Klei Aê Diê Blŭ: I Y-Timôthê 2:1-2
Êlan kliăng: “Snăn êlâo kơ jih jang klei, kâo mtrŭt brei ih kwưh, akâo, wah lač brei kơ arăng leh anăn bi mni kơ Aê Diê kyua jih jang mnuih” (I Y-Timôthê 2:1)
Klei êmuh ksiêm mĭn: Ya pă mta klei phŭn khua ƀĭng kna Y-Pôl kñăm hlăm klei wah lač brei kơ jih jang mnuih? Ya ngă? Si Phung Sang Aê Diê leh anăn grăp Pô đăo kơ Krist hruê anei wah lač brei kơ jih jang mnuih?
Kčưm dơ̆ng kdrêč 2 hŏng êlan “êlâo kơ jih jang klei”, khua ƀĭng kna Y-Pôl čiăng kñăm kơ anak ñu hlăm klei hdĭp myang, jing khua pô mtô Y-Timôthê kơ klei dăp bruă êlâo êdei leh anăn klei yuôm kơ klei wah lač leh anăn kơ klei wah lač brei kơ jih jang mnuih. Ñu mtô Phung Sang Aê Diê amâo knŏng wah lač msĕ si yang đar ƀiădah “kwưh, akâo, wah lač brei kơ arăng leh anăn bi mni kơ Aê Diê” (êlan 1). Pă mta klei phŭn anei bi êdah klei khăp, klei drei uêñ mĭn kơ jih jang mnuih, leh anăn hŏng klei luă gŭ, hdơr knga bi mni kơ Khua Yang. “Kwưh, akâo” jing thâo kral klei drei pô kƀah msĕ si phung ka thâo kral Khua Yang, leh anăn hŏng jih ai tiê wah lač kơ Khua Yang, akâo kơ Ñu thiê brei. “Wah lač brei” jing boh blŭ khăng yua čiăng lač kơ klei wah lač, lač kơ ai tiê klei mĭn nao kơ Khua Yang hŏng klei kkuh mpŭ. “Wah lač brei” jing klei blŭ hrăm hŏng Ama hlăm adiê kơ klei drei uêñ mĭn kơ klei kƀah mnuih mkăn. “Bi mni kơ Aê Diê” jing kdrêč amâo dưi kƀah ôh hlăm klei wah lač, lač kơ ai tiê klei mĭn wah lač hŏng klei hdơr knga bi mni kơ Khua Yang. Pô drei wah lač jing kơ drei pô, kơ gŏ sang găp djuê, kơ Phung Sang Aê Diê leh anăn pŏk prŏng ƀai brei kơ jih jang mnuih, mblang jing mbĭt hŏng phung ka thâo kral Khua Yang. Khua ƀĭng kna Y-Pôl uêñ mĭn wah lač brei wăt kơ phung khua kiă kriê msĕ mơh. Kyua tơdah lăn čar mâo klei kiă kriê jăk srăng bi hmăi jăk kơ phung ƀuôn sang, mbĭt hŏng phung anak ƀuôn sang Aê Diê mơh, mơ̆ng klei anăn yơh drei “dưi dôk hdĭp êđăp ênang leh anăn amâo mâo klei rŭng răng ôh, tui si klei đăo kơ Aê Diê leh anăn tui si klei arăng mpŭ” (êlan 2).
Phung Sang Aê Diê hruê anei khăng knŏng wah lač brei kơ phung anak Aê Diê leh anăn kơ phung ka đăo drei iêô jak, jing kơ phung drei dôk hưn bi sĭt klei đăo kơ digơ̆. Tĭng nah mkăn, kyua mâo klei mĭn bi kah mdê klei đăo hŏng lăn ala, snăn mâo đa đa phung anak Aê Diê ka mđing mĭn amâodah knŏng ƀiă wah lač brei kơ jih jang mnuih leh anăn kơ phung khua kiă kriê. Klei Aê Diê Blŭ hŏng klei khua ƀĭng kna Y-Pôl mtô, đru kơ drei thâo ƀuh kluôm hĭn, wah lač bĕ kơ jih jang mnuih dơ̆ng mơ̆ng hlăm gŏ sang pô, kơ Phung Sang Aê Diê, wăt kơ phung khua kiă kriê lăn čar. Anei jing mta klei brei dưm êlâo hĭn, kyua klei wah lač brei kơ jih jang mnuih, jing wah lač brei kơ phung ka thâo kral Khua Yang dưi mâo klei bi mtlaih. Drei amâo thâo ôh hlei pô Aê Diê ruah, ƀiădah drei thâo Khua Yang čiăng kơ jih jang mnuih dưi mâo klei bi mtlaih. Kyuanăn wah lač brei kơ jih jang mnuih jing bruă yuôm leh anăn jing bruă jăk bi mơak kơ Khua Yang. Brei drei thâo ƀuh jŭm dar drei adôk lu mnuih čiăng snăk dưi hmư̆ Klei Mrâo Mrang Jăk bi mtlaih. Tơdah drei mđing uêñ wah lač brei kơ digơ̆ hŏng ai tiê klei mĭn “kwưh akâo, wah lač brei kơ arăng, leh anăn bi mni kơ Aê Diê”, Yang Mngăt Jăk srăng ngă bruă, mtrŭt drei kgŭ nao hiu hưn Anăn Khua Yang kơ lu mnuih.
Si ngă drei mđing uêñ wah lač brei kơ jih jang mnuih leh mơ̆?
Wah lač: Ơ Aê Diê klei khăp, leh anăn Pô bi mtlaih kâo, bi mni kơ Khua Yang kyua Khua Yang Yêsu pô yơh dôk wah lač brei kơ kâo. Akâo Khua Yang mñă brei kâo wah lač jêñ jêñ kơ jih jang mnuih leh anăn wah lač brei kơ phung khua kiă kriê tui si klei Ama čiăng. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 62-63
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
