Mathais 21:20-22
Nqe cim:
“Yog nej ntseeg tiag, nej thov yam twg, nej yuav tau yam ntawd” (Mathais 21:22)
Lus nug rau sawvdaws xav:
– Thaum pom tsob txiv ncuavpias tuag, cov thwjtim nug Tswv Yexus yam dabtsi?
– Tswv Yexus teb rau cov thwjtim txog lub zog ntawm kev ntseeg zoo li cas?
– Peb siv zaj kawm no rau lub neej thov Vajtswv li cas?
Thaum cov thwjtim saib ntsoov pom tsob txiv ncuavpias tuag vim raug Tswv Yexus foom, cov thwjtim xav tsis thoob thiab nug Tswv Yexus hais tias, “Ua li cas tsob txiv ncuavpias no yuav tuag sai ua luaj li ntawd?” Tswv Yexus qhia rau cov thwjtim paub meej hais tias, txoj kev ntseeg thiab kev ua neej qhia tshwm tawm sab nraud uas tsis phim puavleej raug Vajtswv foom tsis zoo, tiamsis lub zog ntawm kev ntseeg Tswv Yexus yuav tau txais tej yam uas xav tsis thoob: “Kuv qhia tseeb rau nej hais tias, yog nej ntseeg tiag tiag” ces yuav ua tau tej yam haujlwm loj dua ntxiv (nqe 21). Peb ua zoo saib lo lus: “yog nej ntseeg tiag tiag”, Tswv Yexus xav ceeb toom rau cov thwjtim hnub thaud thiab peb cov ntseeg niaj hnub nimno hais tias peb raws Tswv Yexus qab tiamsis kev tseem ntseeg tsawg heev. Tswv Yexus tsis qhia rau Nws cov thwjtim ntshaw ua tau tej txujci tseemceeb tshwm sab nraud tiamsis Nws xav kom lawv tso siab plhuav rau Nws kom Nws lub hwjchim ua tau haujlwm dhau ntawm lawv lub neej.
Tswv Yexus hais ntxiv hais tias: “Yog nej ntseeg tiag, nej thov yam twg, nej yuav tau yam ntawd.” Tau muaj tej yam nkag siab yuam kev thaum uas muaj ntau leej tsis ua tib zoo tshuaj xyuas hauv kev qhia txog kev ntseeg vim lawv xav hais tias tsis muaj nrim rau kev thov Vajtswv. Lawv hnov qab Vajtswv Txojlus tau qhia rau cov thwjtim hais tias: “Yog nej tuav kuv lub npe thov kom kuv ua ib yam dabtsi, kuv yuav ua yam ntawd rau nej”. Qhov uas yuav tau Vajtswv teb peb tej lus thov yog yuav tsum tuav Tswv Yexus lub npe thov; lub ntsiab yog yuav tsum thov raws Vajtswv lub homphiaj thiab raws li Tswv Yexus lub siab nyiam. Tswv Yexus xav kom peb thov Vajtswv thiab thov los ntawm Tswv Yexus lub npe. Txhais tau hais tias yuav tsum loj hlob ntawm kev sib raug zoo nrog Tswv Yexus, peb thiaj paub Tswv Yexus ntshaw dabtsi thiab paub thov yam haum Vajtswv siab. Phau Moo zoo Yauhas 15:7 qhia hau kev kom tau Vajtswv teb tej lus thov li no, “yog nej txuas rau ntawm kuv thiab nej khaws kuv tej lus cia rau nruab siab lawm, nej xav yuav yam twg, nej cia li thov nej yuav tau yam ntawd”. Hauv Yakaunpaus 4:3 kuj qhia peb paub txog qhov uas Vajtswv tsis teb peb tej lus thov hais tias, “Thaum nej thov nej tsis tau, rau qhov nej lub siab phem, tej uas nej thov ntawd nej yuav coj mus siv raws li nej lub siab nyiam xwb”.
Vajtswv yeej npaj txhij pub tej yam uas zoo kawg nkaus rau Nws cov menyuam, tiamsis vim li cas peb tsis tau txais yam peb thov? Tej thaum yog peb tabtom tsis muaj kev ntseeg lossis ua xyem xyav, lossis thov tsis raws Vajtswv siab nyiam. Vajtswv tsuas qhia tshwm Nws lub hwjchim dhau los ntawm cov ntseeg uas tso siab ruaj khov rau ntawm Nws, tas siab nrhiav yam uas haum Vajtswv siab thiab ua siab ntev thov ntawm kev ntseeg xwb.
Thov Vajtswv,
Vajtswv tus uas muaj kev hlub, thov pab nyuam yaus muaj kev ntseeg, nyob ze Koj, mloog lus thiab txawj thov yam uas raws li Koj lub siab nyiam . Nyuam yaus tuav Tswv Yexus Khetos lub npe thov. Amees.
Peb puas thov Vajtswv raws li Nws siab nyiam lawm tau?
Nyeem Vajluskub hauv peb lub xyoos: 2 Petus 1
Kênh Youtube BHKTHN:
