Phau Ntawv Nkauj 96:1-6
Nqe cim:
“Cia li hu nkauj qhuas tus TSWV thiab ua nws tsaug! Niaj hnub piav nws txojkev cawm dim rau sawvdaws mloog” (Phau Ntawv Nkauj 96:2).
Lus nug rau sawvdaws xav:
- Phau Ntawv Nkauj tshooj 96 nqua hu lub ntiajteb yuav tsum ua dabtsi?
- Vim licas yuav tsum qhuas thiab piav txog tus Tswv lub koob npe?
- Tus sau tshooj nkauj hais txog tus Tswv zoo licas?
- Peb yuav tsum ua licas thaum paub hais tias tus Tswv yog tus loj kawg nkaus, muaj hwjchim thiab tshwjchim ci ntsa iab?
Qhib thawj ntawm Phau Ntawv Nkauj 96 yog tej lus nqua hu: “Cia li hu ib zaj nkauj tshiab qhuas tus TSWV! Neeg thoob ntiajteb cia li hu nkauj qhuas tus TSWV!” (nqe 1). Vajtswv tsis yog cov Yixalayees tus Tswv xwb, tiamsis Nws yog tus Tswv ntawm lub ntuj thiab ntiajteb. Yog li ntawd, tsis yog tsuas muaj cov Yixalayees thiaj qhuas tus Tswv xwb, tiamsis tagnrho lub ntiajteb yuav tsum zeem paub txog tus Tswv thiab tas siab tas ntsws hu nkauj qhuas Nws.
Tus sau tshooj nkauj nqua hu kom peb tsis yog tsuas qhuas tus Tswv xwb, tiamsis tseem yuav tsum “Niaj hnub piav nws txojkev cawmdim rau sawvdaws mloog. Cia li piav nws lub koob lub npe kom nrov ncha moo lug rau txhua lub tebchaws, piav nws tes haujlwm tseemceeb rau txhua haivneeg tau hnov. Qhia nws tes haujlwm uas loj kawg nkaus rau txhua haivneeg” (nqe 2b-3). Lo lus “niaj hnub” yog xav kom txhua haivneeg nyob txhua lub tebchaws yuav tsum qhuas Vajtswv txhua hnub, txhua taigkis sawv ntxov pib hnub tshiab thiab txhua hmo uas xaus ib hnub. Tus Tswv cov menyuam tsis yog tos thaum tuaj hauv Tuamtsev lossis thaum sib ntsib thiaj qhuas tus Tswv xwb, tiamsis yuav tsum qhuas tus Tswv txhua hnub los ntawm lub ncauj thiab lubneej vim tau tus Tswv pub kev cawmdim ruaj khov lawm.
Vajtswv Tus uas peb tabtom ntseeg thiab pehawm yog Tus loj kawg nkaus, tsimnyog hwm, muaj tshwjchim ci ntsa iab thiab muaj hwjchim kawg nkaus li. Nws “yog tus tsim lub ntuj”, yog li ntawd Nws thiaj yog tus tsimnyog qhuas (nqe 4-6). Tsis muaj ib tug vajtswv twg yuav piv tau rau peb tus Vajtswv. Tsuas yog tus Tswv tibleeg xwb thiaj tsimnyog qhuas thiab txhawb nqa vim lwm haivneeg tej vajtswv tsuas yog mlom tsis paub dabtsi lossis tsuas yog tus neeg uas tuag lawm xwb. Tus Tswv xav kom peb siv lub ncauj los qhuas Nws tabmeeg sawvdaws, ntawd yog ib txoj koobhmoov zoo kawg nkaus rau peb. Thaum cov Falixais yuam Tswv Yexus hais kom cov neeg coob coob tabtom qhuas Nws ua twjywm, tus Tswv hais rau lawv hais tias: “Kuv qhia rau nej hais tias, yog lawv cov no ua twjywm lawm los tej pobzeb yeej yuav qw” (Lukas 19:40). Yog peb ua twjywm, tus Tswv yuav siv lwm tus, lwm txoj haukev los qhuas Nws, tiamsis peb yuav raug plam txoj koobhmoov ntawd.
Thaum totaub txog tus Tswv uas peb tabtom ua haujlwm pub rau, yog tus loj kawg nkaus, muaj hwjchim thiab tshwjchim ci ntsa iab, ces tsis muaj ib yam dabtsi yuav tav tau kom peb tsis piav txog Nws rau lwm tus. Thaum peb lub siab puv npo kev ua tsaug txog tej uas tus Tswv tau ua rau lub ntiajteb thiab rau peb tus kheej lawm, ces peb yuav tsis nyob twjywm, tiamsis, peb yuav tshajtawm txog tus Tswv lub koob npe txhua hnub los ntawm peb tej lus hais thiab peb kev ua neej.
Nej puas tshajtawm tus Tswv txojkev cawmdim txhua hnub rau lwm tus lawm? Nej ua tes haujlwm ntawd licas?
Nyuam yaus tus Tswv, Koj yog tus uas loj kawg nkaus thiab tsimnyog qhuas! Thov pab nyuam yaus paub txog tej ntawd kom txhua hnub hauv nyuam yaus lubneej yog zaj nkauj tshiab hu qhuas Koj thiab tshajtawm txog Koj rau lwm tus. Amees.
Nyeem Vajluskub hauv peb lub xyoos: Phau Ntawv Nkauj 113:1-115:18
Kênh Youtube BHKTHN:
