Klei Aê Diê Blŭ: Klei Bi Êdah 20:11-15
Êlan kliăng: “Leh anăn arăng phat kđi phung djiê tui si klei arăng čih leh hlăm lu hdruôm hră anăn, tui si bruă diñu ngă leh” (Klei Bi Êdah 20:12b)
Klei êmuh ksiêm mĭn: Si Klei Aê Diê Blŭ hưn êlâo kơ klei Aê Diê phat kđi? Si klei phat kđi pioh kơ phung amâo mâo anăn hlăm hdruôm hră klei hdĭp? Si klei mñă kơ drei ti anăp klei kpă ênô Khua Yang?
Klei Aê Diê Blŭ jing hdruôm hră knŏng sa hjăn hưn êlâo kơ hruê knhal tuč čiăng bi leh bruă Yang Mngăt Jăk kčŭt lăn ala kơ klei Aê Diê phat kđi knhal tuč (Y-Yôhan 16:8). Klei phat kđi jih jang mnuih bi êdah klei kpă ênô Khua Yang; klei hưn êlâo brei răng bi êdah klei Ñu khăp hlŏng lar. Khua Yang Yêsu tuôm hưn êlâo leh mơh: “Leh anăn phung anăn srăng nao mŭt hlăm klei bi kmhal hlŏng lar, ƀiădah phung kpă srăng nao kơ klei hdĭp hlŏng lar” (Y-Mathiơ 25:46). Mâo lu đei klei uăt ruăt (oan ức), klei mplư luar, leh anăn klei soh êgao hnơ̆ng hlăm lăn ala anei, Pô kpă ênô sĭt nik amâo phưi lui ôh!
Klei phat kđi kčưm dơ̆ng hlăk Khua Yang pô yơh pŏk klei phat kđi prŏng leh anăn kô̆ čiăng phat kđi jih jang lăn ala. “Jhưng mtao kô̆ prŏng” bi êdah klei dưi dlông hĭn leh anăn klei doh jăk hĭn mơ̆ng Aê Diê. Amâo mâo pô dưi tlaih ôh mơ̆ng klei phat kđi prŏng anei. Klei hưn bi sĭt jing tui si bruă diñu ngă leh (êlan 13). “Tui si bruă diñu ngă leh” hlăm anăn mâo klei blŭ, klei mtrŭt, klei thâo săng tơdah diñu ngă jih klei anăn. Khua Yang Yêsu lač: “Kyuadah ih srăng mâo klei yap kpă tui si klei ih blŭ, leh anăn mâo klei bi kmhal tui si klei ih blŭ mơh” (Y-Mathiơ 12:37). Pô phat kđi mâo djăp klei čih leh hlăm “lu hdruôm hră” (êlan 12). Hnơ̆ng čuăn klei Ñu phat kđi jing kpă ênô, tui si klei bhiăn Khua Yang “arăng čih leh hlăm lu hdruôm hră”, leh anăn knŏng truh sa blư̆ (Hêbrơ 9:28). Amâo mâo pô dưi bi tui klei soh ñu hŏng bruă ñu pô amâodah mgang klei soh ñu ôh, kyuadah jih jang bruă mnuih yap kpă knŏng jing ao čhŏ mrŏ ti anăp Aê Diê, msĕ si khua pô hưn êlâo Y-Êsai čih leh: “Jih jang hmei jing leh msĕ si pô amâo doh, leh anăn jih bruă kpă ênô hmei jing msĕ si čhiăm ao čhŏ leh” (Y-Êsai 64:6).
Klei phat kđi “klei djiê tal dua” pioh kơ phung amâo mâo ôh anăn čih leh hlăm hdruôm hră klei hdĭp (êlan 15). Mnuih arăng phat kđi jing soh leh amâo srăng lŏ djiê ôh, amâo pĭt ôh msĕ si klei lač leh hlăm Klei Aê Diê Blŭ (Y-Mathiơ 9:24) ƀiădah arăng srăng dlăm hlăm ênao pui hlŏng lar: “Ênao pui anăn jing klei djiê tal dua” (êlan 14)! Dôk hlăm ênao pui, amâo mâo pô dưi mdei amâodah pĭt, ƀiădah “jing anôk čŏk hia leh anăn kriêt êgei” hlŏng lar (Y-Mathiơ 13:42, 50). Knŏng hlei pô mâo anăn čih leh hlăm hdruôm hră klei hdĭp jing phung đăo kơ Khua Yang Yêsu mâo klei bi mtlaih, amâo lŏ mâo klei bi kmhal kơ digơ̆ ôh (Rôm 8:1).
Klei hriăm anei mñă kơ drei Aê Diê jing Pô kpă ênô khut khat. Đăm mâo pô dlăng hơăi mang kơ klei kpă ênô ñu ôh. Khua Yang srăng phat kđi jih jang mnuih hŏng klei mtăp mđơr. Akâo Khua Yang brei drei dôk hdĭp kpă ênô, đăo knang kơ Khua Yang leh anăn bi êdah klei kpă ênô Ñu hlăm grăp klei blŭ, klei mĭn, bruă ngă.
Si drei mprăp kơ hruê dôk ti anăp jhưng mtao prŏng kô̆?
Wah lač: Ơ Ama kpă ênô! Akâo Ama krơ̆ng kâo hlăm klei đăo leh anăn klei kpă ênô Khua Yang Yêsu čiăng kơ hlăm hruê phat kđi, kâo dôk ti anăp jhưng mtao Khua Yang hŏng ai tiê êđăp ênang leh anăn bŏ hŏng klei čang hmăng hdĭp hlăm Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 108-109
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
