II Xwmtxheej 18:3-6
Nqe cim:
“Nej yuav tsum xyaum ua raws li Vajtswv Txojlus, tsis yog ua cov mloog xwb. Yog nej mloog xwb, tsis ua raws li, ces kuj yog nej rov dag nej” (Yakaunpaus 1:22)
Lus nug rau sawvdaws xav:
- Thaum hnov Vajntxwv Ahaj tej lus yaum, Vajntxwv Yehausafas txiavtxim siab licas?
- Tus cwjpwm tsis ua raws li Vajtswv Txojlus ntawm peb hom tibneeg hauv ntu Vajluskub no yog dabtsi?
- Peb kawm tau zaj kawm dabtsi dhau ntawm Vajntxwv Yehausafas?
Txawm twb coglus rau Vajntxwv Ahaj hais tias: “Peb yuav koom tes nrog koj” los Vajntxwv Yehausafas kuj tseem xav nug tus Tswv ua ntej saib puas tsimnyog mus ntaus rog. Nws thiaj hais rau Vajntxwv Ahaj hais tias, “Tiamsis peb yuav tsum xub nug tus TSWV tso.” Vajntxwv Ahaj thiaj hu nws cov cevlus plaub puas leej tuaj nug. Lawv txhua tus puavleej teb hais tias, “Koj cia li mus tua lub nroog ntawd, Vajtswv yuav pub kom koj tua yeej xwb.”
Vim ntseeg hais tias yog tau Vajtswv pab ces yuav kovyeej yeebncuab, tej vajntxwv thiaj pheej nug Vajtswv ua ntej yuav mus ntaus rog. Vajntxwv Ahaj ua raws li Vajntxwv Yehausafas tej lus, nws thiaj hu cov cevlus tuaj nug, tiamsis tej lus lawv teb tsis txaus Vajntxwv Yehausafas ntseeg, nws thiaj nrhiav dua lwm tus cev Vajtswv lus los nug. Vajluskub tsis sau txog qhov uas vim licas Vajntxwv Yehausafas tsis ntseeg lawv lus, tej zaum vim nws twb paub Vajntxwv Ahaj cov cevlus yog cov uas qaug raws lwm tus tej lus hais xwb. Lawv xav tau nqi zog thaum hais haum vajntxwv siab pauv qhov uas hais raws li tus Tswv lub siabnyiam.
Peb pom muaj peb tus cwjpwm tsis raws li Vajtswv Txojlus ntawm peb hom tibneeg hauv ntu Vajluskub no: Tim ib, cov cevlus, tsimnyog ua tib zoo mloog tus Tswv tej lus thiab hais raws tus Tswv siabnyiam, tiamsis lawv ho mloog Vajntxwv Ahaj tej lus thiab hais raws vajntxwv siabnyiam. Lawv tsis yog tus Tswv cov cevlus vim lawv rhuav Vajtswv tej lus kom lawv tau nqi zog zoo rau tus kheej. Tim ob, Vajntxwv Ahaj tsimnyog mloog tus Tswv tej lus, tiamsis nws tsuas xav hnov tej lus haum nws siab xwb. Tim peb, Vajntxwv Yehausafas, cuag li zoo dua mentsis, xav nrhiav tus Tswv, tiamsis tsis ua raws tus Tswv siabnyiam ho mus ua raws tus kheej siabnyiam. Txawm paub hais tias tus Tswv tsis pub mus ntaus rog, los nws yeej tseem tawv qees nrog Vajntxwv Ahaj mus ntaus rog vim ntshai rhuav kev sibraug zoo nrog Vajntxwv Ahaj (II Xwmtxheej 18:28). Qhov tseeb, Vajntxwv Yehausafas twb txiavtxim siab yuav nrog Vajntxwv Ahaj mus ntaus rog ua ntej lawm, tomqab ntawd nws mam nug tus Tswv xwb. Tsimnyog nws yuav tsum xub nrhiav tus Tswv ua ntej coglus yuav mus ntaus rog. Thaum kawg nws thiaj raug swb hauv pluav rog zaum no (II Xwmtxheej 18:31-34).
Peb yuav tsum ua zoo li Vajntxwv Yehausafas hauv kev nrhiav tus Tswv lub siabnyiam ua ntej yuav txiavtxim siab ua ib yam dabtsi hauv lubneej. Tiamsis peb kuj yuav tsum ua txawv Vajntxwv Yehausafas rau qhov uas nrhiav tus Tswv lub siabnyiam los ua raws, tsis yog tsuas paub tso tseg, thaum kawg ho ua raws tus kheej siabnyiam. Vajtswv Txojlus qhia hais tias, “Nej yuav tsum xyaum ua raws li Vajtswv Txojlus, tsis yog ua cov mloog xwb. Yog nej mloog xwb, tsis ua raws li, ces kuj yog nej rov dag nej” (Yakaunpaus 1:22), thiab Vajtswv Txojlus qhia ntxiv hais tias: “Tus uas khaws tej lus ntawd cia rau hauv nruab siab thiab xyaum ua raws li tej lus ntawd, thiab tsis yog mloog tas xwb tsis nco qab lawm, Vajtswv yuav foom koobhmoov rau nws” (Yakaunpaus 1:25).
Thov Vajtswv,
Tus Tswv, ua Koj tsaug vim Koj pub Koj Txojlus rau nyuam yaus. Thov Koj qhia nyuam yaus paub nrhiav Koj lub siabnyiam dhau ntawm Koj Txojlus, sib txuas lus nrog Koj, tsis yog mloog xwb tiamsis txaus siab hlo tso tseg tus kheej lub siabnyiam mus ua raws Koj lub siabnyiam. Amees.
Peb muaj cwjpwm licas rau Vajtswv Txojlus? Nej puas pom tus kheej zoo li homneeg twg hauv zaj no?
Nyeem Vajluskub hauv peb lub xyoo: Exekees 45
Kênh Youtube BHKTHN:
