Ƀri mmông anei, Khua Yang đru phung ƀĭng kna thâo săng kơ klei đăo hŏng rup bi êdah ti êngao jing klei Khua Yang tăm pah, ƀiădah klei ktang mơ̆ng klei đăo hlăm klei Khua Yang čiăng srăng mâo klei yuôm bhăn mdê kdlưn hĭn: “Sĭt nik kâo lač kơ diih, tơdah diih mâo klei đăo leh anăn amâo đing ôh” snăn srăng dưi ngă bruă prŏng hĭn (êlan 21). Drei mđing kơ pruê̆ blŭ: “tơdah diih mâo klei đăo”, Khua Yang hưn brei răng kơ phung ƀĭng kna hruê êlâo leh anăn drei hruê anei tui hlue Khua Yang ƀiădah klei đăo điêt đei! Khua Yang amâo mtô phung ƀĭng kna đăo čiăng dưi ngă klei myang hưn mdah ôh ƀiădah Khua Yang čiăng kơ phung ƀĭng kna đăo knang kluôm dhuôm kơ Khua Yang Yêsu čiăng kơ klei myang Khua Yang srăng bi êdah hlăm klei hdĭp diñu.
Khua Yang Yêsu lŏ lač: “Ya klei diih akâo êjai wah lač, diih srăng mă tŭ jih tơdah diih mâo klei đăo.” Mâo leh klei thâo săng čhuai tơdah lu mnuih kƀah klei răng hưn mdah hlăm klei đăo kyua bi mĭn amâo mâo ôh klei kčah hlăm klei kwưh akâo. Diñu wơr hĕ Klei Aê Diê Blŭ tuôm mtô phung ƀĭng kna: “Tơdah ya klei diih akâo kơ kâo hlăm anăn kâo, kâo srăng ngă klei anăn” (Y-Yôhan 14:14). Klei brei ngă čiăng mâo hmư̆ klei wah lač jing brei wah lač hlăm Anăn Khua Yang Yêsu Krist, jing brei wah lač hlue si klei kñăm leh anăn klei Ñu čiăng. Khua Yang Yêsu čiăng kơ drei wah lač, akâo hŏng Ñu, jing bi mđĭ klei bi mguôp sĭt suôr hŏng Ñu, mơ̆ng anăn srăng thâo ya klei Khua Yang čiăng, čiăng kơ drei akâo wah lač tui si klei Ñu čiăng. Klei Mrâo Mrang Jăk tui si Y-Yôhan 15:7 brei thâo bruă ngă čiăng kơ Aê Diê hmư̆ klei drei wah lač, “Tơdah diih dôk hlăm kâo, leh anăn klei kâo blŭ dôk hlăm diih, akâo bĕ ya klei diih čiăng, leh anăn arăng srăng ngă brei kơ diih”. Hră Y-Yakơ 4:3 ăt brei thâo ya mta phŭn Khua Yang amâo hmư̆ klei wah lač, “Diih akâo leh anăn amâo mă tŭ ôh, kyuadah soh diih akâo, čiăng yua mnơ̆ng anăn tui si kđeh diih čiăng”
Khua Yang srăng brei nanao ya klei jăk hĭn kơ phung đăo kơ Ñu ƀiădah ya ngă drei amâo mâo ôh ya klei pô akâo? Năng ai drei dôk hlăm klei amâo đăo amâodah đing amâodah klei drei kwưh akâo amâo djŏ. Aê Diê knŏng bi êdah klei myang Ñu mơ̆ng klei phung đăo dưm klei đăo kjăp hlăm Khua Yang, jih ai tiê tui hlue klei Khua Yang čiăng leh anăn jih ai tiê wah lač hlăm klei đăo.
Drei dôk wah lač kơ klei pô dôk găn hŏng klei đăo kluôm ênŭm hlăm Khua Yang mơ̆?
Wah lač: Ơ Khua Yang pô khăp, kâo akâo kơ ih thiăm klei đăo knang kơ kâo leh anăn đru kâo dôk giăm Khua Yang nanao čiăng thâo klei Ih čiăng, čiăng kâo mâo nanao klei kwưh akâo bi mơak kơ Khua Yang. Akâo kơ Ih đru kâo gưt nanao klei Ih čiăng tơdah mâo Ih wĭt lač. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Y-Pêtrôs 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
