Mathais 9:1-8
1 Yexus txawm nce mus rau hauv nkoj thiab hla hiavtxwv rov los txog rau hauv nws lub nroog, 2 txawm muaj neeg muab pam qhwv ib tug txivneej tuag tes tuag taw kwv tuaj cuag Yexus. Thaum Yexus pom hais tias lawv muaj kev ntseeeg heev li ntawd, Yexus thiaj hais rau tus tuag tes tuag taw ntawd hais tias, “Metub, koj tsis txhob nyuaj siab! Kuv twb zam koj lub txim lawm.”
- Muaj cov xibhwb uas qhia Vajtswv txoj Kevcai qee leej sib tham hais tias, “Tus txivneej no hais lus saib tsis taus Vajtswv!”
- Yexus twb paub tej uas lawv hais lawm, nws thiaj hais rau lawv hais tias,
“Ua li cas nej yuav xav phem ua luaj li? 5 Lo lus uas hais tias, ‘Kuv twb zam koj lub txim lawm,’ lossis lo lus uas hais tias, ‘Koj cia li sawv tsees mus tsev. Ob los no lo twg yuav yoojyim hais dua’? 6 Kuv ua li no qhia rau nej paub hais tias, Neeg Leej Tub muaj hwjchim hauv ntiajteb no zam txim rau neeg.” Yexus thiaj hais rau tus txivneej uas tuag tes tuag taw hais tias, “Koj cia li sawv thiab nqa koj daim pam mus tsev!” 7 Tus txivneej ntawd txawm sawv tsees mus tsev lawm. 8 Thaum sawvdaws pom li ntawd, lawv ntshai kawg thiab lawv ua Vajtswv tsaug, rau qhov Vajtswv twb pub hwjchim rau neeg lawm.
Nqi cim:
“Thaum Yexus pom hais tias lawv muaj kev ntseeeg heev li ntawd, Yexus thiaj hais rau tus tuag tes tuag taw ntawd hais tias, “Metub, koj tsis txhob nyuaj siab! Kuv twb zam koj lub txim lawm.” (Mathais 9:2b).
Lus nug rau sawvdaws xav:
- Yam dabtsi qhia hais tias tus txivneej tuag tes tuag taw muaj kev ntseeg rau ntawm Tswv Yexus?
- Vim licas Tswv Yexus zam txim rau tus tuag tes tuag taw ua ntej kho nws zoo?
- Qhov no muaj lub ntsiab licas?
- Peb yuavtsum ua licas kom coob tug kuj tau zam txim thiab?
Ncua caij nyoog ntawd twb muaj coob tug hnov txog Tswv Yexus lub koob lub npe lawm. Twb yog vim li ntawd tus txivneej uas tuag tes tuag taw cov phoojywg thiaj paub coj nws tuaj cuag Tswv Yexus. Lawv ntseeg hais tias Tswv Yexus yuav kho tau lawv tus phoojywg kom zoo. Tus tuag tes tuag taw ntawd kuj muaj kev ntseeg hais tias, Tswv Yexus muaj fwjchim kho tau nws los ntawm qhov uas nws kam cia cov phoojywg coj nws tuaj cuag Tswv Yexus. Tswv Yexus saib pom tus tuag tes tuag taw thiab nws cov phoojywg txojkev ntseeg (nqi 2b). Thaum Tswv Yexus hais kom tus tuag tes tuag taw sawv thiab nqa daim pam mus tsev ces nws ntseeg thiab ua raws li Tswv Yexus hais, tsis ua xyem xyav, tsis nug dabtsi hlo li (nqi 6-7). Qhov tseemceeb tshajplaws ntawm zaj xwm no tsis yog qhov uas tus tuag tes tuag taw tau Tswv Yexus kho zoo, tiamsis yog qhov uas Tswv Yexus tawm lus txog zam txim rau tus tuag tes tuag taw ntawd. Cov Yixalayees tiam ntawd ntseeg hais tias, kev raug mob raug nkeeg yog tim kev txhaum (Yauhas 9:2-3). Thiab Tswv Yexus tau daws tus tuag tes tuag taw ntawd qhov teebmeem raws li lawv kev ntseeg.
Tswv Yexus xub tawm lus zam txim rau tus tuag tes tuag taw ua ntej, qhia pom hais tias sab ntsujplig thiaj yog qhov tseemceeb ntawm tibneeg. Yog hais tias tsis muaj Tswv Yexus txojkev zam txim, ces yeej daws tsis tau tibneeg tej kev txhaum, thiab tibneeg yuav tsis muaj dua lwm txoj hau kev los sib raug zoo taus nrog Vajtswv. Timthawj Mathais tau siv zaj no los qhia tseeb meej rau cov uas nyeem nws phau ntawv hais tias, Tswv Yexus yeej yog Tus uas muaj fwjchim zam tau tibneeg lub txim txhaum, dhau qhov no yuav pab tau lawv paub yam tshiab txog Tswv Yexus yuav tsum los nyob hauv lawv txojkev ntseeg.
Tibneeg kev zeem paub txog kev txhaum yim hnub yim tsis meej lawm. Ntau tus neeg ua tej yam txhaum tiamsis tsis hnov ntxhov siab hlo li. Tibneeg kuj tsis paub hais tias kev txhaum yog lub hauv paus ntawm tej teebmeem nyob hauv lubneej. Zaj kawm hnub no yuav pab kom peb paub hais tias, yog daws tsis tau teebmeem ntawm lub txim txhaum ua ntej, ces yeej daws tsis tau lwm teebmeem hlo li. Thiab tsuas muaj Tswv Yexus tib leeg xwb thiaj muaj fwjchim zam txim tau rau tibneeg. Peb txhua tus puavleej cheemtsum tau Tswv Yexus zam txim ntawm txhua hnub zoo li zaj thov Vajtswv uas Tswv Yexus qhia: “Thov Koj zam txim rau peb…” Tsis yog tsuas muaj peb cheemtsum tau Tswv Yexus zam txim xwb, tiamsis tas nrho tibneeg ntiajteb kuj cheemtsum tau txais Tswv Yexus kev zam txim. Peb yog cov uas tau txais kev zam txim lawm, peb yuavtsum kub siab lug tawm mus qhia txog Tswv Yexus txojkev zam txim rau tej neeg ib ncig ntawm peb, tsis hais ntawm chaw ua haujlwm, ntawm tsev kawm ntawv, lossis rau cov uas Vajtswv coj tuaj cuag peb… kom lawv tau txais kev zam txim zoo ib yam li peb tau lawm thiab.
Peb puas tseg sijhawm los lees tej kev txhaum uas peb tau ua rau Vajtswv thiab thov nws zam txim rau peb lawm tau?
Thov Vajtswv:
Tswv Yexus, Koj yog tus tso nyuamyaus dim hauv txoj kev tsaus ntuj ntawm kev txhaum los. Thov koj txhawb nyuamyaus ua lubneej yog ib tug timkhawv, ua siab tawv qhia Koj txojkev zam txim rau lwm tus tau paub. Ameeg.
Email: kawmvajluskubtxhuahnub@gmail.com
Kênh Youtube BHKTHN:
