I Timôthê 2:1-2
“Dôm tơdrong inh wă pơkă kơ ih dang ei tơdrong âu kăl tơpă: Inh athei iĕm krao khan bơnê kơ ‘Bok Kei-Dei ling-lang apinh Sư dŏng mơnat đĭ-đăng bơngai” (ITimôthê 2:1)
Nơ̆r jet tơchĕng pơwao:
– ‘Bok Pôl pơma puăn tơdrong kăl ayơ lăm tơdrong krao khan kơ đĭ-đăng bơngai? Yua kơ kiơ?
– Khul Lui kơ Kră Yang păng rim ‘nu Bơngai Lui dang ei yua iŏk tơdrong bơtho,krao khan kơ đĭ-đăng bơngai thoi yơ?
Pơih nơ̆r pơma lăm chăl 2 hăm nơ̆r “ tơdrong âu kăl tơpă” ‘Bok Pôl wă pơma hăm bơngai kon gah bơhngol sư kơdih ‘noh ‘Bok Bơtho Timôthê gah tơdrong ‘măn hơdrol hloh păng tơdrong kăl lăm tơdrong krao khan păng krao khan tang ăn kơ đĭ-đăng bơngai. Sư bơtho Khul Lui ưh kơsĭ krao khan hmă đĕch mă “athei krao khan đĭ jơhngơ̆m, krao apinh, krao ôr” (tr.1). Puăn tơdrong kăl âu wă tơ’bôh tơdrong ‘mêm mơnat, tơdrong lu bơ̆n ‘blŏk tơtăm kơ đĭ-đăng bơngai păng đei jơhngơ̆m tơjur akâu kơdih, băt bơnê kơ Kră Yang. “Krao khan đĭ jơhngơ̆m”’noh băt kơ tơdrong bơ̆n kơ’bah hăm lu bơngai tam băt kơ Kră Yang, păng krao khan tơpă đơ̆ng lăm jơhngơ̆m hăm Kră Yang apinh Sư tơgŭm ăn. “krao apinh” ‘noh jơ̆ nơ̆r pơma juăt kơ yua wă tơ’bôh gah tơdrong krao khan, wă pơma kơ đei jơhngơ̆m năm hăm Kră Yang hăm jơhngơ̆m wă kơkuh,. “ Krao khan tang” ‘noh wă tơ’bôh nơ̆r pơma tơ’bưh juăt hăm Yang ‘Bă kơpal plĕnh lăm tơdrong lu bơ̆n ‘blŏk tơchĕng tơdrong kăl yua kơ bơngai nai. “ Bơnê” ‘noh jơ̆ tơdrong ưh kơ kơ’bah lăm tơdrong krao khan, wă pơma kơ đei jơhngơ̆m krao khan hăm jơhngơ̆m băt bơnê kơ Kră Yang. Tơdrong mă lu bơ̆n krao khan noh jơ̆ bơ̆n kơdih, hnam dơnŏ. Khul Lui păng jơ̆p jang ăn kơ đĭ-đăng bơngai wă khan lu bơngai ưh tam băt kơ Kră Yang. ‘Bok Pôl ‘bôh tơdrong kăl lăm tơdrong krao khan noh krao khan kơ lu bơngai pơgơ̆r. Yua kơ mưh teh đak đei bơngai pơgơ̆r ‘lơ̆ng sư gô đei yua ăn kơ kon pơlei, ‘bơm truh tơ kon pơlei Kră Yang, đơ̆ng noh lu bơ̆n “ oei hiôk hian păng đei đon tơpăt kiơ̆ tơdrong ‘Bok Kei-Dei” (tr.2 BTHĐ).
Khul Lui dang ei bơ̆n ngăl juăt kơ krao khan kơ lu kon Kră Yang păng buăl juăt tam mă lui ‘noh tơdrong jang lu bơngai pơm kơdranh. Tơdrong nai dơ̆ng, minh pah yua đơ̆ng tơdrong tơ̆ng tơdrong tơchĕng pha ra tơdrong hăm ưh kơ lui pơm kơ lu kon Kră Yang ưh tam mă ‘blŏk tơtăm dah oei hui kơ krao khan kơ đĭ-đăng bơngai păng ăn kơ lu bơngai pơgơ̆r. Nơ̆r Kră Yang đơ̆ng ‘Bok Pôl botho tơgŭm lu bơ̆n lăng ‘bôh tôm hloh, athei krao khan kơ đĭ-đăng bơngai đơ̆ng lăm hnam dơnŏ, Khul Lui, truh tơ lu bơngai pơgơ̆r teh đak. ‘Nâu bơih tơdrong mă ‘măn hơdrol hloh yua krao khan kơ đĭ-đăng bơngai ‘noh jơ̆ krao khan wă kơ đei tơdrong dŏng pơklaih kơ lu bơngai tam băt kơ Kră Yang. Lu bơ̆n ưh kơ băt ôh, bu jơ̆ bơngai ‘Bok Kei-Dei rơih iŏk mă lei lu bơ̆n băt Sư wă kơ đĭ-đăng bơngai gơh klaih. Yua thoi noh krao khan kơ đĭ-đăng bơngai jơ̆ minh tơdrong kăl dêh tơpă păng ‘noh jơ̆ tơdrong ‘lơ̆ng pơm kơ Kră Yang lăp đon. Lu bơ̆n athei băt kơnăl jum dăr kơ lu bơ̆n lơ bơngai kăl kơ kơtơ̆ng Tơdrong ‘Nao ‘Lơ̆ng dŏng pơklaih, Yang Bơhngol ‘Lơ̆ng gô bơ̆jang, pơtrŭt lu bơ̆n iung, yak năm ră roi Anăn Kră Yang kơ lơ bơngai.
Ơ Kră Yang ‘Bok Kei-Dei mă ‘mêm mơnat păng ‘Bok Dŏng Pơklaih inh, inh bơnê kơ Ih yua kơ Kră Yang Yêsu oei krao khan tang inh.Apinh Ih tơ’blŏk kơ inh ling-lang krao khan kơ đĭ-đăng bơngai păng krao khan tang kơ lu bơngai pơgơ̆r kiơ̆ thoi Ih wă lăp đon. Yua Anăn Kră Yang Yêsu Krist, Amen.
Lu bơ̆n hăm ‘blŏk tơtăm krao khan kơ đĭ-đăng bơngai ưh?
Đŏk Sơ̆p Hla ar ‘Bok Kei-Dei lăm pêng sơnăm:Hơriso 62-63.
Kênh Youtube BHKTHN:
