Klei Aê Diê Blŭ: Y-Yêrêmi 44:11-14
Êlan kliăng:“Đăm yap ih pô thâo mĭn ôh; huĭ mpŭ bĕ kơ Yêhôwa leh anăn đuĕ bĕ mơ̆ng klei jhat” (Klei Bi Hriêng 3:7)
Klei êmuh ksiêm mĭn: Boh blŭ “kyuanăn” kŏ êlan 11 ya klei čiăng lač? Ya ngă phung Yuđa ruah nao dôk ti čar Êjip? Boh jhat ya jing? Ya klei hriăm drei mâo hlăm klei drei pô čuăn ruah?
Êlan 11 čih yăl dliê kơ klei Yêhôwa lač djŏ kơ klei Ñu bi kmhal kčưm hŏng boh blŭ “kyuanăn” brei ƀuh jih jang boh jhat phung Yuđa srăng tŭ kbiă mơ̆ng klei soh diñu ngă čih leh hlăm Y-Yêrêmi 44:1-10. Êdei ti klei phung kahan mơ̆ng čar Dưr kdơ̆ng blah, jih jang phung Yuđa bŏ hŏng klei huĭ. Klei huĭ bi bŏ klei mĭn tơl jih jang phung ăt dôk ruê̆ klei bi blah wơr bĭt hĕ klei Aê Diê tuôm ƀuăn leh hŏng ƀăng êgei Khua pô hưn êlâo Y-Yêrêmi diñu srăng mâo klei êđăp ênang tơdah ăt dôk hlăm čar, wăt tơdah dôk ti gŭ klei phung Kalđê kiă kriê dưn. Yêhôwa pô ƀuăn rơ̆ng snei: “Kâo srăng brei klei pap kơ diih, čiăng kơ ñu srăng pap kơ diih leh anăn brei diih dôk hlăm čar diih pô”, kyuanăn amâo brei diñu huĭ ôh kơ mtao čar Ƀaƀilôn (Y-Yêrêmi 42:10-12). Ƀiădah msĕ si ală klei đăo diñu mmăt leh tơl diñu amâo dưi ƀuh ôh klei jăk tui si klei Pô Sĭt Suôr ƀuăn leh, mơ̆ng anăn atăt truh kơ klei diñu huĭ leh anăn čuăn tui hlue êlan ală diñu pô čiăng. Diñu ruah klei gao asăp Aê Diê tơdah ruah nao dôk ti čar Êjip, jing čar Aê Diê tuôm bi mtlaih leh phung aê diñu mơ̆ng klei jing hlŭn (Y-Yêrêmi 43:5-7).
Ya ngă phung Yuđa čuăn ngă msĕ snăn lĕ, kyuadah ală kđeh diñu ƀuh tơdah diñu nao kơ čar Êjip tinăn diñu srăng mâo klei êđăp ênang, bi tơdah ăt dôk hlăm čar năng ai diñu srăng djiê hŏng đao gưm. Ƀiădah lĕ, Aê Diê yua leh Khua pô hưn êlâo Y-Yêrêmi hưn kơ phung Yuđa thâo boh jhat kơ hlei pô ruah leh ngă tui si klei pô čiăng jing “srăng djiê hlăm čar Êjip; diñu srăng djiê hŏng đao gưm leh anăn hŏng klei ư̆ êpa” (êlan 12-14), amâo mâo sa čô lŏ wĭt ôh “knŏng đa đa phung đuĕ” đuč. Anăn jing phung arăng mgô̆ nao kơ čar Êjip wăt tơdah digơ̆ amâo čiăng nao ôh msĕ si Khua pô hưn êlâo Y-Yêrêmi, pô čih hră Y-Ƀaruk leh anăn jih jang phung dĭng buăl khua kiă kriê Y-Gêdalia.
Dôk ti anăp sa klei čuăn ruah, thâodah drei knang kơ klei bi knal leh anăn klei thâo mĭn drei pô amâodah knang kơ klei drei đăo kơ Aê Diê srăng čuăn ruah. Phung Yuđa ruah leh êlan tui si ală diñu pô čiăng, amâo gưt asăp kơ Yêhôwa ôh. Mĭndah ti čar Êjip srăng mâo klei êđăp ênang, ƀiădah ti knhal tuč jing klei knap mñai leh anăn klei djiê. Y-Salômôn, sa čô mtao thâo mĭn mtô leh snei: “Đăm yap ih pô thâo mĭn ôh; huĭ mpŭ bĕ kơ Yêhôwa leh anăn đuĕ bĕ mơ̆ng klei jhat.” Klei knap mñai phung Yuđa tŭ bi êrâo grăp čô drei brei êbat hŏng klei đăo wăt tơdah mâo lu klei drei ka thâo săng jih dưn ƀiădah đăo sĭt klei jăk leh anăn klei pap srăng tui hlue drei tơdah drei ruah klei gưt asăp kơ Aê Diê, Pô sĭt suôr leh anăn bŏ hŏng klei khăp.
Drei khăng knang kơ klei knhâo, klei thâo mĭn amâodah knang kơ klei đăo kơ Aê Diê hĕ tơdah ngă sa klei čuăn ruah?
Wah lač: Ơ Aê Diê, Pô sĭt suôr leh anăn Pô bŏ hŏng klei khăp! Đru kâo amâo tui hlue êlan tui si ală kâo pô čiăng ôh, ƀiădah êbat nanao hŏng klei đăo leh anăn gưt kơ klei Ih mtă čiăng kơ kâo dưi mă tŭ jih klei jăk Ih ƀuăn brei kơ kâo tơdah kâo gưt asăp Ih.
Dlăng Klei Aê Diê Blŭ hlăm tlâo thŭn: Y-Luk 4:14-44
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
