Klei Aê Diê Blŭ: Y-Mathiơ 24:1-3
Êlan kliăng: “Êjai Ñu dôk gŭ ti dlông čư̆ Ôliwơ, phung ƀĭng kna hriê lač kơ Ñu hjăn, “Hưn kơ hmei hbĭl klei anăn srăng truh, leh anăn ya jing klei bi knăl kơ klei ih lŏ hriê, leh anăn kơ hruê knhal tuč ênuk?” (Y-Mathiơ 24:3)
Klei êmuh ksiêm mĭn: Ya klei Khua Yang Yêsu lač kơ Sang yang Yêrusalem? Klei phung ƀĭng kna êmuh brei ƀuh ya klei diñu mđing? Ya klei drei mđing kơ bruă Khua Yang hriê leh anăn hruê knhal tuč?
Khua Yang Yêsu mtô leh anăn lač klei phat kđi kjham hĭn hŏng phung khua gĭt gai klei đăo Yuđa. Hlăk êjai kbiă mơ̆ng Sang yang Yêrusalem, ƀĭng kna ktrâo kơ Khua Yang dlăng hdră rŭ mdơ̆ng Sang yang hŏng klei ktưn hưn, kyua anei jing hdră rŭ mdơ̆ng prŏng hĭn mơ̆ng ênuk đưm. Ƀiădah Khua Yang hưn êlâo leh kơ klei Sang yang dlưh rai: “Diih ƀuh mơ̆ jih jang sang anei? Sĭt nik kâo lač kơ diih, amâo srăng mâo sa boh tâo ti dlông boh tâo mkăn amâo srăng klưh ôh” (êlan 2). Klei Aê Diê Blŭ ngă kơ phung ƀĭng kna mâo sa klei êmuh kyua mâo lu boh tâo khăng prŏng yua mkra Sang yang mâo boh ktrŏ snăk.
Leh tlâo thŭn tui hlue Khua Yang, phung ƀĭng kna ăt ka thâo săng ôh bruă klam Ñu, kyua anăn klei Ñu hưn êlâo kơ Sang yang srăng dlưh rai, diñu bi kngăr snăn kyua anăn nao êmuh hjăn Khua Yang: “Hưn kơ hmei hbĭl klei anăn srăng truh, leh anăn ya jing klei bi knăl kơ klei ih lŏ hriê, leh anăn kơ hruê knhal tuč ênuk?” (êlan 3). Hlăm klei đăo phung ƀuôn sang Yuđa, ênuk knhal tuč srăng truh tơdah ƀuh Yang Mêsi, leh anăn diñu đăo Khua Yang srăng bi mdjiê jih phung roh dôk kwang dar Yuđa leh anăn đĭ jing mtao kiă kriê lă lar ti Yêrusalem. Klei diñu êmuh brei ƀuh diñu mđing kơ hruê Khua Yang srăng lŏ hriê leh anăn rŭng răng kơ hruê knhal tuč. Mơ̆ng anăn, Khua Yang mtô diñu kơ klei yuôm bhăn kơ ênuk knhal tuč.
Pô čih hră Hêbrơ brei thâo, drei dôk hdĭp hlăm hruê knhal tuč, “ƀiădah hlăm ênuk knhal tuč anei Ñu blŭ leh kơ drei hŏng Anak Êkei Ñu. Aê Diê brei Gơ̆ jing Pô dưn jih jang mnơ̆ng, hŏng gơ̆ msĕ mơh Ñu hrih leh lăn adiê…” (Hêbrơ 1:2), jing srăng amâo lŏ mâo ôh ênuk êdei kơ wưng anei. Klei anăn mñă kơ drei brei mđing mkra mlih klei hdĭp myang čiăng drông Khua Yang Yêsu lŏ hriê. Brei drei mdih dôk guôn Khua Yang lŏ hriê kyua ñu ƀuăn srăng mni kơ phung dôk čang guôn Ñu: “Jăk mơak yơh phung dĭng buăl anăn tơdah khua digơ̆ truh leh anăn ƀuh digơ̆ dôk răng! (Y-Luk 12:37). Khua Yang hưn kơ drei brei răng nanao grăp hruê kyua Ñu čiăng drei dưi dôk mbĭt hŏng Ñu tơdah Ñu lŏ hriê: “Ƀiădah răng bĕ kơ diih pô, huĭdah ai tiê diih jing ktrŏ hŏng klei huă ƀơ̆ng mnăm lu, leh anăn klei uêñ hnĭng kơ klei hdĭp anei, leh anăn hruê anăn truh kơ diih bhiâo riâo rit msĕ si jal. Kyuadah klei anăn srăng truh kơ jih jang mnuih dôk tar ƀar rŏng lăn ala” (Y-Luk 21:34-35). Akâo kơ Khua Yang đru drei mđing uêñ mkra mlih klei hdĭp pô bi mơak kơ Khua Yang čiăng mprăp drông Khua Yang lŏ hriê hŏng klei guh kơang.
Drei srăng drông Khua Yang hriê mơ̆ tơdah Ñu hriê mtam hruê anei?
Wah lač: Ơ Khua Yang, akâo kơ Ih đru kâo khăp kơ Ih, thâo răng dôk čang guôn hruê Ih lŏ hriê čiăng kơ kâo dưi dôk hŏng Ih nanao hlŏng lar hlăm ƀuôn ala mtao jăk mơak. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsêkiêl 25
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
