Daniyees 9:1-9
Nqe cim.
“Kuv kub siab lug thov tus Tswv uas yog Vajtswv. Kuv yoo mov, kuv hnav ntaubtsaj thiab kuv zaum hauv qhov tshauv.” (Daniyees 9:3)
Lus nug rau sawvdaws xav.
– Vim licas Tus Cevlus Daniyees thiaj pib taij thov Vajtswv cawm nws haivneeg?
– Nws taij thov Vajtswv ntawm tus cwjpwm zoo licas?
– Peb kawm tau Tus Cevlus Daniyees tus qauv twg hauv kev thov Vajtswv?
Tus Cevlus Daniyees zoo li ib tug tubrog hauv kev thov Vajtswv (Daniyees 6:10). Nws kuj yog ib tug neeg pheej tshawb nrhiav thiab paub tus Tswv tej lus qhia tshwm dhau ntawm Tus Cevlus Yelemis hais tias nws haivneeg yuav tau dim tomqab uas ua cev qhev 70 lub xyoo. Tus Tswv tej lus cogtseg cawmdim txhawb nws lub zog thov thiab taij tus Tswv. Nyob hauv tej lus thov, Tus Cevlus Daniyees ntshaw kom tus Tswv ua tiav Nws tej lus cogtseg. Tus Cevlus Daniyees hais tias: “Kuv kub siab lug thov tus Tswv uas yog Vajtswv. Kuv yoo mov, kuv hnav ntaubtsaj thiab kuv zaum hauv qhov tshauv.” – qhov no qhia pom kev txiav txim siab loj heev nyob hauv nws tej lus thov.
Txawm tau suav hais tias yog ib tug ntawm peb tug neeg ncajncees nyob hauv ntiajteb (Exekees 14:14) los Tus Cevlus Daniyees yeej tseem “yoo mov, hnav ntaubtsaj thiab zaum hauv qhov tshauv”. Nws zeem paub hais tias: “Peb tsa ncauj thov koj tsis yog vim peb yog neeg ncaj ncees, tiamsis vim koj yog tus uas hlub peb thiab yog tus ncaj ncees” (Daniyees 9:18). Tej lus thov lees txim qhia tshwm Tus Cevlus Daniyees nplooj siab txo hwjchim thaum los cuag tus Tswv. Nws paub hais tias tej teebmeem uas haivneeg Yixalayees raug yog vim lawv tej kev txhaum, tsis yog Vajtswv xav kom lawv raug; Vajtswv ibtxwm yog tus ncajncees. Vim li ntawd, nws tsis cem, tsis yws tiamsis nws lees tej kev txhaum tawm (nqe 5-6). Nws tsis qaij, tsis hais daws lossis tsis liam txim tiamsis nws lees hais tias lub txim ntawd yog nws tus kheej, nws haivneeg thiab cov thawjcoj lub txim; nws hais tias: “Tus Tswv, peb cov vajntxwv, peb cov nomtswv thiab peb sawvdaws tau ua phem ua qias rau koj” (nqe 8). Nws taij thov tus Tswv kawg siab kawg ntsws ntau zaug hais tias: “Tus TSWV, thov koj mloog peb tej lus thov. Tus TSWV, thov koj zam peb lub txim. Tus TSWV, thov koj mloog thiab teb peb tej lus thov! Tus TSWV, thov koj tsis txhob tos ntev, sawvdaws thiaj paub hais tias koj yog Vajtswv! Lub nroog thiab cov neeg no yog koj tug!” (Daniyees 9:19). Ib tug neeg thov kawg siab kawg ntsws thiab txo hwjchim zoo li ntawd yuav ua cas tus Tswv thiaj tsis hlub thiab txib timtswv los qhia thaum tabtom thov Vajtswv taus! (Daniyees 9:20-27).
Tus Cevlus Daniyees tej lus thov los ntawm nplooj siab quaj lees kev txhaum, yoo mov, tau ua ib tug qauv zoo rau peb txog kev thov Vajtswv tas siab ntsws nrog rau kev totaub Vajtswv Txojlus thiab nplooj siab txo hwjchim. Ntau zaug peb thov Vajtswv tiamsis vim tsis totaub Vajtswv Txojlus peb tsuas thov raws tus kheej siabnyiam xwb. Muaj coob tug totaub Vajtswv Txojlus tiamsis ho tsis thov Vajtswv tas siab ntsws. Lossis thov Vajtswv tiamsis tsis txo hwjchim los zeem paub tus kheej tej kev txhaum. Tej lus thov zoo li ntawd yuav tsis tau tus Tswv mloog, hlub thiab teb. Thov tus Tswv pub rau peb niaj hnub nyob ze Nws Txojlus thiab tas siab ntsws thov Vajtswv pub rau peb haivneeg, peb Pawg Ntseeg thiab peb lub cuabyig.
Thov Vajtswv,
Leej Txiv Dawbhuv! Thaum saib mus rau Tus Cevlus Daniyees tus qauv thov Vajtswv, nyuamyaus pom tias tus kheej tseem ua tsis tau zoo! Thov pab nyuamyaus paub tas siab tas ntsws taij thov tej yam haum Koj siab kom nyuam yaus tej lus thov tau Koj teb. Nyuam yaus tuav Yexus Khetos lub npe thov, Amees.
Peb pom tus kheej kev thov Vajtswv zoo licas? Peb yuav pauv hloov licas?
Nyeem Vajluskub hauv peb lub xyoos: Pajlug 18
Kênh Youtube BHKTHN:
