Tơdrong Pơđơ̆k 24:15-16
Kơkuh kơ lu bơngai mă mơ̆ng,
Năr âu lu bơ̆n gô tơchĕng pơwao ‘bai pơhrăm đei kơ̆l bai: Tơdrong Hơmet Ming ‘Lơ̆ng Kơ Bơngai ‘Lơ̆ng Tơpăt kiơ̆ kơ lăm Sơ̆p hla bơar Nơ̆r ‘Bok Kei-Dei Tơdrong Pơđơ̆k 24:15-16.
15 Ơ bơngai pơm kơnê̆, Lê̆ kơ răp chop hnam bơngai tơpăt; ‘Nĕ kơ pơrăm ôh anih sư oei. 16 Yua kơ bơngai tơpăt mă sư pơ̆k tơpơh wơ̆t ră, Mă-lei gô iung dơ̆ng; Mă-lei bơngai pơm kơnê̆ gô pơrăm hăm pơmat-tat.
Trong tơm ‘bai pơhrăm ‘nâu:
“Yua kơ bơngai tơpăt mă sư pơ̆k tơpơh wơ̆t ră, Mă-lei gô iung dơ̆ng; Mă-lei bơngai pơm kơnê̆ gô pơrăm hăm pơmat-tat.” (Tơdrong Pơđơ̆k 24:16)
Nơ̆r jet tơchĕng pơwao:
– Pơtao Salômôn bơtho kon hơ’lơ̆p sư nĕ kơ pơm kiơ hăm bơngai ‘lơ̆ng tơpăt?
– Tuch luch kơ bơngai ‘lơ̆ng tơpăt mă sư tơ’bơ̆p tơdrong hơnat hơnot noh kiơ?
– Jơhngơ̆m đon lu bơ̆n thoi yơ kơplah tơ’bơ̆p tơdrong hơnat hơnot?
Kơkuh kơ đĭ đăng
Yua kơ tơdrong yoch na mă bơngai pơm kơnê̆ dah bơngai ‘lơ̆ng kŭm đei tơ’bơ̆p tơdrong hơnat hơnot. Mă lei bơngai ‘lơ̆ng tơpăt gô pơm hơmet ming ‘lơ̆ng, bơngai kơnê̆ gô pŭ iŏk tơdrong pơmat ưh kơ đei trong ayơ wă hlôi. Nơ̆r bơtho đơ̆ng Salômôn âu wă khan khă kơ kon sư ưh kơ gơh pơgơ̆p hơdai hăm lu bơngai pơm kơnê̆ wă chă iŏk tơmam, pơrăm lu bơngai pơm ‘lơ̆ng tơpăt hăm tơdrong hơlĕnh dah hăm jơhngơ̆m pran (trong 15). Tơdrong bơtho khan âu yua kơ đon lui bơngai ‘lơ̆ng tơpăt gô đei Kră Yang ‘Bok Kei-Dei gô pĕng bơ̆ng kơ lu bơngai tơpăt. Nơ̆r “chop hnam” wă khan chă đei jơnăr wă pơm kơnê̆ dah tơgar iŏk tơmam. Lu bơngai kơnê̆ gô đei tơdrong hiap pơtê̆ kơplah pơm tơdrong kơnê̆.
Tơplơ̆ kơ tơdrong pơma kơ bơngai kơnê̆ noh jơ̆ nơ̆r pơchŭt kơ bơngai pơm tơdrong ‘lơ̆ng. Mă khan bơngai pơm tơdrong ‘lơ̆ng đei pơ̆k lơ wơ̆t, mă lei gô iung păng tuch luch gô kĕ jei. “Nơ̆r “pơ̆k huŏng” wă khan pơ̆k mă lei ưh kơ pơ̆k na ‘bĭch hloi, nhen thoi lăm Hơriso 37:24 “’Mă sư kơtơih, kư̆m huay kơ pơ̆k; Yua kơ Kră Yang gô pôk tơiung sư.”. Nơ̆r “kơtơih pơ̆k tơpơh wơ̆t” wă pơma kơ tơdrong hơnat hơnot truh lơ wơ̆t păng tih krưp dêh. Chăl arih bơngai mă ‘lơ̆ng tơpăt ưh kơ trŏ kơ hoei kơ ‘bơm tơdrong hơnat hơnot ôh mă lei tuch luch kơnh sư đei tơiung hơmet lăi thoi đêl dơ̆ng, kĕ yak hlôi đơ̆ng tơdrong lôch, mă lei tuch luch kơ bơngai pơm kơnê̆ kơnh gô pŭ iŏk tơdrong răm ưh kơ đei gơh dŏng pơklaih.
Chăl arih bơngai lui kơ Kră Yang phŏ kơnh đei tơbơ̆p tơdrong hơnat hơnot hloh kơ bơngai ưh kơ lui yua kơ đei tơdrong gơ̆p pơm kơnê̆ kơ anăn Kră Yang. ‘‘Bok Pôl đei bơtho pơchŭt thoi âu: “Dah đe pơm kơnê̆ kơ bơ̆n yua kơ bơ̆n pơm ‘lơ̆ng, noh bơ̆n rai hiôk hloh. Iĕm ‘nĕ kơ hli kơ tơdrong lu sư pơm, iĕm ‘nĕ kơ tơrơ kơ tơdrong lu sư ngơ̆r.” (I Pêtrôs 3:14). Kră Yang Yêsu kŭm chu pŭ iŏk tơdrong pơmat wă kơ bơ̆n đei tơdrong arih ling lang. Pŭn hiôk kơ lu kon ‘Bok Kei-Dei ưh kơ sĭ kơ minh tơdrong mŭk tơmam đĕch ôh, păng tơdrong jang tih lăm teh đak âu đĕch ôh, mă lei tơdrong gĭt hloh noh jơ̆ jing kon ‘Bok Kei-Dei păng đei tơdrong arih ling lang . Rim năr bơ̆n kăl kơ pơlung dih băl lăm tơdrong hơnat hơnot pơlong lăng, Kră Yang gô pơih trong ăn kơ bơ̆n wă kơ bơ̆n yak hlôi thoi ‘‘Bok Pôl đei bơtho: “’Gah tơdrong đe pơhlŭ wă kơ iĕm kiơ̆ sư pơm yoch, lu ‘nhŏng oh bơ̆n nai đe kư̆m pơhlŭ mơ̆n. Mă-lei ‘Bok Kei-Dei wei-lăng bơ̆n, Sư ưh kơ ăn đe pơhlŭ bơ̆n truh tơ bơ̆n pơm tơdrong yoch ôh, Sư gô tơgŭm bơ̆n tơpă wă kơ bơ̆n huay kơ lui kơ đe pơhlŭ.” (I Kôrintô 10:13). Kră Yang gô ăn kơ bơ̆n kĕ jei lăm năr jơ tuch luch hăm tơdrong yoch nhen thoi Kră Yang sư đei kĕ jei bơih.
Bĕ bơ̆n pôm jơhngơ̆m đon krao khan,
Kơkuh kơ Kră Yang, Inh bơnê kơ Ih đei oei hơdai, thim ăn tơdrong ‘lơ̆ng ih, păng thim ăn jơhngơ̆m pran kơ inh wă kơ inh yak hlôi đơ̆ng tơdrong hơnat hơnot pơlong lăng. Apinh Ih ăn kơ inh thim jơhngơ̆m đon lui, tơdrong hơđơ̆ng, chơ̆n jơhngơ̆m lăm tơdrong pơlong alăng. Apinh Ih tơgŭm inh đei jơhngơ̆m băt ‘mêm păng tơgŭm lu bơngai đei tơdrong pơmat tat. Yua anăn Kră Yang Yêsu Krist. Amen
Ơ đĭ đăng bơngai mơ̆ng mă ‘mêm kơ eng,
Lu bơ̆n hăm đei wă yua kơ anăn Kră Yang na chu pơmat?
Mă đei kial hơbŭt tăp pang
Đon lui oei dơ̆ng kơ jăp, ưh kơ ngĭl ngŭl
Gơnang kơ Kră Yang ưh kơ tơplih
Kră Yang ăn tơdrong kĕ jei lăm năr ‘lơ̆ng rŏ
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: I Hơ’mon 7-8.
Kênh Youtube BHKTHN:
