Klei Aê Diê Blŭ: Y‑Đaniel 9:1‑9
Êlan kliăng: “Snăn kâo wir ƀô̆ phă Khua Yang Aê Diê čiăng duah Ñu hŏng klei wah lač leh anăn klei kwưh hŏng klei kăm ƀơ̆ng huă leh anăn hơô klŭng ƀui hbâo.” (Y‑Đaniel 9:3)
Klei êmuh ksiêm mĭn: Ya ngă khua pô hưn êlâo Y‑Đaniel kčưm dơ̆ng wah lač kơ klei bi mtlaih găp djuê ƀuôn sang ñu? Hŏng si ai tiê klei mĭn ñu wah lač leh? Ya klei drei hriăm mơ̆ng khua pô hưn êlâo Y‑Đaniel bi hmô hlăm klei wah lač?
Khua pô hưn êlâo Y‑Đaniel jing sa čô kahan wah lač (Y‑Đaniel 6:10). Ñu ăt jing pô tui ksiêm leh anăn thâo săng Klei Aê Diê Blŭ hŏng khua pô hưn êlâo Y‑Yêrêmi snei, găp djuê ƀuôn sang ñu srăng mâo klei bi mtlaih leh ruê̆ jih 70 thŭn jing mnă. Klei Aê Diê ƀuăn srăng bi mtlaih kčŭt ai tiê ñu kwưh akâo wah lač hŏng Aê Diê. Hlăm klei wah lač, ñu bi êdah ai tiê hmăng hmưi kơ klei Aê Diê ƀuăn dưi bi sĭt, tơdah ñu lač: “Kâo wir ƀô̆ phă Khua Yang Aê Diê čiăng duah Ñu hŏng klei wah lač leh anăn hŏng klei kwưh” – brei ƀuh klei ñu čuăn ai tiê hlăm klei ñu wah lač.
Wăt tơdah arăng yap ñu jing sa hlăm tlâo čô kpă ênô ti lăn ala (Y‑Êsêkiêl 14:14) ƀiădah khua pô hưn êlâo Y‑Đaniel ăt “kăm ƀơ̆ng huă leh anăn hơô klŭngƀui hbâo”. Ñu thâo săng snei: “Hmei kwưh kơ Ih amâo djŏ ôh kyua klei kpă ênô hmei pô, ƀiădah kyua klei pap prŏng Ih” (Y‑Đaniel 9:18). Klei kmhal kơ klei soh bi êdah ai tiê ñu luă gŭ tơdah nao giăm Khua Yang. Ñu thâo snei, klei knap mñai kbiă hriê kyua mơ̆ng klei soh phung ƀuôn sang Israel, amâo djŏ klei Aê Diê čiăng ôh; Ñu jing kpă ênô kluôm dhuôm. Kyuanăn hrô kơ klei krao blŭ dŭñ dŭñ, ñu hưn klei soh ñu hŏng klei sĭt klă (êlan 5‑6). Ñu amâo dêč ôh, amâo mgang kơ ñu pô amâodah mplĕ klei soh kơ pô mkăn ôh, ƀiădah tŭ klam jih kơ ñu pô, ƀuôn sang Aê Diê leh anăn phung khua gĭt gai, “Ơ Yêhôwa hmei yơh mâo klei hêñ, phung mtao hmei, phung khua hmei, leh anăn phung aê hmei, kyuadah hmei ngă soh leh hŏng Ih.” (êlan 8). Ai tiê ñu hur har iêô kwưh kơ Khua Yang lu blư̆: “Ơ Yêhôwa hmư̆ bĕ; Ơ Yêhôwa pap brei bĕ; Ơ Yêhôwa hmư̆ leh anăn ngă bĕ; đăm lŏ krưĭ ôh kyua Anăn Ih Pô, Ơ Aê Diê kâo, kyua ƀuôn Ih leh anăn phung ƀuôn sang Ih arăng pia hŏng Anăn Ih!” (Y‑Đaniel 9:19). Sa čô mnuih hur har leh anăn luă gŭ msĕ snăn si Khua Yang amâo khăp lĕ, leh anăn Khua Yang tiŏ nao dĭng buăl jăk nao mtô kơ ñu mtam, hlăk êjai ñu dôk wah lač! (Y‑Đaniel 9:20‑27).
Klei khua pô hưn êlâo Y‑Đaniel wah lač hŏng ai tiê kmhal sĭt kơ klei soh, kăm ƀơ̆ng huă, brei leh kơ drei sa klei bi hmô kơ ai tiê klei mĭn wah lač hŏng jih ai tiê mbĭt hŏng thâo săng klei Aê Diê Blŭ, luă gŭ leh anăn hur har hlăm ai tiê. Lu blư̆ drei wah lač ƀiădah kƀah thâo săng Klei Aê Diê Blŭ kyuanăn drei khăng wah lač tui si klei mĭn drei pô. Lu mnuih thâo săng Klei Aê Diê Blŭ mơh ƀiădah amâo jih ai tiê wah lač ôh. Amâodah wah lač ƀiădah amâo luă gŭ thâo kral klei soh pô ôh. Klei wah lač msĕ snăn Khua Yang amâo hmư̆, amâo khăp leh anăn amâo wĭt lač ôh. Akâo kơ Khua Yang brei drei sĭt suôr nanao hŏng Klei Aê Diê Blŭ leh anăn jih ai tiê wah lač brei kơ phung găp djuê ƀuôn sang, kơ Phung Sang Aê Diê leh anăn kơ gŏ sang drei pô.
Si drei thâo kral klei kƀah drei tơdah wah lač? Si drei bi mlih?
Wah lač: Ơ Ama Doh Jăk! Mtrang kâo pô hŏng klei khua pô hưn êlâo Y‑Đaniel bi hmô kơ klei wah lač, kâo ƀuh kâo pô kƀah lu snăk! Akâo kơ Khua Yang brei kâo hŏng jih ai tiê wah lač tui si klei Ama čiăng nanao, čiăng kơ klei kâo kwưh akâo Khua Yang srăng wĭt lač. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Bi Hriêng 18
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
