Loos 13:8-10
Nqe cim:
“Nej tsis txhob tshuav leejtwg nqi, tib qho uas nej tshuav luag nqi ces yog ib leeg yuav tsum hlub ib leeg; tus uas hlub lwm tus thiaj yog nws ua raws li txoj kevcai qhia.” (Loos 13:8)
Lus nug rau sawvdaws xav:
– Timthawj Paulus xav hais txog dabtsi thaum nws hais lo lus “nej tsis txhob tshuav luag nqi”?
– Los ntawm yam dabtsi, kev hlub ua tiav txoj kevcai?
– Kev hlub tseemceeb zoo li cas nyob hauv peb lub neej?
Timthawj Paulus ntuas kom sawvdaws tsis txhob tshuav luag nqi li. Tiamsis Paulus txhawb kom ib leeg tshuav ib leeg nqi kev hlub xwb (nqe 8). Ib tug neeg tshuav “NQI” ces yuav tsum tau “THEM”. Txhua tus uas ntseeg Tswv Yexus puavleej tau txais Nws txojkev hlub uas loj kawg nkaus npluamias nyob hauv lub neej. Peb yuav hlub tsis tau tus Tswv kom tsimnyog txojkev hlub uas Nws tau hlub peb. Yog li ntawd, peb txhua tus puavleej yog neeg tshuav tus Tswv nqi kev hlub. Peb yim nyob ntev hauv lub ntiajteb no, ces peb yim tshuav tus Tswv kev hlub nqi ntau. Tsuas tshuav tib lub tswvyim uas peb yuav ua tau rau tus Tswv zoo siab yog peb cov uas muaj Nws tus yamntxwv ib leeg hlub ib leeg. Timthawj Paulus hais tias, leejtwg hlub tus Tswv thiab hlub tej neeg zej zog, ces yog ua tiav txoj kevcai uas Tswv Yexus qhia, “hlub Vajtswv, hlub neeg” (Mathais 22:37-40). Tagnrho tus Tswv txojkev hlub lub tseem ntsiab, yog muab “txojkev hlub” los ua rau hauv lub neej.
Txuas ntxiv, Timthawj Paulus hais txog tej kevcai uas tibneeg ua rau tibneeg hauv Vajtswv Kaum Nqe Kevcai uas muab rau Nws haivneeg coj hais tias: “Nej tsis txhob deev luag pojniam luag txiv; nej tsis txhob tua neeg; nej tsis txhob ua tubsab; nej tsis txhob ntshaw luag tug; thiab muaj dua lwm nqe kevcai uas muab sau zog ua ib nqe hais li no tias, hlub nej tej kwvtij zej zog ib yam li nej hlub nej lub cev.” (nqe 9).
Txawm yog peb yuav zoo li cas los peb yeej tsis rov ntxub, ua phem rau yus tus kheej li, tiamsis peb yuav ua txhua yam kom yus lub neej vammeej, zoo siab thiab nyob qab siab xwb. Thaum peb hlub tej kwvtij zej zog ib yam li peb hlub peb lub cev, ces peb yuav tsis ua yam uas hiam lwm tus lub cev, kev xav thiab sab ntsujplig li. Peb yuav tsis muab tej kwvtij siv ua kom peb tau, tiamsis yuav ua tej uas pab tau sawvdaws. Ib leeg kam pab ib leeg tsis sib cais. Txojkev hlub tseeb, tsis qia yuav ua rau peb muaj lub neej zoo nrog txhua tus. Thiab yog ua li ntawd, peb twb ua tiav txoj kevcai lawm.
Peb yuav tsum nco ntsoov hais tias cov ntseeg Yexus yog cov neeg txhaum uas tau Tswv Yexus muab Nws cov ntshav cawm thiab hloov dua tshiab kom ua tau li tus Tswv ua txhua hnub. Ua neej sib hlub yog cim qhia paub tias peb tseeb yog Vajtswv menyuam, yog cov neeg uas ua tiav txoj kevcai.
Thov Vajtswv,
Tus Tswv, nyuam yaus ua Koj tsaug vim Koj hlub thiab ua rau nyuam yaus paub hlub! Thov kom txhua lo lus hais, haujlwm thiab kev xav ntawm nyuam yaus qhia tawm Koj txojkev hlub, nyuam yaus thiaj ua tiav Koj txoj kevcai thiab ua rau Koj lub npe tau qhuas. Nyuam yaus tuav Tswv Yexus lub npe thov, Amees.
Peb tabtom ua dabtsi kom them tau tus nqi kev hlub hauv peb lub neej txhua hnub?
Nyeem Vajluskub hauv peb lub xyoo: II Vajntxwv 4
Kênh Youtube BHKTHN:
