Klei Aê Diê Blŭ: Y‑Mathiơ 9:1-8
Êlan kliăng: “Tơdah Yêsu ƀuh klei đăo phung anăn, Ñu lač kơ êkei êwiên, “Ơ dam, mơak bĕ ih, kyuadah klei soh ih pap brei leh” (Y‑Mathiơ 9:2b).
Klei êmuh ksiêm mĭn: Ya mta klei brei ƀuh êkei êwiên mâo klei đăo kơ Khua Yang Yêsu? Ya ngă Khua Yang pap brei kơ klei soh gơ̆ êlâo kơ bi hlao gơ̆? Mta klei anei ya čiăng lač? Si drei ngă čiăng kơ lu mnuih ăt dưi mâo klei bi mtlaih mơh?
Klei hmư̆ hing kơ Khua Yang Yêsu hlăk anăn lar mâo lu mnuih thâo. Kyuanăn yơh phung mah jiăng êkei êwiên kkung ba ñu kơ Khua Yang Yêsu. Diñu đăo kơ Khua Yang srăng bi hlao brei kơ mah jiăng diñu. Êkei êwiên ăt mâo klei đăo kơ klei myang Khua Yang bi hlao ñu mơh kyuanăn ñu tŭ ư brei mah jiăng ñu kkung ba ñu kơ Khua Yang. Khua Yang ƀuh klei đăo ñu leh anăn phung mah jiăng ñu (êlan 2b). Boh nik nak hlăk Khua Yang lač brei ñu kgŭ dơ̆ng kkung jhưng ñu ba wĭt kơ sang, snăn ñu đăo leh anăn tui ngă mtam amâo mâo klei lŏ êmuh wĭt ôh (êlan 6-7). Mta kñăm kơ klei yăl dliê anei amâo djŏ kơ klei Khua Yang Yêsu bi hlao êkei êwiên anăn ôh, ƀiădah kơ klei Khua Yang lač klei soh gơ̆ mâo klei pap brei leh. Phung Israel hlăk anăn mĭn klei ruă duam jing boh mă tŭ kyua mơ̆ng klei soh (Y‑Yôhan 9:2-3). Leh anăn Khua Yang Yêsu mgaih mkra brei klei soh kơ êkei êwiên, čiăng lač kơ phŭn knhal klei soh tui si klei diñu mĭn.
Khua Yang Yêsu êlâo hĭn lač kơ klei pap brei klei soh êkei êwiên brei ƀuh, mta klei čiăng yuôm hĭn jing mngăt mnuih. Tơdah amâo mâo ôh kyua klei Khua Yang Yêsu pap brei klei soh, snăn klei soh mnuih amâo mâo klei mgaih mkra ôh, leh anăn mnuih amâo mâo ênhă êlan čiăng dưi bi grăng hŏng Aê Diê ôh. Khua ƀĭng kna Y‑Mathiơ yua klei yăl dliê anei čiăng lač klă hŏng phung dlăng hră ñu, Khua Yang Yêsu yơh jing Pô mâo klei dưi pap brei klei soh mnuih kñăm čiăng đru diñu thâo kral hĭn kơ Khua Yang hlăm knhuah êlan klei đăo pô.
Anak mnuih ƀrư̆ hruê ƀrư̆ bi luč klei thâo kral kơ klei soh. Lu mnuih ngă klei wê ƀiădah ăt kăn mâo klei bi huĭ hlăm ai tiê rei. Arăng ăt kăn thâo ƀuh, klei soh yơh jing phŭn knhal kơ jih mta klei boh hlăm klei hdĭp. Klei hriăm hruê anei đru drei thâo kral, tơdah klei soh amâo mâo mgaih mkra snăn amâo mâo mta klei mkăn dưi mgaih mkra ôh. Leh anăn knŏng hjăn Khua Yang Yêsu yơh jing Pô dưi pap brei kơ klei soh mnuih. Grăp čô phung drei čiăng sơăi dưi mâo Khua Yang Yêsu pap brei klei soh grăp hruê msĕ si klei wah lač Khua Yang mtô: “Pap brei kơ klei soh hmei…” Amâo djŏ ôh knŏng hjăn drei čiăng mâo klei Khua Yang Yêsu pap brei klei soh, ƀiădah tar ƀar lăn ala ăt čiăng mâo klei Ñu pap brei klei soh msĕ mơh. Jing phung tuôm mâo leh klei pap brei klei soh, brei drei hur har nao hưn klei Khua Yang Yêsu dưi pap brei klei soh kơ phung riêng gah drei, hlăm anôk Khua Yang dưm drei ti sang mă bruă, sang hră, amâodah hlăm mmông găl grăp hruê Khua Yang brei… čiăng kơ lu mnuih dưi mâo myun mă tŭ klei pap brei klei soh msĕ si drei.
Si ngă drei tuôm pioh mmông hưn klei soh drei ngă leh hŏng Khua Yang mơ̆, leh anăn tuôm kwưh akâo Khua Yang pap brei klei soh mơ̆?
Wah lač: Ơ Khua Yang, jing Pô bi mtlaih leh kâo mơ̆ng klei myang klei mmăt klei soh. Akâo kơ Ih mtrŭt kâo hdĭp nanao hŏng klei mĭn hưn klei đăo, jhŏng hưn klei Khua Yang Yêsu dưi pap brei klei soh kơ arăng mkăn.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Bruă Mtao 11:1-20
Kênh Youtube BHKTHN:
