Klei Aê Diê Blŭ: Rôm 13:8-10
Êlan kliăng: “Đăm đuôm nư arăng ôh, knŏng bi đuôm klei khăp hdơ̆ng diih; kyuadah hlei pô khăp kơ pô riêng gah ñu bi sĭt leh klei bhiăn” (Rôm 13:8).
Klei êmuh ksiêm mĭn: Ya klei Khua ƀĭng kna Y-Pôl čiăng lač tơdah lač: “knŏng bi đuôm klei khăp hdơ̆ng diih”? Hŏng ya êlan klei khăp dưi bi ênŭm klei bhiăn? Si ngă klei khăp jing yuôm hlăm klei hdĭp ih?
Khua ƀĭng kna Y-Pôl mtă kơ jih jang mnuih đăm đuôm nư arăng ôh. Ƀiădah ñu mtrŭt brei bi đuôm klei khăp hdơ̆ng găp (êlan 8). Sa čô đuôm “NƯ” sĭt nik srăng “TLA”. Grăp čô phung đăo mă tŭ leh sơăi klei khăp prŏng mơ̆ng Khua Yang Yêsu, klei êbeh dlai Ñu tuh brei amâo mdei hlăm klei hdĭp grăp čô phung đăo kơ Ñu. Klei drei khăp kơ Ñu amâo năng ôh hŏng klei Ñu khăp leh kơ drei. Kyuanăn, grăp čô drei jing phung đuôm nư klei khăp Ñu sơăi. Knư̆ hdĭp sui ti lăn ala, knư̆ drei đuôm nư klei khăp Ñu lu hĭn. Knŏng mâo sa êlan drei dưi bi mơak kơ Ñu jing brei drei bi khăp hdơ̆ng drei, hdĭp bi êdah klei khăp ti krah phung hơô rup Ñu, hlăm anăn jing phung đăo wăt phung ka đăo ôh. Khua ƀĭng kna Y-Pôl lač, hlei pô khăp kơ Aê Diê leh anăn khăp kơ pô riêng gah msĕ si kơ ñu pô, anăn jing bi sĭt klei bhiăn Khua Yang Yêsu mtă leh “khăp kơ Aê Diê, khăp kơ mnuih” (Y-Mathiơ 22:37-40). Jih jang klei bhiăn yuôm Aê Diê knŏng dưi bi ênŭm hŏng “Klei Khăp” đuč.
Lŏ čuê, Khua ƀĭng kna Y-Pôl yap jih jang klei bhiăn pioh kơ mnuih hdơ̆ng mnuih hlăm Pluh Mta Klei Bhiăn Aê Diê mtă leh kơ phung Israel: “Đăm tlĕ piu ôh; đăm bi mdjiê mnuih ôh; đăm tlĕ dŏ arăng ôh; đăm tluh ôh,” leh anăn jih jang klei bhiăn mkăn dưi klah čŭn sa pruê̆ snei: “Brei ih khăp kơ pô riêng gah ih msĕ si kơ ih pô” (êlan 9).
Măng ai si drei jing ƀiădah amâo mâo ôh sa čô hlăm phung drei bi êmut leh anăn bi êka kơ drei pô, ƀiădah drei duah nanao lu êlan čiăng kơ drei mâo klei hdĭp êbeh dlai, jăk jĭn leh anăn mơak mñai hĭn. Tơdah drei khăp kơ pô riêng gah msĕ si khăp leh kơ drei pô, drei amâo srăng ngă klei bi êka asei mlei, ai tiê leh anăn mngăt digơ̆ ôh. Drei amâo srăng bi mjhua digơ̆ čiăng ba klei tŭ dưn kơ drei pô ôh, ƀiădah drei srăng ngă nanao ya klei drei dưi ngă čiăng ba klei tŭ dưn kơ pô mkăn. Bi đru nanao hdơ̆ng găp amâo djŏ bi ngă jhat ôh. Klei khăp sĭt, amâo mâo čuôt klih ôh srăng atăt drei kơ klei hdĭp jăk hŏng jih jang mnuih. Leh anăn snăn yơh, drei bi ênŭm leh klei bhiăn.
Brei drei hdơr, grăp čô phung đăo jing phung mnuih soh Khua Yang Yêsu bi tui leh, leh anăn bi mlih leh brei jing msĕ si Ñu hĭn grăp hruê. Hdĭp hŏng klei khăp jing gru bi knăl hưn bi sĭt kơ drei jing phung anak Aê Diê sĭt nik, jing phung bi ênŭm klei bhiăn.
Ya drei dôk ngă čiăng bi tla nư klei khăp hdơ̆ng drei hlăm klei hdĭp grăp hruê?
Wah lač: Ơ Khua Yang, kâo bi mni kơ Ih kyuadah Ih khăp leh kơ kâo čiăng kơ kâo dưi hdĭp hŏng klei khăp! Brei grăp boh blŭ kâo blŭ, bruă kâo ngă leh anăn klei mĭn kâo bi êdah klei khăp Ih, čiăng kâo dưi ngă djŏ tui si klei bhiăn leh anăn ba klei bi guh kơang kơ Anăn Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: II Bruă Mtao 4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
