Klei Aê Diê Blŭ: Hêbrơ 12:12-15
Êlan kliăng: “Tui duah bĕ klei êđăp ênang hŏng jih jang mnuih, leh anăn klei doh jăk, tơdah kƀah klei anăn amâo mâo sa čô srăng ƀuh Khua Yang ôh” (Hêbrơ 12:14)
Klei êmuh ksiêm mĭn: Si hdră êlan hgăm pô čih hră mơĭt Hêbrơ hưn mdah, čiăng dưi djă pioh klei bi hriăm mjuăt klei hdĭp mngăt tui duah klei jing doh jăk? Ya jing boh tŭ jhat mơ̆ng klei amâo jing doh jăk? Si klei diih dôk tui duah klei jing doh jăk?
Tơdah sa čô đăo kơ Khua Yang Yêsu, pô anăn dưi yap jing doh jăk kyuadah dôk hlăm anôk bruă sa čô mnuih doh jăk jing mnuih pioh mdê hjăn kơ Aê Diê. Anăn jing doh jăk anôk bruă. Ƀiădah tơdah dôk hdĭp hŏng Khua Yang, pô anăn brei jing doh jăk hlăm klei dôk dơ̆ng ƀơ̆ng huă grăp hruê. Anei jing sa klei čoh cuăn brei phung anak ƀuôn sang Aê Diê djă pioh klei bi hriăm mjuăt klei hdĭp mngăt čiăng tui duah klei jing doh jăk “Tui duah bĕ klei êđăp ênang hŏng jih jang mnuih, leh anăn klei doh jăk, tơdah kƀah klei anăn amâo mâo sa čô srăng ƀuh Khua Yang ôh.”. Pô čih hră mơĭt Hêbrơ bi êdah dŭm ênhă êlan hdĭp čiăng dưi djă pioh klei bi hriăm mjuăt klei hdĭp mngăt tui duah klei jing doh jăk.
Tal sa, êlan 12 hưn mdah phung êmăn amâo lŏ mâo ai hŏng kngan awăt leh anăn kơŭt êun brei dưm klei diñu čang hmăng hlăm Khua Yang čiăng dưi yơr kngan leh anăn lŏ bi kpă kơŭt (Y-Êsai 35:3). Hlei pô dôk êdu ai, mngăt ai tiê dôk êdu awăt brei kgŭ dơ̆ng, djă păn klei Aê Diê ƀuăn, găn gao klei lông dlăng čiăng dưi djă pioh klei bi hriăm mjuăt klei hdĭp mngăt čhuang êbat phă anăp.
Tal dua, phung đăo kơ Krist mâo bruă klam bi đru kơrŭ hdơ̆ng găp, mnuih ktang brei đru mnuih awăt klei hdĭp mngăt čiăng đăm lĕ êbuh ôh (êlan 13). Jih jang drei čiăng mâo klei dưi bi hlao sơăi leh anăn dôk kjăp čiăng dưi jing doh jăk nanao hlăm klei hdĭp grăp hruê (Klei Bi Hriêng 4:26).
Tal tlâo, phung anak ƀuôn sang Aê Diê brei “tui duah bĕ klei êđăp ênang hŏng jih jang mnuih, leh anăn klei doh jăk,” (êlan 14a). êpul êya phung đăo kơ Krist brei gĭr djă pioh klei êđăp ênang hdơ̆ng găp. Khua ƀĭng kna Y-Pôl ăt mtă mtăn klei anei hlăm Rôm 12:18, “Tơdah dưi, gĭr bĕ, dôk êđăp ênang hŏng jih jang mnuih.” Anei jing sa klei lông dlăng prŏng kơ klei dôk hdĭp jing doh jăk kơ phung đăo kơ Krist.
Phung anak ƀuôn sang Aê Diê brei tui duah klei jing doh jăk (êlan 14b). Phung mnuih čiăng mâo klei bi mguôp hŏng Khua Yang brei bi êmut kheh kơ klei jhat ƀai leh anăn tui duah klei jing doh êngeh (Y-Mathiơ 5:8). Kyuadah amâo mâo ôh sa mta klei soh dưi dôk ti anăp Aê Diê, kyuanăn phung đăo kơ Krist brei dôk hdĭp doh jăk leh anăn doh êngeh grăp hruê. Klei anei jing sa mta klei mtrŭt čiăng kơ drei djă pioh klei bi hriăm mjuăt klei hdĭp mngăt tui duah klei jing doh jăk ară anei mtam leh anăn nanao. Tui duah klei jing doh jăk jing klei čuăn ai tiê dôk hdĭp gưt asăp Klei Aê Diê Blŭ, ñĕ đuĕ kơ klei jhat ƀai, ngă klei jăk kơ jih jang mnuih tui si klei Aê Diê Blŭ mtô. Tơdah sa čô mnuih tui duah klei êđăp ênang leh anăn tui duah klei jing doh jăk, mnuih anăn ăt uêñ mĭn kơ klei hdĭp mngăt pô mkăn mơh. Brei drei răng bi đru hdơ̆ng găp dưi găn gao klei lông dlăng čiăng kơ “đăm brei ôh sa čô kƀah mă tŭ klei Aê Diê pap” (êlan 15). Bi hriăm mjuăt klei hdĭp mngăt jing sa klei bi blah hlăm mngăt, brei grăp čô drei knang kơ klei pap Khua Yang čiăng dưi găn gao jih klei lông dlăng, bi đru hdơ̆ng găp gĭr dôk hdĭp doh jăk grăp hruê.
Si ngă drei uêñ mĭn tui duah klei hdĭp jing doh jăk grăp hruê mơ̆?
Wah lač: Ơ Khua Yang, akâo Ih đru kâo dôk răng nanao ti anăp klei jhat ƀai, knang kơ klei pap Khua Yang găn gao jih klei lông dlăng hlăm klei bi hriăm mjuăt klei hdĭp mngăt leh anăn čuăn ai tiê tui duah klei doh jăk hlăm êlan tui hlue Khua Yang grăp hruê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Kbiă 10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
