Klei Aê Diê Blŭ: Y-Mathiơ 24:9-11
Êlan kliăng: “Kâo lač leh klei anei kơ diih, čiăng kơ diih dưi mâo klei êđăp ênang hlăm kâo. Hlăm lăn ala diih srăng mâo klei knap mñai; ƀiădah dôk kjăp bĕ, kâo dưi leh hŏng lăn ala.” (Y-Yôhan 16:33)
Klei êmuh ksiêm mĭn: Khua Yang Yêsu bi êdah hlăm hruê knhal tuč ya klei phung đăo kơ Ñu srăng tuôm? Si klei Khua Yang bi mđĭ ai phung đăo kơ Ñu? Ya klei brei drei ngă čiăng kơ klei đăo drei dôk kjăp nanao ti anăp boh klei “mâo adiê hjan, êa lip, leh anăn angĭn êbŭ ktang” srăng truh?
Khua Yang Yêsu lŏ dơ̆ng bi êdah kơ phung ƀĭng kna thâo hlăm hruê knhal tuč diñu srăng tuôm hŏng lu klei arăng ngă jhat, klei knap mñai. Klei anei Khua Yang ăt tuôm hưn brei răng leh, “Hlăm lăn ala diih srăng mâo klei knap mñai” (Y-Yôhan 16:33), ƀiădah klei truh hlăm hruê knhal tuč srăng kjham snăk, đĭ kơ hnơ̆ng ktang wăt hnơ̆ng lu. Knuih bi kdơ̆ng hŏng phung đăo kơ Khua Yang amâo djŏ knŏng hlăm ai tiê klei mĭn amâodah klei blŭ ôh ƀiădah bi êdah hlăm bruă ngă “jao” leh anăn “bi mdjiê”, ăt kăn amâo djŏ knŏng dŭm čô mnuih amâo čiăng kơ Klei Mrâo Mrang Jăk ôh ƀiădah “jih jang găp djuê mnuih” mâo sơăi knuih “bi êmut” kơ phung đăo kơ Khua Yang Yêsu.
Khua Yang brei phung khua ƀĭng kna leh anăn hlei pô đăo kơ Ñu ƀuh rup kơ klei dleh dlan, hŏng klei arăng ngă jhat ktang snăk diñu srăng tlă anăp hlăm hruê knhal tuč. Hlăm klei dleh dlan anăn, phung knŏng mâo klei đăo srăng ênưih lui klei đăo pô, anei dưi dlăng jing sa klei Khua Yang hrŏng ruah. Lu phung đăo srăng hmư̆ klei mplư jăk phung khua pô mtô soh čiăng hngah kơ klei đăo hlăm Khua Yang Yêsu, diñu amâo djŏ knŏng hngah kơ klei đăo pô ôh ƀiădah lŏ dôk hlăm klei čiăng ngă jhat kơ phung đăo kơ Krist. Khua Yang Yêsu yua boh blŭ “lu mnuih” brei drei thâo srăng mâo lu snăk mnuih lui wĭr klei đăo, leh anăn lu mnuih lui klei đăo pô tơdah ƀuh lu phung ayŏng amai adei êlâo dih jing phung đăo ƀiădah ară anei lŏ bi kdơ̆ng leh anăn ngă jhat kơ phung đăo kơ Khua Yang.
Jih hƀuê ênuk phung đăo kơ Krist, phung đăo tlă anăp hŏng klei bi kdơ̆ng, klei arăng ngă jhat, anăn ăt jing klei hrŏng ruah čiăng êdi kơ Phung Sang Aê Diê jing doh jăk. Phung Sang Aê Diê hruê anei brei mdih leh anăn mprăp čiăng tlă anăp hŏng klei bi kdơ̆ng leh anăn lui wĭt hlăm hruê knhal tuč. Drei srăng tŭ kơ klei dleh dlan, arăng ngă jhat leh anăn boh nik djiê kyua đăo kơ Khua Yang Yêsu. Brei dôk kjăp hlăm klei đăo tơdah ƀuh lu mnuih lui klei đăo leh anăn boh nik jing phung roh kơ Kyâo Bi Kal, jing phung ngă jhat kơ klei đăo kơ Khua Yang. Brei drei dưm klei đăo pô hŏng klei dôk kjăp hlăm Khua Yang Yêsu hlăm hruê anei mtam čiăng dưi bi kdơ̆ng hŏng klei dleh dlan arăng ngă jhat leh anăn klei lui wir lu snăk hlăm klei hdĭp kơ anăp, ƀiădah wăt tơdah “mâo adiê hjan, êa lip, leh anăn angĭn êbŭ ktang thut ngă kơ sang anăn, ƀiădah sang anăn amâo êbuh ôh, kyuadah arăng mdơ̆ng ñu leh ti dlông boh tâo” (Y-Mathiơ 7:25).
Drei kdŭn tluôn, êdu ai čiăng lui wir mơ̆ tơdah tlă anăp hŏng klei arăng ngă jhat kyua klei đăo kơ Khua Yang?
Wah lač: Ơ Khua Yang khăp hơiêng, akâo kơ Ih răng kriê kâo hlăm kngan Ih. Akâo kơ Ih đru kâo dôk kjăp hlăm klei đăo kơ Ih, amâo kbưi ôh hŏng Khua Yang wăt tơdah tlă anăp hŏng klei dleh dlan, arăng ngă jhat leh anăn klei lui wir klei đăo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Galati 5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
