Thaum Tus Tswv Haivneeg Txo Hwjchim – 27/6/2022

596

 

 

II.Xwmtxheej Vajntxwv 12:5-14 

Nqe cim:

Yog li ntawd, nej yuav tsum txo nej lub hwjchim thiab cia Vajtswv tus uas muaj hwjchim kav nej. Yog nej ua li ntawd thaum txog hnub uas Vajtswv teem cia lawm, nej yuav tau ntsejmuag” (I.Petus 5:6).

Lus nug rau sawvdaws xav:

–  Tus Tswv txib tus cevlus Semayas mus hais dabtsi rau Vajntxwv Lehaunpau-as thiab cov thawjcoj?

  Lawv muaj tus cwjpwm licas thaum hnov tus Tswv tej lus? Nqi zog yog dabtsi?

  Thaum ntsib kev txomnyem, sim siab, koj pheej muaj tus cwjpwm licas rau tus Tswv?

Thaum Vajntxwv Lehaunpau-as thiab cov Yudas tej thawjcoj tabtom nkaum hauv lub nroog Yeluxalees vim ntshai cov neeg Iziv tus Vajntxwv Sisaj tuaj tua, ces Vajtswv txib tus cevlus Semayas mus cuag lawv thiab qhia rau lawv paub vim licas muaj tej ntawd tshwmsim. Qhov ntawd yog vim lawv “tso” tus Tswv tseg yog li Nws thiaj “tso” lawv rau Sisaj txhais tes. Thaum “tso” lawv, tsis yog tus Tswv tsis hlub lawv tiamsis yog Nws xav kom lawv nco ntsoov kawm mloog lus ces tau koob hmoov, tsis mloog lus ces yuav raug puastsuaj, qhov no yog qhov uas niaj hnub hais mus hais los hauv phau ntawv Xwmtxheej Vajntxwv. Vim txojkev hlub thiab koob hmoov pub dawb, tus Tswv yeej muaj ib txoj haukev pab thaum Nws haivneeg txo hwjchim, thov Nws, nrhiav Nws, tso kev txhaum tseg tig rov los cuag Nws ces tus Tswv yog tus uas nyob saum ntuj yuav mloog, zam txim thiab yuav kho dua lawv lub tebchaws (II.Xwmtxheej Vajntxwv 7:14). Qhov ntawm no yog Vajtswv cov lus cog tseg uas Nws teb Vajntxwv Xalumoos cov lus thov thaum ub, thiab tus Tswv yog tus ncaj ncees ua raws li Nws coglus tseg.

Hauv ntu Vajluskub no muaj plaub zaug hais txog kev “txo hwjchim” ntawm vajntxwv thiab cov thawjcoj (nqe 6, 7, 12). Thaum txo hwjchim lawm, lawv kuj lees paub tus Tswv yog tus ncaj ncees, qhov uas Nws rau txim“yeej ua ncaj lawm”. Qhov no kuj yog tus cwjpwm uas lawv paub lees tej kev txhaum ua tsis zoo, tsis yog thaum raug txim. Tus Tswv hnov, pom qhov kev txo hwjchim ntawd thiab coglus yuav cawm lawv “ibtxhia” dim tsis pub kom puastsuaj tas, tebchaws Yudas tseem muaj nyob, Vajntxwv Lehaunpau-as tseem yuav ua vajntxwv kav tiamsis yuav tsum ua vajntxwv Iziv qhev kom nws paub qhov txawv ntawm Vajtswv kev ua siab ntev rau nws thiab lwm lub tebchaws txojkev tswj hwm phem zoo licas.

Nyob hauv peb lub neej los kuj zoo li ntawd, yog peb tsis raug tej kev txomnyem, sim siab uas Vajtswv pom zoo tshwmsim ces peb yuav tsis paub ua Nws tsaug thaum peb tau nyob kaj siab lug. Thaum peb ntsib tej kev txomnyem, yog peb tsis paub qhov ntawd yog lub zoo sijhawm tig los lees txim, saib qhov ntawd yog tej yam zoo uas tus Tswv qhia, ces qee lub sijhawm peb yuav yws, cem hais tias yog Nws muab peb “tso” tseg. Thaum ntawd yuav ua rau peb ua xyem xyav txog tus Tswv txojkev ncaj ncees thiab kev hlub, tsis txo hwjchim lees paub hais tias Nws yeej ua ncaj rau txhua lub tsamthawj thiab Nws txojkev npaj yeej zoo rau yus thaum raug kev sim siab. Cia li sim xav saib, tej nqi zog txaus tu siab twg yuav tshwmsim yog hais tias vajntxwv thiab cov Yudas tej thawjcoj tsis “txo hwjchim”?

Thaum ntsib kev sim siab, koj pheej yws, pheej cem lossis koj zeem paub yus qhov tsis zoo, ua tsis yog thiab cia siab ntsoov rau tus Tswv?

Thov Vajtswv,

Tus Tswv, thov Koj pub rau nyuam yaus paub txo hwjchim thiab lees tej yam uas ua tsis tau zoo nyob hauv lub neej thaum ntsib kev sim siab. Thov Koj pub kev ntseeg rau nyuam yaus kom nyuam yaus niaj hnub ntseeg Koj txojkev ncaj ncees thiab Koj txojkev hlub. Amees.

 

Nyeem Vajluskub hauv peb lub xyoo: Phau Ntawv Nkauj 95:1-96:13

Kênh Youtube BHKTHN:

https://www.youtube.com/c/bhkthn

Bài trướcGia Lai: Bổ Nhiệm Quản Nhiệm Cho 7 Hội Thánh
Bài tiếp theoSĭt Phung Ƀuôn Sang Ñu Bi Luă Gŭ Diñu Pô – 27/6/2022