Klei Aê Diê Blŭ: II Klei Yăl Dliê 18: 3-6
Êlan kliăng: “Ƀiădah brei diih ngă tui si klei blŭ, amâo djŏ knŏng hmư̆ leh anăn mplư diih pô ôh.” (Y-Yakơ 1:22)
Klei êmuh ksiêm mĭn: Ti anăp klei Mtao Ahap akâo, si Mtao Jôsaphat bi mklă Ya knuih tlâo čô hlăm trăn Klei Aê Diê Blŭ anei amâo ngă djŏ hŏng Klei Aê Diê Blŭ? Ya klei hriăm drei mâo mơ̆ng Mtao Jôsaphat?
Wăt tơdah ƀuăn leh hŏng Mtao Ahap “srăng nao mbĭt hŏng ih hlăm klei bi blah” ƀiădah Mtao Jôsaphat ăt čiăng duah klei Aê Diê čiăng nao bi blah amâodah hơăi. Ñu lač hŏng Mtao Ahap, “Êlâo hĭn êmuh bĕ kơ Yêhôwa.” Mtao Ahap iêô jih jang pă êtuh čô khua hưn êlâo ñu čiăng êmuh. Digơ̆ hrăm wĭt lač, “Nao bĕ, kyuadah Aê Diê srăng jao ƀuôn anăn hlăm kngan mtao.”
Kyua đăo tơdah Aê Diê đru snăn srăng dưi anăn phung mtao khăng êmuh Aê Diê êlâo kơ nao bi blah. Mtao Ahap hmư̆ klei Mtao Jôsaphat, bi kƀĭn phung khua pô hưn êlâo čiăng êmuh, khădah snăn klei digơ̆ wĭt lač ngă kơ Mtao Jôsaphat đing leh anăn ñu brei duah sa čô khua pô hưn êlâo mkăn mơ̆ng Yêhôwa čiăng êmuh. Klei Aê Diê Blŭ amâo brei thâo ôh ya ngă Mtao Jôsaphat đing, năng ai kyua ñu thâo klă knuih phung khua pô hưn êlâo Mtao Ahap hlue si lu mnuih. Diñu knŏng čiăng mâo klei tŭ dưn tơdah lač djŏ tui si klei mtao čiăng hĭn kơ hlue si klei Aê Diê čiăng.
Drei ƀuh mâo tlâo knuih amâo djŏ hŏng Klei Aê Diê Blŭ mơ̆ng tlâo čô hlăm trăn Klei Aê Diê Blŭ anei: Tal sa, phung khua pô hưn êlâo, hrô kơ mđing hmư̆ Klei Aê Diê Blŭ leh anăn lač djŏ klei Aê Diê čiăng, diñu lŏ mđing hmư̆ asăp blŭ Mtao Ahap leh anăn blŭ hlue si klei mtao čiăng. Diñu amâo klă sĭt jing khua pô hưn êlâo kơ Yêhôwa ôh kyua mčeh Klei Aê Diê Blŭ čiăng mâo klei tŭ dưn kơ pô. Tal dua, mtao Ahap hrô kơ hmư̆ Klei Aê Diê Blŭ, ñu knŏng čiăng mđing hmư̆ klei blŭ djŏ guôp hŏng pô. Tal tlâo, Mtao Jôsaphat, năng ai dưi ƀiă, čiăng duah klei Aê Diê čiăng, ƀiădah amâo hlue si klei Aê Diê čiăng ôh ƀiădah hlue ngă klei pô čiăng. Wăt tơdah Aê Diê amâo brei nao bi blah ôh tal anei ƀiădah ñu ăt mbĭt hŏng Mtao Ahap nao bi blah kyua huĭ bi jhat klei bi mguôp hŏng Mtao Ahap (II Klei Yăl Dliê 18:28). Boh sĭt, Mtao Jôsaphat bi mklă srăng mbĭt hŏng Mtao Ahap nao bi blah leh anăn kơh êmuh klei Aê Diê čiăng. Năng ai ñu akâo kơ Aê Diê êlâo kơ bi mklă srăng nao bi blah. Knhal tuč ñu amâo dưi ôh hlăm klei bi blah anei (II Klei Yăl Dliê 18:31-34).
Brei drei msĕ hŏng Mtao Jôsaphat hlăm klei tui duah nanao klei Aê Diê čiăng hlăm djăp klei bi mklă hlăm klei hdĭp pô. Ƀiădah brei drei mdê hŏng Mtao Jôsaphat hlăm bruă duah klei Aê Diê čiăng pioh hlue ngă amâo djŏ knŏng thâo leh anăn lui, knhal tuč lŏ ngă hlue si klei pô čiăng. Klei Aê Diê Blŭ mtô, “Ƀiădah brei diih ngă tui si klei blŭ, amâo djŏ knŏng hmư̆ leh anăn mplư diih pô ôh.” (Y-Yakơ 1:22) leh anăn boh tŭ kơ hlei pô hlue ngă Klei Aê Diê Blŭ jing “srăng mâo klei jăk jĭn hlăm bruă ñu” (Y-Yakơ 1:25).
Si knuih drei hŏng Klei Aê Diê Blŭ? Diih ƀuh pô msĕ hŏng hlei pô hlăm klei yăl dliê anei?
Ơ Khua Yang, bi mni kơ Ih brei leh kơ kâo Klei Aê Diê Blŭ. Akâo kơ Ih brei kơ kâo thâo duah klei Aê Diê čiăng mơ̆ng klei hriăm Klei Aê Diê Blŭ, bi mguôp hŏng Ih, amâo djŏ knŏng hmư̆ ôh ƀiădah srăng lui klei pô čiăng leh anăn hlue ngă Klei Aê Diê Blŭ mtô.
Dlăng Klei Aê Diê Blŭ hlăm tlâo thŭn: Y-Êsêkiêl 45
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
