Tơdrong Pơđơ̆k 26:4-5
“Mă đe pơm kơnê̆ kơ bơ̆n, bơ̆n ‘nĕ pơm tơwih kơ đe; mă đe pơma kơnê̆ kơ bơ̆n, bơ̆n ‘nĕ pơma tơwih kơ đe, bơ̆n rai krao khan apinh ‘Bok Kei-Dei mơnat kơ sư dơ̆ng. Bĭ ‘Bok Kei-Dei kư̆m mơnat kơ bơ̆n na Sư krao iŏk bơ̆n jing kon Sư.” (I Pêtrôs 3:9)
Nơ̆r jet tơchĕng pơwao:
– Pơtao Sôlômôn bơtho kon ‘lơ̆p sư ‘nĕ kơ tơl tơwih hăm bơngai kơtul kơwao thoi yơ?
– Athei tơl bơngai kơtul kơwao thoi yơ?
– ‘Bai pơhrăm ‘nâu tơ’blŏk ăn kơ bơngai lui athei arih kiơ̆ mă ‘blep trŏ ayơ?
Đơ̆ng chăl blŭng a lăm hla bơar Pơđơ̆k, Pơtao Sôlômôn đei bơtho bơih kon sư athei băt hơđăl kơ bơngai hơgei păng bơngai kơwao: “Hli yom kơ Kră Yang jing tơm tơdrong hlôh wao. Lu bơngai kơtul areh kơ tơdrong gơh hơgei păng nơ̆r bơtho pơhrăm.” (Tơdrong Pơđơ̆k 1:7). ‘Nâu lu bơngai arih đei gơh hơgei mălei tơdrong arih ưh kơ ‘lơ̆ng tơpăt, yua kơ thoi noh dah pơma tơl tơwih hăm lu bơngai kơwao, athei kăl kơ pơ’lơ̆ng, athei băt yua kơ liơ ưh kơ gơh tơl tơwih, păng dah wă tơl tơwih athei tơl thoi yơ.
Bơngai chih bơtho kon hơ’lơ̆p sư ưh kơ gơh tơl tơwih bơngai kơwao kiơ̆ kơ tơdrong kơtul sư (trong 4a), wă kơ wer đơ̆ng tơdrong ưh kơ ‘lơ̆ng sư kơnh hli kơ nhen ten thoi sư (trong 4b). Dah kon hơ’lơ̆p sư tơl tơwih bơngai kơwao thoi sư; wă khan dang thoi sa minh pơdrâu kiơ̆ kơ tơdrong kơnê̆ yoch lu sư, lei lăi thoi kon sư kư̆m năm minh pôm trong tơdrong yoch lu sư, jing ba bơhngol năm kiơ̆ trong hiong răm (lăng Pơđơ̆k 22:24-25).
Mălei tơdah kăl dêh wă tơl tơwih hăm bơngai kơwao, lei lăm tơdrong thoi âu bơngai chih hla bơar ‘nâu bơtho kon sư: “’Nĕ tơl tơwih kơ bơngai kơtul kơwao thoi tơdrong kơtul sư.” (trong 5a), tơdrong kơnhăm ‘noh wă kơ wer đơ̆ng tơdrong ưh kơ ‘lơ̆ng yua kơ bơngai kơtul kơwao tơchĕng lu sư gơh hơgei mălei ling lang hơlĕnh pơdăr lơ bơngai nai. Nơ̆r bơtho lăm trong 5 wă pơma kơ bơngai hơgei athei tơl nơ̆r wă tơ’bôh tơdrong yoch glăi bơngai kơtul kơhlôh kơplah lu sư chă đei lơi yua đơ̆ng bơngai nai dah đơ̆ng bơngai tơpôl, đei pơm ăn hrâu hre tơpôl pơhlŭ lơ bơngai glăi kơ nơ̆r Kră Yang bơtho. Mă khan bơngai tơl nơ̆r thoi noh đei tơ’bơ̆p tơdrong anat anot, gleh glăn, mă truh tơdrong krê hơmơt hăm bơngai kơtul kơwao, mălei hăm bơngai gơh hơgei đơ̆ng Kră Yang ăn, lu bơ̆n kư̆m athei pơma tơ’bôh.
Khul Bơngai Lui arih mă trŏ ‘blep đei tơdrong ‘mêm mơnat păng ‘lơ̆ng tơpăt rơgoh đơ̆ng Kră Yang. Lăm dôm tơdrong truh ưh kơ gơh lei lăi dah tơmơ̆t hăm bơngai kơtul kơhlôh; mălei athei arih ‘lơ̆ng rơgoh thoi Kră Yang lu bơ̆n ‘lơ̆ng rơgoh: “Mă đe pơm kơnê̆ kơ bơ̆n, bơ̆n ‘nĕ kơ pơm tơwih kơ đe; mă đe pơma kơnê̆ kơ bơ̆n, bơ̆n ‘nĕ pơma tơwih kơ đe, bơ̆n rai krao khan apinh ‘Bok Kei-Dei mơnat kơ sư dơ̆ng. Bĭ ‘Bok Kei-Dei kư̆m mơnat kơ bơ̆n na Sư krao iŏk bơ̆n jing kon Sư.” (I Pêtrôs 3:9). Gah nai dơ̆ng, lu bơ̆n kư̆m athei mă pran kơ ră roi Tơdrong ‘Nao ‘Lơ̆ng kơ đĭ bơngai băt păng hŭt lê̆ trong tơdrong yoch, wih brŏk tơ Kră Yang. Đơ̆ng noh, gô đei lơ bơngai gơnang kơ Kră Yang gô arih ‘lơ̆ng tơpăt, ‘lơ̆ng rơgoh. Apinh Yang Bơhngol ‘Lơ̆ng bơtho chông anhăk lu bơ̆n arih ‘lơ̆ng tơpăt tôm tơdrong wă kơ đei hlôh wao kiơ̆ nơ̆r Kră Yang wă kơ đei gơh hơgei kơplah tơl nơ̆r hăm bơngai kơtul kơwao.
Ơ Kră Yang Ih bơih Tơ’ngla ‘mêm mơnat, ‘lơ̆ng tơpăt, ‘lơ̆ng rơgoh, apinh Ih ăn kơ inh đei tơdrong gơh hơgei wă kơ pơma hăm rim ‘nu bơngai, ưh kơ tơmơ̆t hăm lu bơngai kơtul, mălei arih ‘lơ̆ng rơgoh wă ba Tơdrong ‘Nao ‘Lơ̆ng dŏng pơklaih lơ bơngai. Krao khan yua anăn Kră Yang Yêsu Krist, Amen.
Lu bơ̆n kơchăng lăm nơ̆r pơma thoi yơ kơplah pơma tơl nơ̆r hăm bơngai kơhlôh kơwao?
Đŏk Sơ̆p Hla bơar ‘Bok Kei-Dei lăm pêng sơnăm: I Kôrintô 4
Kênh Youtube BHKTHN:
