Mathiơ 24:9-11
“Inh roi kơ iĕm dôm tơdrong noh hei wă kơ iĕm chơt hiôk yua kơ iĕm gơnang kơ Inh. Tơ ala teh âu iĕm gô đei tơdrong anat anot. Mă-lei iĕm ‘nĕ kơ sơ’ngon hŏ yua kơ tôm tơdrong ala teh âu thuơ kơ Inh ngăl boih.” (Yôhan 16:33)
Nơ̆r jet tơchĕng pơwao:
– Kră Yang Yêsu roi tơ’bôh lăm năr tuch luch lu bơngai kiơ̆ Kră Yang gô tơ’bơ̆p tơdrong kiơ?
– Kră Yang bơtho pơtrŭt lu bơngai lui kiơ̆ Sư thoi yơ?
– Bơ̆n kăl kơ pơm kiơ wă kơ ling lang kơjăp lăm đon lui ‘bơ̆t “mă ‘mi tih, mă đak lơ̆p, mă kial hơbŭt kư̆m ưh kơ hiong răm”?
Kră Yang Yêsu roi tơ’bôh dơ̆ng kơ lu bơngai pơhrăm păng Sư khan thoi âu lăm năr tuch luch lu sư gô tơ’bơ̆p tơ’bưh hăm lơ tơdrong đe pơm kơnê̆, tơdrong anat anot. Tơdrong ‘nâu Kră Yang kư̆m đêl khan bơih, “Tơ ala teh âu iĕm gô đei tơdrong anat anot” (Yôhan 16:33). Mălei tơdrong anat anot lăm năr tuch luch gô trăp tơpă, rai tŏk mă khan gah tơdrong hơgăt ding dang yơ dah hăm tơdrong tơchĕng dah nơ̆r pơma đĕch ôh, mălei đei tơ’bôh đơ̆ng tơdrong pơm jang hloi “pơjao” păng “pơlôch”, kư̆m ưh kơ sĭ lăp minh ‘bar, pêng ‘nu đĕch ôh ưh kơ lăp đon Tơdrong ‘Nao ‘Lơ̆ng mălei “đĭ kon pơlei” kư̆m đei jơhngơ̆m lei lăi “areh” kơ lu bơngai mă lui kiơ̆ Kră Yang Yêsu.
Kră Yang ăn kơ lu bơngai pơhrăm păng Sư păng lu đe bu mă lui kơ Sư ‘bôh rup gah dôm tơdrong pơmat, hăm dôm tơdrong pơm kơnê̆ krưp lu sư gô tơ’bơ̆p lăm năr tuch luch. Lăm tơdrong pơmat noh, lu bơngai mă đei đon lui gô achăng lê̆ tơdrong lui lu sư, ‘nâu bơih thoi tơdrong Kră Yang rơih hơmet. Lơ bơngai lui gô mơ̆ng kiơ̆ nơ̆r đơ̆ng lu bơngai bơtho hơlĕnh wă achăng lê̆ Kră Yang Yêsu, lu sư ưh kơ sĭ ưh kơ lăp đon tơdrong lui lu sư đĕch mălei kư̆m wă pơm kơnê̆ kơ lu bơngai lui kơ ‘Bok Krist. Kră Yang Yêsu yua nơ̆r “lơ bơngai” tơbăt kơ bơ̆n gô đei tơdrong truh lơ bơngai wă achăng lê̆ tơdrong lui, păng lơ bơngai rŭn răng đon lui kơdih kơplah ‘bôh lơ ‘nhŏng oh bơngai lui adrol sơ̆ mălei dang lu sư pơgăn lê̆ păng pơm kơnê̆ kơ tơdrong lui kơ Kră Yang.
Bơngai lui đĭ đăng lăm chăl arih adrol sơ̆, lu bơngai lui tơ’bơ̆p hăm lơ tơdrong pơgăn, dah pơm kơnê̆, ‘noh kư̆m tơdrong rơih hơmet kăl dêh wă kơ Khul Bơngai Lui gơh rơgoh. Khul Bơngai Lui kơ Kră Yang dang ei athei ling lang kơchăng păng hơmet wă kơ tơblah hăm dôm tơdrong pơgăn păng pơm kơnê̆ kơ tơdrong lui lăm năr tuch luch. Bơ̆n wă chu iŏk dôm tơdrong pơmat, đe pơm kơnê̆ păng phŏ phŏ lôch yua tơdrong lui kiơ̆ Kră Yang Yêsu hloi tăm. Athei ling lang dơ̆ng kơjăp lăm đon lui kơplah đei lơ bơngai achăng lê̆ tơdrong lui păng jing bơngai ayăt kơ ‘long pơglang, jing bơngai pơm kơnê̆ kơ tơdrong lui Kră Yang. Bơ̆n kăl kơ đon lui bơ̆n mă kơjăp lăm Kră Yang Yêsu dang ei wă kơ gơh tơblah hăm tơdrong pơmat pơm kơnê̆ păng tơdrong pơm kơnê̆ kơ tơdrong lui krưp dêh tơ anăp, mălei mă khan “Mă ‘mi tih, mă đak lơ̆p, mă kial hơbŭt kư̆m ưh kơ hơlŭng, ưh kơ păk ôh, yua kơ sư pơm klop kơ tơmo kŭk.” (Mathiơ 7:25).
Ơ Kră Yang mă ‘mêm mơnat, apinh Ih bơwei inh lăm tơpang ti Ih. Apinh Ih tơgŭm inh ling lang kơjăp lăm đon lui kơ Ih, ưh kơ layơ achăng lê̆ mă khan tơ’bơ̆p tơ’bưh hăm tơdrong pơmat, pơm kơnê̆ kơ tơdrong lui, krao khan yua anăn Kră Yang Yêsu Krist, Amen.
Lu bơ̆n hăm wă kơdŭn bơ̆l hăl ‘maih kơdŭn tơrŏng kơplah tơ’bơ̆p tơ’bưh hăm dôm tơdrong đe pơm kơnê̆ yua kơ lui kơ Kră Yang ưh?
Đŏk Sơ̆p hla bơar ‘Bok Kei-Dei lăm pêng sơnăm: Galati 5
Kênh Youtube BHKTHN:
