Sĭt Phung Ƀuôn Sang Ñu Bi Luă Gŭ Diñu Pô – 27/6/2022

1120

 

Klei Aê Diê Blŭ: II Klei Yăl Dliê 12:5-14

Êlan kliăng: “Snăn bi luă gŭ bĕ diih pô ti gŭ kngan myang Aê Diê, čiăng kơ Ñu dưi bi mđĭ diih hlăm ênuk djŏ” (I Y‑Pêtrôs 5:6)

Klei êmuh ksiêm mĭn: Ya klei Aê Diê tiŏ nao Y‑Sêmaya lač hŏng Mtao Rôbôam leh anăn phung khua gĭt gai? Si knuih diñu mâo leh hmư̆ klei Aê Diê mtă? Ya klei tŭ mâo? Sĭt tuôm hŏng dleh dlan, lông dlăng, si knuih drei mâo hŏng Aê Diê?

Hlăk Mtao Rôbôam leh anăn phung khua gĭt gai Yuđa dôk bi kƀĭn ti Yêrusalem čiăng đuê̆ kơ klei mtao Êjip Y‑Sisak nao blah snăn Aê Diê tiŏ nao Khua pô hưn êlâo Y‑Sêmaya nao hưn kơ diñu thâo ya ngă mâo hĕ bruă anei. Anăn jing kyua diñu “lui” Aê Diê anăn Aê Diê ăt “lui” mơh diñu hlăm kngan Mtao Sisak. Leh “lui”diñu, amâo djŏ ôh Aê Diê amâo lŏ khăp kơ diñu ƀiădah Ñu čiăng digơ̆ lŏ hdơr klei hriăm gưt asăp kơh mâo klei hơêč hmưi, amâo gưt asăp srăng tŭ klei bi kmhal, anăn jing klei dưi mñă wĭt mñă nao hlăm hdruôm hră Klei Yăl Dliê. Kyua klei khăp leh anăn klei pap, Aê Diê pŏk nanao sa êlan tlaih sĭt phung ƀuôn sang Ñu bi luă gŭ pô, wah lač, duah Aê Diê, lui êlan soh lŏ wĭt kơ Aê Diê snăn Ñu dôk hlăm adiê srăng hmư̆, pap brei klei soh leh anăn srăng dưi đru kơ lăn čar diñu (II Klei Yăl Dliê 7:14). Anăn jing klei Aê Diê ƀuăn čiăng lŏ wĭt lač klei Mtao Salômôn wah lač hlăk đưm, leh anăn Pô sĭt suôr ngă nanao klei Ñu ƀuăn.

Hlăm trăn Klei Aê Diê Blŭ anei mâo truh pă blư̆ lač kơ klei mtao leh anăn phung khua čar “bi luă gŭ pô” (êlan 6-7, 12). Sĭt bi luă gŭ pô snăn, diñu ăt dlăng kơ Aê Diê jing “kpă ênô”, jing djŏ hlăm klei ƀuah mkra tal anei. Anei ăt jing knuih thâo hưn klei soh pô, klei kƀah pô sĭt tŭ klei ƀuah mkra. Aê Diê mđing hmư̆, ƀuh klei diñu bi luă gŭ pô anăn leh anăn ƀuăn srăng bi mtlaih diñu “ƀơ ƀiă” amâo djŏ hlŏng bi rai luč diñu ôh, čar Yuđa ăt adôk, Mtao Rôbôam ăt dưi krơ̆ng jhưng mtao ƀiădah jưh kơ Mtao Êjip čiăng hriăm kơ si klei mdê plah wah mă bruă kơ Aê Diê bŏ hŏng klei pap hŏng klei mă bruă kơ phung nah êngao bŏ hŏng măk ƀai.

Hlăm klei hdĭp drei msĕ mơh, tơdah amâo mâo klei dleh dlan, lông dlăng Aê Diê brei truh snăn drei ăt srăng amâo thâo hdơr knga kơ Aê Diê kơ klei êđăp ênang Ñu brei leh kơ pô. Sĭt tuôm hŏng klei dleh dlan, hrô kơ thâo anăn jing mông găl čiăng kmhal, čiăng thâo mpŭ kơ klei Aê Diê brei, snăn lu mmông drei blŭ duñ duñ, ƀuah ăl Ñu “wơr” hĕ amâodah “lui” hĕ pô. Hlăk anăn drei đing kơ kpă ênô leh anăn klei khăp Khua Yang, leh anăn amâo bi luă gŭ pô ôh čiăng yap Aê Diê djŏ nanao hlăm djăp klei mâo leh anăn mâo hdră jăk kơ pô hlăm klei ƀuah mkra amâodah lông dlăng anei. Lông bi mĭn, ya klei jhat srăng truh tơdah mtao leh anăn phung khua čar Yuđa amâo mâo “bi luă gŭ diñu pô”?

Sĭt tuôm hŏng klei lông dlăng, drei khăng blŭ duñ duñ, ƀuah ăl amâodah dlăng kơ klei kƀah, klei soh pô leh anăn lŏ dơ̆ng đăo knang kơ Aê Diê?

Wah lač: Ơ Khua Yang, akâo kơ Ih đru kâo thâo bi luă gŭ pô leh anăn kmhal klei soh hlăm klei hdĭp kâo sĭt tuôm hŏng klei lông dlăng. Akâo kơ Ih đru kâo mâo klei đaŏ knang kơ klei kpă ênô leh anăn klei khăp Ih.

Dlăng Klei Aê Diê Blŭ hlăm tlâo thŭn: Klei Mmuñ Hđăp 95:1-11; 96:1-13

Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm

Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com

Kênh Youtube BHKTHN:

https://www.youtube.com/c/bhkthn

Bài trướcThaum Tus Tswv Haivneeg Txo Hwjchim – 27/6/2022
Bài tiếp theoKhi Dân Ngài Hạ Mình Xuống – 27/6/2022