Mathiơ 24:1-3
“Đơ̆ng rŏng kơ noh Yêsu năm ngôi tơ kông Ôliwơ, na lu bơngai pơhrăm păng Sư jet Sư kơdrô̆ khan: Apinh Ih roi kơ nhôn layơ đe wă pơrăm hnam akŭm ‘Bok Kei-Dei to păng đei tơdra liơ wă kơ nhôn kơnăl kơ Ih wă jur tơ teh âu păng kơnăl kơ năr tôch wă truh.” (Mathiơ 24:3)
Nơ̆r jet tơchĕng pơwao:
– Kră Yang Yêsu pơma khan tơdrong kiơ gah Hnam akŭm Jêrusalem?
– Nơ̆r jet lu bơngai pơhrăm păng Kră Yang đei tơ’bôh tơdrong lu sư hiơ̆k kơ tơdrong kiơ?
– Lu bơ̆n hiơ̆k kơ năr Kră Yang jur păng năr wă tôch thoi yơ?
Kră Yang Yêsu đei bơtho tơblang păng khan tơbăt tơdrong sek tơlang trăp tơpă hăm lu bơngai pơgơ̆r tơdrong lui Khul Juđê. Kơplah lu sư lĕch đơ̆ng Hnam akŭm pơlei Jêrusalem, lu bơngai pơhrăm tơ’bôh kơ Kră Yang lăng lu tơdrong pơjing Hnam akŭm hăm tơdrong lu sư hiôk dêh, yua kơ ‘nâu tơdrong pơjing tih hloh kơ đĭ đăng đơ̆ng sơ̆. Mălei Kră Yang đei khan lê̆ adrol gah tơdrong Hnam akŭm: “Na Yêsu khan kơ lu sư: Iĕm ‘bôh boih hnam akŭm âu ‘lơ̆ng rŏ, Inh khan kơ iĕm tơpă, ning-mônh hnam âu gô pơchah reng-‘beng ưh pă đei tơmo ayơ tơklep băl dơ̆ng. Đe gô teh pơchah đĭ.” (trong 2). Nơ̆r Kră Yang khan pơm kơ lu bơngai pơhrăm păng Sư tơchĕng hlĭch tih dêh yua kơ lu sư lăng ‘bôh lơ tơmo gĭt kăl tih đei pơm pơjing lăm Hnam akŭm trăp dêh.
Đơ̆ng rŏng kơ pêng sơnăm kiơ̆ Kră Yang, lu bơngai pơhrăm păng Sư oei ưh tam mă hlôh tơdrong jang Kră Yang, na nơ̆r Kră Yang khan lê̆ adrol gah Hnam akŭm ‘noh gô pơchah, lu sư lăng hlĭch dêh na đơ̆ng rŏng kơ noh Yêsu năm ngôi tơ kông Ôliwơ, na lu bơngai pơhrăm păng Sư jet Sư kơdrô̆ khan: “Apinh Ih roi kơ nhôn layơ đe wă pơrăm hnam akŭm ‘Bok Kei-Dei to păng đei tơdra liơ wă kơ nhôn kơnăl kơ Ih wă jur tơ teh âu păng kơnăl kơ năr tôch wă truh?” (trong 3). Lăm tơdrong lui lu bơngai Juđê, năr tôch gô truh ‘noh năr Yang Mêsi Sư jur, păng lu sư lui khan Kră Yang gô pơrăm đĭ lu bơngai ayăt pơgŏ pơđep oei pơgơ̆r lu bơngai Juđê đơ̆ng noh na pơm pơtao pơgơ̆r tơ Jêrusalem ling lang. Tơdrong lu sư pơma apinh ‘nâu đei tơbôh lu sư hiơ̆k kơ năr Kră Yang jur păng bơngơ̆t kơ gah năr tôch. Đơng noh, Kră Yang bơtho lu sư dôm tơdrong gĭt kăl gah jơhnơr năr tôch.
Bơngai chih kơthơ Hêbrơ đei tơbăt, lu bơ̆n oei arih lăm chăl jơhnơr tuch luch, “Mă-lei gah chăl arih lu bơ̆n ahrei, Sư wơh Kon Sư kơdih năm pơtruh kơ bơ̆n. Sư kư̆m ăn kơ Kon Sư gơh pơjing plĕnh pơjing teh păng pơgơ̆r tôm tơdrong” (Hêbrơ 1:2), wă khan ưh pă đei chăl jơhnơr ayơ đơ̆ng rŏng kơ ‘nâu. Tơdrong ‘nâu tơ’blŏk ăn kơ lu bơ̆n athei hiơ̆k tơtăm hơmet chăl arih bơ̆n gah bơhngol wă răp sơng iŏk tơdrong Kră Yang Yêsu wă jur. Lu bơ̆n kăl kơ kral kơchăng chang gô Kră Yang wă jur dơ̆ng yua kơ Sư đei pơkă wă ăn apah kơ bu mă oei chang gô Sư: “Dôm lu đĭch đam mă oei kral gô yŏng sư, ưh kơ tep, na yŏng sư ‘mêm tơpă. Inh khan kơ iĕm tơpă, yŏng sư kơdih kư̆m gô awih ăn kơ lu đĭch đam sư tơmam sa dơ̆ng mơ̆n.” (Luka 12:37). Kră Yang ling lang tơbăt kơ bơ̆n rim năr yua kơ Kră Yang wă kơ bơ̆n gơh oei hơdai hăm Kră Yang lăm năr Sư jur ei kơnh. “Na kơplah iĕm oei arih dang ei, iĕm athei kơchăng kơdih ‘nĕ kơ nŏng kơ et sik, hli kơ suai. Păng ‘nĕ pă hăt kơ tơdrong ala teh, hli kơ năr noh truh kơplah iĕm ưh kơ kơchăng, tabơla haih pă tam thoi bơngai ‘leh ‘năk. Na tơdrong noh wă truh tơ jơ̆p-jang teh đak ning-mônh kư̆m thoi noh mơ̆n.” (Luka 21:34-35). Apinh Kră Yang ăn kơ bơ̆n hiơ̆k bơngơ̆t hơmet chăl arih bơ̆n wă kơ Kră Yang lăp đon na bơ̆n gơh sơng iŏk năr Kră Yang jur.
Ơ Kră Yang, apinh Ih tơgŭm inh ling lang ‘mêm kơ Ih, kral kơchăng chang gô năr Kră Yang jur wă kơ inh gơh oei hăm Kră Yang ling lang tơ pơlei ‘lơ̆ng pŭn hiôk. Krao khan yua anăn Kră Yang Yêsu Krist, Amen.
Lu bơ̆n hăm wă sơng iŏk Kră Yang tơdah Kră Yang truh hloi năr ‘nâu ưh?
Đŏk Sơ̆p hla bơar ‘Bok Kei-Dei lăm pêng sơnăm: Êsêkiên 25
Kênh Youtube BHKTHN:
