1 Petus 1:8-12
Nqe cim:
“Vajtswv twb qhia rau cov cev Vajtswv lus paub lawm hais tias tej haujlwm uas lawv ua ntawd tsis yog muaj nqis rau lawv xwb, tiamsis muaj nqis rau nej, niaj hnub nimno cov neeg uas qhia Txojmoo Zoo, lawv twb qhia tej zaj tseemceeb ntawd rau nej paub lawm, lawv yog cov uas muaj Vaj Ntsujplig tus Dawbhuv lub hwjchim” (1 Petus 1:12)
Lus nug rau sawvdaws xav:
– Cov cevlus hauv Vajluskub qub tau hais ua ntej txog txoj kev cawm dim li cas?
– Cov ntseeg uas nyob rau tiam xubthawj tau txoj koob hmoov tshwjxeeb zeem paub kev cawmdim li cas?
– Yog peb paub li ntawd yuav pab tau peb kev ntseeg zoo li cas?
Cov cevlus hauv Vajluskub qub “…ua tib zoo xyuas zaj uas hais txog txoj kev dim txim ntawd tseeb tseeb lawm, lawv yog cov uas qhia ua ntej hais txog txoj koob hmoov uas Vajtswv yuav pub rau nej”. Txhais tau hais tias txoj kev cawm dim uas Tswv Yexus los ua tiav, twb npaj tseg cia rau txhua tus uas yuav ntseeg Tswv Yexus thiab hlub Vajtswv dhau los lawm (nqe 10). Lawv tsis siv kev txawj ntse thiab kev paub ntawm tus kheej los hais ua ntej txog Vajtswv kev npaj tseg txog kev cawm dim hauv Tswv Yexus, “Rau qhov tej lus qhia tshwm ntawd tsis yog neeg qhia, tiamsis yog Vaj Ntsujplig tus Dawbhuv tshoov neeg lub siab kom lawv qhia Vajtswv txojlus xwb” (2 Petus 1:21). Vaj Ntsujplig yog tus coj kev thiab qhia rau lawv paub “Yexus Khetos tus Ntsujplig uas nyob hauv lawv lub siab qhia rau lawv hais tias thaum txog lub sijhawm ntawd Yexus Khetos yuav raug kev tsimtxom thiab tom qab ntawd Yexus yuav tau koob meej” (nqe 11).
Txawm yuav yog siv zog npaum li cas los, cov cevlus hauv Vajluskub qub yeej tsis muaj peevxwm paub tej xwm ntawd yuav tshwm los zoo li cas, thiab los ntawm yam dab tsi. Txawm li ntawd los, lawv txaus siab tiv kev mob, kev tsimtxom, iab liam thiab lawv kam tuag vim Vajtswv lub npe. Vajtswv npaj tseg txog kev cawmdim dlhau los ntawm Tswv Yexus yog ib tes haujlwm uas txawv thiab tseem ceeb kawg nkaus, vim Vajtswv tsim lub ntuj thiab lub ntiajteb los ntawm lo lus hais, tiamsis qhov uas yuav Cawm kom tibneeg dim ntawm txoj kev txhaum, Vajtswv Vaj Leej Tub yuav tsum los yug ua tibneeg, raug tuag thiab sawv rov qab los, “Txawm yog cov timtswv ceebtsheej los lawv tseem tos ntsoov xav pom tej no thiab” (nqe 12).
Cov neeg Yudas ntseeg Yexus uas nyob rau tiam Yexus los yug, lawv twb tau hnov cov cevlus hauv Vajluskub qub qhia, tau nyeem timthawj Petus tsab ntawv no, lawv qhovmuag saib ntsoov Tswv Yexus raug txomnyem thiab sawv rov qab los, lawv puavleej paub Tswv Yexus ntawm lawv tus kheej. Tej ntawd yog povthawj ruaj khov pab lawv ntseeg thiab tso siab plhuav rau ntawm Tswv Yexus Khetos. Tej ntawd kuj yog kev txhawb zog rau peb cov ntseeg nimno thaum ua lub neej ntseeg ntsib ntau yam kev sim siab, thiab tej ntawd yuav ua rau peb yim hnub yim paub tseeb txoj kev cawm dim uas peb tabtom ntseeg. Paub meej Tswv Yexus yog tus Tswv Cawmseej yuav txhawb tau peb siv zog ntseeg ntxiv, ceev ruaj kev ntseeg mus txog hnub uas tau txais txoj kev Cawm dim puv ntoob hauv hnub Tswv Yexus rov qab los.
Thov Vajtswv,
Vajtswv tus uas muaj lub siab hlub tshua. Nyuam yaus thov qhuas Koj vim Koj pub txoj kev cawmdim uas loj kawg nkaus rau nyuam yaus thiab tibneeg. Thov pab nyuam yaus ntseeg tso siab plhuav rau ntawm Koj thiab kom nyuam yaus ncaj ncees ua Koj tes haujlwm mus txog hnub Yexus rov qab los. Nyuam yaus tuav Tswv Yexus Khetos lub npe thov, Amees.
Peb yuav ua li cas thaum paub hais tias yus tau txais kev cawm dim lawm?
Nyeem Vajluskub hauv peb lub xyoos: 2 Xwmtxheej Vajntxwv 2
Kênh Youtube BHKTHN:
