Klei Aê Diê Blŭ: Klei Bi Hriêng 19:1
Êlan kliăng: “Mnuih ƀun ƀin dôk dơ̆ng ƀơ̆ng huă ênuah ênô jing jăk hĭn kơ sa čô mnuih mluk blŭ luar.” (Klei Bi Hriêng 19:1)
Klei êmuh ksiêm mĭn: Ya dua rup bi hmô mtao Salômôn yua čiăng bi êdah kơ klei bi mklăk hlăm êlan Klei Bi Hriêng anei? Klei bi hmô anei atăt kơ ya klei sĭt nik? Ya ngă klei sĭt nik anei jing yuôm leh anăn amâo dưi kƀah ôh hlăm knhuah hdĭp phung đăo?
Klei hdĭp mâo lu klei hrŏng ruah. Mâo klei hrŏng ruah amâo dưi kƀah ƀiădah amâo jêč ruăt ôh, leh anăn mâo klei hrŏng ruah jing yuôm êdimi, msĕ si hlăm êlan Klei Bi Hriêng anei, anăn jing ruah êlan “dôk dơ̆ng ƀơ̆ng huă”, klei blŭ phŭn jing “êbat nao”, lač kơ sa knhuah hdĭp, sa klông čuăn nao, sa klei ngă nanao grăp hruê.
Mtao Salômôn brei klei mtă mtăn čiăng dưi mâo sa klei hdĭp thâo mĭn leh anăn mâo klei Khua Yang hơêč hmưi, anăn jing brei tui tiŏ klei ênuah ênô. Boh blŭ mblang jing “ênuah ênô” (Klei Bi Hriêng 2:7; 10:9, 29; 13:6; 20:7; 28:6; mkă hŏng 29:10) hưn mdah kơ klei myơr bŏ ênŭm leh anăn kluôm dhuôm asei mlei drei pô kơ Aê Diê, atăt truh kơ klei hŏng jih ai tiê tui hlue Khua Yang leh anăn amâo tuôm phưi lui klei tui duah klei Aê Diê čiăng hlăm djăp mta kdrêč klei hdĭp drei. “Ênuah ênô” amâo mblang jing klei kpă ênô klă kluôm khut khat ôh ƀiădah jing klei mă bruă kơ Aê Diê kluôm ênŭm leh anăn hŏng jih ai tiê.
Mtao Salômôn yua dua ping bi hmô kơ klei bi mklăk hdơ̆ng diñu: “mnuih dôk dơ̆ng ƀơ̆ng huă ênuah ênô” hŏng “mnuih blŭ luar”; leh anăn “mnuih ƀun ƀin” hŏng “mnuih mluk”. Klei bi hmô bi mklăk anei brei ƀuh tơdah “mnuih blŭ luar” jing “mnuih mluk” snăn čiăng lač kơ “mnuih dôk dơ̆ng ƀơ̆ng huă ênuah ênô” jing mnuih thâo mĭn. Leh anăn tơdah mnuih “dôk dơ̆ng ƀơ̆ng huă ênuah ênô” jing “ƀun ƀin” snăn čiăng lač “mnuih mluk” jing mnuih mdrŏng kyua hŏng klei ñu “blŭ luar” (Klei Bi Hriêng 28:6). Klei bi hmô anei amâo lač kơ klei ƀun ƀin jing jăk hĭn kơ mdrŏng sah ôh, ƀiădah čiăng kñăm kơ knhuah kpă ênô. Klei mdrŏng sah amâo jing jhat ôh ƀiădah klei hrưn ktưn čiăng jing mdrŏng tơl amâo lŏ mđing uêñ kơ hnơ̆ng čuăn knhuah kpă ênô ôh jing klei jhat, hlăm klei jing msĕ anei jăk hĭn ƀun ƀin mơh, knhuah hdĭp kpă ênô jing yuôm hĭn kơ klei mâo lu ngăn drăp.
Wăt tơdah knhuang klei hdĭp mnuih thâo mĭn tăp năng gun kpăk hŏng kđông mnêč lông dlăng kyua klei “blŭ luar” mơ̆ng “mnuih mluk” – jing “mluk” kơ klei thâo săng, ƀiădah pral hmăr kơ klei jhat ƀai – ƀiădah mnuih thâo mĭn, mnuih huĭ mpŭ kơ Aê Diê, mnuih mâo klei hdĭp doh jăk ăt srăng mâo boh tŭ jăk hĭn kơ “mnuih mluk” (Klei Bi Hriêng 20:7) kyuadah amâo mâo ôh ya mta klei luar mplư, klei jhat ƀai dưi mdăp nanao. Mnuih êbat hŏng klei “ênuah ênô” năng ai srăng găn klei ƀun ƀin leh anăn knap mñai ti lăn ala anei, ƀiădah mnuih mdrŏng amâo hdĭp kpă ênô, amâo huĭ mpŭ kơ Aê Diê srăng tŭ klei knap mñai nanao hlŏng lar. Kyuanăn, brei drei êbat hŏng klei đăo, đăm êbat ôh tui si klei ală ƀuh (II Kôrantô 4:18), grăp hruê duh kơ knhuah hdĭp tui tiŏ klei ênuah ênô leh anăn huĭ mpŭ kơ Aê Diê. Đăm brei klei hing ang, klei tŭ dưn, klei dưi ênuk anei mplư drei ôh huĭdah ti hruê knhal tuč Khua Yang srăng lač drei jing mnuih jhat ƀai!
Si drei dôk duh kơ knhuah hdĭp ênuah ênô?
Wah lač: Ơ Khua Yang, dôk hdĭp ti krah lăn ala bŏ hŏng lu mta klei mplư kơ klei hing ang, klei tŭ dưn, klei dưi, akâo Khua Yang krơ̆ng kâo hlăm êlan kpă ênô, đru kâo êbat kjăp hlăm êlan tui duah ênoh klei hdĭp mngăt myang yuôm bhăn leh anăn adôk nanao hlŏng lar.
Dlăng Klei Aê Diê Blŭ hlăm tlâo thŭn: Y‑Đaniel 7:15‑8:22
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
