Klei Aê Diê Blŭ: Klei Mmuñ Hđăp 96:1-6
Êlan kliăng: “Mmuñ bĕ kơ Yêhôwa, mpŭ mni kơ anăn Ñu; hưn grăp hruê klei bi mtlaih Ñu” (Klei Mmuñ Hđăp 96:2).
Klei êmuh ksiêm mĭn: Ya klei Klei Mmuñ Hđăp 96 iêô mthưr jih lăn ala brei ngă? Ya ngă brei mmuñ bi mni leh anăn hưn Anăn Khua Yang? Si klei pô čih Klei Mmuñ Hđăp lač kơ Khua Yang? Ya klei brei drei ngă tơdah thâo kơ klei myang, klei prŏng leh anăn klei kdrăm Khua Yang?
Klei Mmuñ Hđăp 96 kčưm dơ̆ng hŏng klei iêô mthưr, “Mmuñ bĕ kơ Yêhôwa sa klei mmuñ mrâo; mmuñ bĕ kơ Yêhôwa Ơ jih jang phung dôk ti lăn ala” (êlan 1). Aê Diê amâo djŏ knŏng jing Khua Yang kơ phung ƀuôn sang Israel ôh, ƀiădah Ñu jing Khua Yang kơ kluôm jih lăn adiê. Kyuanăn, amâo djŏ hjăn phung Israel ôh mmuñ bi mni kơ Ñu, ƀiădah jih lăn ala brei thâo kral klei prŏng Khua Yang leh anăn jih ai tiê mpŭ mni kơ Anăn Ñu.
Pô čih ăt lŏ iêô mthưr drei amâo djŏ knŏng mmuñ bi mni kơ Ñu ƀiădah wăt “Hưn grăp hruê klei bi mtlaih Ñu. Yăl dliê klei guh kơang Ñu ti krah phung găp djuê mnuih, bruă yuôm bhăn Ñu ngă ti krah jih jang phung ƀuôn sang” (êlan 2b-3). Boh blŭ “grăp hruê” kñăm kơ jih jang găp djuê mnuih jih jang phung ƀuôn sang brei mmuñ bi mni kơ Aê Diê grăp hruê, grăp aguah êlâo kơ dơ̆ng hruê mrâo leh anăn grăp mlam êlâo kơ ruê̆ jih hruê drei. Phung anak Aê Diê amâo guôn tơdah nao kơ Sang Yang amâodah nao bi kƀĭn kơh mmuñ bi mni kơ Aê Diê, ƀiădah klei mmuñ bi mni kơ Ñu ngă nanao grăp hruê hŏng ƀăng kƀông leh anăn hŏng klei hdĭp kyua dưi mâo klei rơ̆ng kơ klei bi mtlaih Khua Yang pioh brei leh kơ drei.
Aê Diê drei đăo knang leh anăn kkuh mpŭ jing Pô prŏng, năng huĭ mpŭ, klei kdrăm leh anăn klei myang. Ñu jing Pô “hrih leh phung adiê”, kyuanăn Ñu năng snăk mmuñ mpŭ mni (êlan 4-6). Amâo mâo ôh yang dưi bi msĕ hŏng Khua Yang drei. Knŏng hjăn Khua Yang jing năng mpŭ mni leh anăn huĭ mpŭ kyua jih jang yang knŏng jing hơăi mang amâodah rup yang amâo mâo klei thâo săng amâodah knŏng jing sa čô djiê leh. Sĭt nik jing klei pap prŏng kơ drei tơdah Khua Yang čiăng kơ drei yua ƀăng kƀông drei pioh mmuñ mpŭ mni Khua Yang ti krah jih jang mnuih. Tơdah phung Pharisi brei Khua Yang Yêsu ghă phung ur driâo kơ Ñu dôk kriêp ñăt, Ñu lŏ wĭt lač leh hŏng diñu: “Kâo lač kơ diih, tơdah phung anei dôk ñăt, boh tâo yơh srăng ur” (Y-Luk 19:40). Tơdah drei dôk kriêp ñăt, Khua Yang srăng yua pô mkăn, êlan mkăn mmuñ bi mni kơ Khua Yang kyua klei prŏng Khua Yang dôk nanao hlŏng lar, leh anăn bi drei srăng bi luč hĕ klei pap yuôm bhăn anăn.
Tơdah thâo săng kơ klei myang, klei prŏng leh anăn klei kdrăm Aê Diê, drei dôk mă bruă snăn amâo lŏ mâo ya mta klei kơ̆ng ghă drei amâo yăl dliê kơ Khua Yang hŏng pô mkăn ôh. Tơdah ai tiê drei bŏ dlai hŏng klei kčŭt kơ bruă yuôm bhăn Ñu ngă ti krah jih jang phung ƀuôn sang leh anăn kơ drei pô snăn drei amâo dưi dôk ñăt ôh, ƀiădah mklăk wĭt, brei drei hưn kơ Khua Yang grăp hruê hŏng klei hdĭp drei hlăm klei blŭ leh anăn knhuah hdĭp.
Si ngă drei hưn klei Khua Yang bi mtlaih kơ arăng grăp hruê mơ̆? Si diih ngă bruă anei?
Wah lač: Ơ Khua Yang kâo, Ih jing prŏng hĭn leh anăn năng mpŭ mni! Akâo Khua Yang đru kâo thâo kral nanao klei anăn čiăng kơ grăp hruê klei hdĭp kâo jing klei mmuñ mrâo kâo myơr kơ Ih leh anăn wăt jing klei mmuñ hưn Khua Yang kơ lu mnuih.
Dlăng Klei Aê Diê Blŭ hlăm tlâo thŭn: Klei Mmuñ Hđăp 113:1-9; 114:1-8; 115:1-18
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
