Tơdrong Tơ’bôh 20:11-15
“’Bok Kei-Dei sek tơlang lu bơngai đơ̆ng lôch, kiơ̆ kơ tơdrong lu sư đêl pơm tơ ala teh, kiơ̆ kơ đe chih ‘măn lê̆ dôm tơdrong lu sư đêl pơm noh tơ lăm lu sơ̆p hla bơar ei sơ̆.” (Tơdrong Tơ’bôh 20:12b)
Nơ̆r jet tơchĕng pơwao:
– Sơ̆p Hla bơar ‘Bok Kei-Dei tơbăt lê̆ adrol gah tơdrong Kră Yang sek tơlang thoi yơ?
– Tơdrong phak ‘măn kơ lu bơngai ưh kơ đei anăn lăm Sơ̆p hla bơar tơdrong arih noh thoi yơ?
– Tơdrong ‘nâu đei tơ’blŏk kơ bơ̆n thoi yơ hăm tơdrong tơpăt Kră Yang?
Sơ̆p Hla bơar nơ̆r ‘Bok Kei-Dei jơ̆ hla bơar minh đĕch pơma adrol gah năr tôch wă pơkeh tơdrong jang Yang Bơhngol ‘Lơ̆ng hih chrih kơ ala teh gah tơdrong sek tơlang tuch luch (Yôhan 16:8). Anih sek tơlang kon bơngai tơ’bôh tơdrong tơpăt Kră Yang; nơ̆r tơbăt lê̆ adrol đei tơ’bôh tơdrong ‘mêm Kră Yang ling lang. Kră Yang Yêsu kư̆m đei tơbăt lê̆ adrol: “Đơ̆ng noh ‘Bok Kei-Dei phak lu sư tơ dơnâu ŭnh ling lang ưh kơ layơ păt. Gah lu bơngai lui kơ ‘Bok Kei-Dei ‘lơ̆ng tơpăt, lu sư tŏk oei hơdai hăm ‘Bok Kei-Dei ling lang kư̆m ưh kơ layơ tôch.” (Mathiơ 25:46). Đei lơ tơdrong ơh blĕk, hơlĕnh păng tơdrong yoch tôch tơl lăm teh đak âu. ‘Bok mă ‘lơ̆ng tơpăt sĭt ưh kơ lê̆ ôh!
Tơdrong sek tơlang blŭng a kơplah Kră Yang pơih ‘bơ̆t anih sek tơlang ‘bôh minh pôm tang dŏ tih krưp păng kok ‘lơ̆ng wă sek tơlang kon bơngai, “Minh pôm tang dŏ tih krưp păng kok ‘lơ̆ng” ‘noh tơ’bôh tơdrong mơsêh ‘Bok Kei-Dei gơh pơm păng tôm tơdrong ‘lơ̆ng rŏ Sư. Ưh kơ đei bu gơh weh wer đơ̆ng tơdrong sek tơlang tih noh. Sek tơlang kiơ̆ kơ tơdrong lu sư đêl pơm kơplah oei arih sơ̆ (trong 13). “Tơdrong lu sư đêl pơm” lăm noh đei nơ̆r pơma, tơdrong pơtrŭt băt kơnăl kơplah lu sư pơm păng pơma lu tơdrong noh. Kră Yang Yêsu khan: “Dah ‘bơ̆r iĕm pơma ‘lơ̆ng, Sư kư̆m jô̆ iĕm bơngai ‘lơ̆ng; dah ‘bơ̆r iĕm pơma kơnê̆, Sư kư̆m jô̆ iĕm bơngai kơnê̆.” (Mathiơ 12:37) ‘Bok mă sek tơlang ei Sư sek kiơ̆ tôm lu sư đêl pơm đei chih răk lê̆ lăm “Sơ̆p hla bơar” (trong 12). Tơdrong hơgăt lăm sek tơlang Kră Yang kiơ̆ tơdrong tơpăt, kiơ̆ tơdrong juăt Sư “đei chih lăm Sơ̆p hla bơar”, minh ‘măng tôm bơih (Hêbrơ 9:28). Ưh kơ đei bu khan gơh chă tơdrong jang wă kơ tôm tơdrong jang kon bơngai lăng khan ‘lơ̆ng lei na ‘bơ̆t anăp Kră Yang ‘Bok Kei-Dei thoi lĕ ao ‘mê̆ đĕch, Êsai ‘bok khan lê̆ adrol đei chih: “Lu nhôn đĭ-đăng jing nhen thoi bơngai ‘mê̆ ‘mach bơih, dôm tơdrong tơpăt lu nhôn, nhen thoi ao mơgrĭ. Lu nhôn đĭ-đăng tă kơ nhen hla jô, păng tơdrong kơnê̆ lu nhôn nhen thoi kial pơđông đĭ lu nhôn.” (Êsai 64:6).
Chih roi “Tơdrong lôch mă ‘bar ‘măn kơ lu bơngai ưh kơ đei anăn chih tơmơ̆t lăm Sơ̆p hla bơar tơdrong arih (trong 15). Lu bơngai pơm yoch ưh pă lôch bơih, ưh kơ đei tep thoi nơ̆r Kră Yang pơma (Mathiơ 9:24), mălei gô klơ̆m sư tơ lăm dơnâu ŭnh tŏ hang hơt ling lang: “Lăm dơnâu ŭnh noh bơih tơdrong lôch mă ‘bar” (trong 14). Oei lăm dơnâu ŭnh, ưh kơ đei bu gơh pơdơh dah tep, mălei “lu sư nhơ̆m hmoi tơkăp sơnĕnh tơ noh” ling lang (Mathiơ 13:42, 50). Dôm lu bơngai đei chih anăn lăm Sơ̆p hla bơar tơdrong arih jơ̆ lu bơngai lui kơ Kră Yang Yêsu đĕch gơh klaih, pă đei tơdrong phak ayơ ‘măn kơ lu sư (Rôm 8:1).
‘Bai pơhrăm ‘nâu đei tơ’blŏk kơ lu bơ̆n ‘Bok Kei-Dei bơih Yang ‘lơ̆ng tơpăt tôm tơdrong, ‘nĕ kơ pơjăm tơdrong tơpăt Kră Yang. Kră Yang gô sek tơlang kon bơngai kiơ̆ kơ tơdrong tơpăt Sư. Apinh Kră Yang tơgŭm ăn kơ bơ̆n arih ‘lơ̆ng tơpăt Kră Yang lăm nơ̆r pơma, tơdrong tơchĕng, tơdrong jang.
Ơ Kră Yang ‘lơ̆ng tơpăt! Apinh Ih bơwei inh lăm đon lui păng lăm tơdrong tơpăt Kră Yang Yêsu wă kơ lăm năr sek tơlang, inh dơ̆ng ‘bơ̆t anăp Ih hăm jơhngơ̆m hiôk hơđơ̆ng păng ‘bĕnh blai tơdrong hơmĕng lăm Ih, krao khan yua anăn Kră Yang Yêsu Krist, Amen.
Lu bơ̆n hơmet thoi yơ lăm năr dơ̆ng ‘bơ̆t anih tih krưp păng kok ‘lơ̆ng?
Đŏk Sơ̆p hla bơar ‘Bok Kei-Dei lăm pêng sơnăm: Hơriso 108-109
Kênh Youtube BHKTHN:
