Klei Aê Diê Blŭ: I Y-Pêtrôs 1:8-12
Êlan kliăng: “Aê Diê bi êdah leh kơ diñu bruă diñu ngă amâo djŏ kơ diñu pô ôh, ƀiădah kơ diih ară anei yơh. Klei anăn phung mtô klei mrâo mrang jăk hŏng Yang Mngăt Jăk Aê Diê tiŏ hriê leh mơ̆ng adiê hưn kơ diih. Wăt phung dĭng buăl jăk Aê Diê čiăng ksiêm dlăng klei anăn mơh”(I Y-Pêtrôs 1:12)
Klei êmuh ksiêm mĭn: Si phung khua pô hưn êlâo hlăm Klei Bi Mguôp Hđăp hưn êlâo leh leh anăn thâo kơ klei bi mtlaih? Si ngă phung đăo kơ Krist hlăk anăn mâo klei pap thâo kral kơ klei bi mtlaih? Si klei đru kơ klei đăo drei tơdah thâo săng klă kơ klei yuôm bhăn anei?
Phung khua pô hưn êlâo “duah ksiêm bi nik kơ klei bi mtlaih anăn” jing klei bi mtlaih mơ̆ng Yang Krist čuăn leh kơ jih jang hlei pô khăp leh anăn đăo kơ Khua Yang Yêsu Christ (êlan 10). Amâo djŏ ôh diñu yua klei thâo mĭn leh anăn klei thâo pô čiăng hưn êlâo kơ klei Yang Krist bi mtlaih “kyuadah amâo tuôm mâo ôh sa mta klei hưn êlâo kbiă hriê mơ̆ng klei mnuih mĭn, ƀiădah Yang Mngăt Jăk mtrŭt mnuih blŭ klei kbiă mơ̆ng Aê Diê” (II Y-Pêtrôs 1:21). Yang Mngăt Jăk yơh ktrâo lač leh anăn bi êdah čiăng kơ diñu dưi “thâo ênuk leh anăn si klei Yang Mngăt Jăk Krist hlăm diñu bi êdah, diñu hưn êlâo klei knap mñai Krist leh anăn klei guh kơang srăng tui hlue” (êlan 11).
Ƀiădah wăt tơdah gĭr snăk dưn mơh, phung khua pô hưn êlâo hlăm Klei Bi Mguôp Hđăp ăt kăn thâo mơh hbĭl bruă anăn srăng truh, leh anăn hŏng si hdră. Khădah snăn diñu ăt tŭ klei knap mñai, arăng ngă jhat leh anăn tŭ klei djiê čiăng hưn kyua Aê Diê, amâo djŏ kyua diñu ôh ƀiădah kyua drei. Klei Aê Diê bi mtlaih mơ̆ng Khua Yang Yêsu Krist jing bruă yuôm bhăn snăk kyua Aê Diê hrih mjing leh dŭm tal adiê leh anăn lăn ala knŏng asăp blŭ, ƀiădah čiăng bi mtlaih anak mnuih mơ̆ng klei soh, Aê Diê Pô Tal Dua hriê ti lăn ala, tŭ klei djiê leh anăn kbiă lŏ hdĭp, tơl “Wăt phung dĭng buăl jăk Aê Diê čiăng ksiêm dlăng klei anăn mơh” (êlan 12).
Phung đăo kơ Krist mnuih Yuđa hlăk anăn hmư̆ leh klei phung khua hưn êlâo hlăm Klei Bi Mguôp Hđăp, mâo dlăng leh hră anei mơ̆ng Khua ƀĭng kna Y-Pêtrôs, ƀuh leh hŏng ală mta klei Khua Yang Yêsu tŭ klei knap mñai leh anăn kbiă lŏ hdĭp, hŏng klei thâo kral Khua Yang hjăn pô. Anei jing tur kjăp đru diñu dưm klei đăo kluôm ênŭm hlăm Khua Yang Yêsu Krist. Leh anăn anei ăt jing klei bi mđĭ ai prŏng čiăng kơ phung đăo kơ Krist hlăk anăn dôk tŭ klei lông dlăng, leh anăn wăt phung drei hruê anei, ƀrư̆ thâo sĭt kơ klei bi mtlaih pô dôk đăo. Thâo săng klă kơ klei yuôm bhăn anei đru drei thiăm klei gĭr, krơ̆ng kjăp klei đăo tơl truh hruê tŭ klei bi mtlaih kluôm ênŭm hlăm asei mlei, mngăt ai tiê tơdah Khua Yang Yêsu lŏ hriê.
Si drei srăng ngă čiăng bi mklă klei pô thâo săng klă kơ klei bi mtlaih Khua Yang brei?
Wah lač: Ơ Khua Yang bŏ hŏng klei khăp leh anăn klei pap. Kâo bi mni kơ Ih kyua klei bi mtlaih yuôm bhăn Ih brei leh kơ anak mnuih leh anăn kơ kâo pô. Akâo kơ Ih thiăm klei ktang leh anăn brei klei thâo săng čiăng kơ kâo ƀrư̆ bi mklă klei đăo pô hlăm klei bi mtlaih Ih brei, čiăng kơ kâo jih ai tiê sĭt suôr leh anăn mă bruă kơ Khua Yang truh knhal tuč. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Klei Yăl Dliê 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
